《中年好聲音3》香港區報名喺7月19號晚截止，由於報名人數反應熱烈，大會決定翌日20號隨即展開面試，過千人到電視城接受面試，喺一眾評審肥姐Maria Cordero、伍仲衡、張佳添、周國豐、海兒聯同曾志偉面前獻唱。入圍者來自唔同行業各界人士，大家為面試作好準備，獻唱水準不俗。舊年參加《中聲2》嘅顏米羔同梁浩賢有現身為參賽者打氣，佢哋話勾起舊年面試時嘅緊張心情。
參賽者中有一名係視障人士朱麗萍，佢嘅丈夫亦陪伴一齊參賽，朱麗萍希望透過參賽令更多人聽到視障人士嘅聲音，佢嘅歌聲感動到曾志偉，曾生話被佢嘅勇氣感動，好希望佢能夠行得更遠，好想聽到佢哋夫婦合唱。
今屆參賽者中亦有歌星嘅親人參賽，就好似區瑞強弟弟區瑞明，佢話哥哥唔知佢報名，係抱住鍾意唱歌嘅心態參賽，但聽到評審一致好評令佢信心大增。從事豬農嘅胡家健就隱瞞家人報名，佢話之前同個仔講如果有日見到爸爸喺電視出現會點，點知太太問佢係咪犯咗事，而家同樣獲評審好評，佢都希望能夠畀個驚喜家人。
伍Sir繼續叮囑參賽者要小心揀歌，唔需要揀太難嘅歌，只要簡單感動到大家就得。初次加入「中聲」評審團嘅海兒，話事前做足準備，因為擔心自己講嘢唔夠簡潔。
#中年好聲音3 #香港區 #曾志偉 #mariacordero #伍仲衡 #張佳添 #周國豐 #海兒 #視障 #朱麗萍 #區瑞強 #弟弟 #區瑞明 #胡家健
#TVB #娛樂新聞 #TVB娛樂新聞台
#ENews #HKENews #香港娛樂八卦新聞 #八卦新聞
即刻Follow TVB 娛樂新聞台 Facebook專頁
/ tvbenews
登入myTV SUPER享受睇TVB自製節目7日包括娛樂新聞的免費點播
bit.ly/2TXLlM0
5 сен 2024
