昨日梅媽登報跟梅啟明脫離母子關係，98歲梅媽更稱梅啟明欠債累累，是他令自己走投無路才斷絕關係。
今日開記者會，他認為梅媽被人擺佈，才跟他脫離關係，同時事件跟他告拍《梅艷芳》的電影公司有關，但他並沒悔意。「我回應點解媽媽同我搞脫離關係，其一電影公司嗰度，版權同埋商標我04年已經註冊咗啲嘢，咁喺某情況之下呢，媽媽係咪收咗人嘅錢，或者任何…我唔知！老人家呢，亦都唔好怪佢。眼又矇耳又聾，可能俾人擺佈，我都想搞清楚呢樣嘢。如果電影公司真係有心去傾，應該知會我，媽媽九十幾歲喎，或者俾人唆擺，或者俾人誤導，完全唔知喎！佢係咪收咗人錢？當初係要我撤銷，咪撤銷囉，你話事。但未撤銷之前，係佢嗌我入紙，我先行呢步棋。今日行咗又話取消，佢要同我脫離（母子關係），驚法律問題，驚官司問題！如果冇受人利益，亦都唔使驚！告上法庭都係我問題，同佢無關。」
他堅持告下去，「除非呢，電影公司肯和談，一蚊都好啦，我都會撤銷，最緊要和談。」會要求對方賠違約金？他肯定地說：「違約呢，一定㗎啦，如果唔係註冊商標嚟做乜嘢，一蚊都好，要出嚟同公眾交代，呢個係我原則。」
現欠債，有錢告嗎？他說：「嗰啲係另一個問題，冇錢有冇錢嘅告法。咁冇錢啲人咪死得不明不白，死得冤枉，含冤，咁咪一世都唔咩，唔得㗎嘛，咁法律係咪公正。」
至於被梅媽脫離關係，他認為自己甚麼都沒做錯，自言自己也被走數。
「我呢度告緊人幾十萬（展示一些文件），法庭亦都判咗，十幾萬（對方）要即刻畀，佢都冇畀到。」他自認被走數，出現經濟問題，所以問梅媽借錢。「問老人家借，咁佢唔借，我咪喺出面借囉！」
對於梅媽住醫院，「佢根本逃避，佢冇嘢喎，喺聖保祿住千幾呎套房。」
對於梅媽多年來的經濟幫助，會否感恩？梅啟明理直氣壯說：「我唔感恩，我一啲都唔感恩。你哋知唔知佢一個月收幾多錢？一個月25萬，而我只係攞兩萬咋。唔係少嘅問題，都過咗咁耐，我都唔想多講。」
被梅媽指貪財，他不忿地說：「我貪財，我就一早貪咗啦！個個月貪佢兩萬蚊，係咪咁講呀！仲話要養我一家大細，你估我真係殘廢㗎！我喺出面做嘢，你哋知唔知先？做過地盤、裝修、廚房『炒鑊』做到褲都濕埋，而我一路都做緊，係散工嚟，冇停過。兩萬蚊做得乜，個仔學鋼琴、芭蕾舞，邊度夠開支！」
對於被老婆踢爆包二奶，他不認，更堅稱：「你哋誤會啦，係人哋幫我咋。」
----------------------------------------------------------
即刻跟住Follow 晒我哋Channel：
FB： as1hk.ent...
IG： / as1.entertainment
YT： / @as1.entertainment
5 окт 2024
