ہر ویلے یار دی تانگھ لگی سُنجے سینے سِک دی سانگ لگی ڈکھی دِلڑی دے ہتھ ٹانگھ لگی تھئے مل مل سول سمولے سب تتی تھی جوگن چو دھار پھراں ہند سندھ پنجاب تے ماڑ پھراں سنج بار تے شہر بزار پھراں متاں یار ملم کہیں سانگ سبب جیں ڈینہ دا نینہ دے شینہ پُٹھیا لگی نیش ڈکھاں دی عیش گھٹیا سر جوبن جوش خروش ہٹیا سُکھ سڑ گئے مر گئی طرح طرب توڑیں دھکڑے دھوڑے کھاندڑیاں تیڈے نام تے مفت وکاندڑیاں تیڈی باندیاں دی میں باندڑیاں ہے در دیاں کُتیاں نال ادب واہ سوہنا ڈھولن یار سجن واہ سانول ہوت حجاز وطن آدیکھ فرید دا بیت حزن ہم روز ازل دی تانگھ طلب