Bizlər Hüseyn məktəbin öyrənmişik,
Zalimə baş əyməmişik, əymərik!
Biz kişi tək cəngidə hərlənmişik,
Məzluma əl dəyməmişik, dəymərik!
Qalmayıb heç vaxt gözümüz arxada,
Yox elə bir şey ki, bizi qorxuda.
Bir qapımız var, o da Babəl-Xuda,
Başqa qapı döyməmişik, döymərik!
Cəfəriyik, məzhəbimiz bəllidir,
Mövqeyimiz, mənsəbimiz bəllidir.
Gizli deyil mətləbimiz, bəllidir,
Biz ki, riya geyməmişik, geymərik!
Haşimi nəslindən olan kəslərik,
Biz nə ədavət, nə də kin bəslərik.
Hər kim ola, doğru yola səslərik,
Nifrin edib söyməmişik, söymərik!
Qövmü Əli ibni Əbi Talibik,
Düşmənimiz çoxdu, fəqət qalibik.
Çünki Hüseyn məktəbinə sahibik,
Qeyrisini öyməmişik, öymərik!
Aslan, özün söylə müsəlmanlara,
Biz necəyik candan əziz canlara.
Yardım üçün üz tutan insanlara,
Qaşımızı düyməmişik, düymərik!
Bizlər Hüseyn məktəbin öyrənmişik,
Zalimə baş əyməmişik, əymərik!
Biz Əli tək cəngidə hərlənmişik,
Məzluma əl dəyməmişik, dəymərik!
13 фев 2024
