រដូវក្តៅដ៏មរណៈមួយកំពុងកើតឡើង ជាមួយនឹងផលចំណេញ តិចតួចបំផុតនៅក្នុងសមរភូមិរវាងរុស្ស៊ី និងអ៊ុយក្រែន 

យោងតាមកាសែតThe Wall Street Journal នៅពេលដែលជម្លោះរុស្ស៊ី-អ៊ុយក្រែនបានអូសបន្លាយដល់រដូវក្តៅទី3 របស់ខ្លួន ខ្សែជួរមុខចង្ងាយជាង 1000 គីឡូម៉ែត្រ (700 ម៉ាយ) នៅតែជាទិដ្ឋភាពនៃការបង្ហូរឈាមដ៏សាហាវ។ កងទ័ពរបស់អ៊ុយក្រែន ដែលថ្មីៗនេះបានបញ្ឈប់ការរុលទៅមុខដ៏គ្រោះថ្នាក់របស់រុស្ស៊ី ហើយឥឡូវនេះកំពុងធ្វើការវាយលុកទៅក្នុងភូមិនានា នៅតាមព្រំដែនភាគឦសានរបស់ខ្លួន។
ទន្ទឹមនឹងនេះដែរ នៅចម្ងាយជាង 300 គីឡូម៉ែត្រ ទៅភាគអាគ្នេយ៍ កងកម្លាំងរុស្ស៊ីកំពុងឆ្ពោះទៅរកផ្លូវផ្គត់ផ្គង់ដ៏សំខាន់ ដែលគាំទ្រដល់ការការពារ របស់អ៊ុយក្រែន ទៅលើទីក្រុងដែលបានឡោមព័ទ្ធនៅក្នុងតំបន់នោះ។ សង្រ្គាមនេះត្រូវបានគេរំពឹងថានឹងកើនឡើងកាន់តែខ្លាំង ជាពិសេសនៅក្នុងរដូវកាលខាងមុខនេះ ដោយមនុស្សរាប់ពាន់នាក់ទាំងសងខាងអាចនឹងត្រូវបាត់បង់ជីវិត ដោយគ្មានដំណោះស្រាយច្បាស់លាស់។
សម្រាប់អ៊ុយក្រែន បន្ទាប់ពីការវាយលុកមិនបានសម្រេចកាលពីរដូវក្តៅមុន គោលដៅភ្លាមៗ គឺប្រើប្រាស់អាវុធលោកខាងលិចដែលទើបទទួលបានថ្មីៗ ដើម្បីការពារទីតាំងរបស់ពួកគេ។ ម៉្យាងវិញទៀត រុស្ស៊ីហាក់ដូចជាកំពុងប្រកាន់ខ្ជាប់នូវវិធីសាស្រ្តលះបង់ជីវិតទាហាន ដើម្បីទទួលបានផលចំនេញបន្តិចម្ដងៗ របស់ខ្លួន។ ដោយមន្ត្រីសន្តិសុខជាន់ខ្ពស់អ៊ុយក្រែនម្នាក់បញ្ជាក់ថា រុស្ស៊ីមិនមានកងទ័ពគ្រប់គ្រាន់សម្រាប់វាយលុកអោយកាន់តែខ្លាំងទៅក្នុងទីក្រុង Kharkiv នោះទេ ព្រោះការធ្វើបែបនេះនឹងធ្វើឱ្យផ្នែកជួរមុខផ្សេងទៀតរបស់ពួកគេចុះខ្សោយ។