14 dekabr 1983-cü ildə Salyan rayonunda anadan olmuş, Azərbaycan Respublikasının vətəndaşı Zülfüqarov Kamran Azər oğlu 2013-cü ildə ölkə ərazisini tərk edərək Suriya Ərəb Respublikasında aparılan silahlı münaqişələrdə və terror əməllərinin törədilməsində iştirak etdiyindən Dövlət Təhlükəsizliyi Xidməti tərəfindən toplanılmış materiallar əsasında və müvafiq qanunvericiliyə uyğun qaydada təhlükəli terrorçu kimi 2018-ci ildə məhkəmə qərarı ilə Azərbaycan Respublikasının vətəndaşlığından məhrum edilmiş, ölkəyə girişi qadağan olunmaqla Azərbaycana qayıtmaq hüququnu itirmişdir.
Lakin Kamran Zülfüqarovun qeyri-leqal yolla ölkə ərazisinə keçərək Azərbaycanda olması barədə məlumatlar aparılan araşdırmalarla yoxlanılaraq öz təsdiqini tapmış və gizləndiyi yer müəyyən edildikdən sonra həmin şəxs saxlanılmışdır.
Kamran Zülfüqarov barəsində aparılan cinayət işi üzrə Azərbaycan Respublikasının Cinayət Məcəlləsinin 12.1, 279.1-ci (qanunvericiliklə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə) və digər maddələri ilə məsuliyyətə cəlb olunaraq məhkəmənin qərarı ilə həbs edilmişdir.
İstintaq-əməliyyat tədbirləri nəticəsində Kamran Zülfüqarovun Suriya Ərəb Respublikasının ərazisində İŞİD-in xüsusi hazırlıq düşərgəsində təlimlər keçərək, odlu silah və partlayıcı maddələrdən istifadə qaydalarını mənimsəməklə dini radikalizm və dini düşmənçilik zəminində həmin ölkənin Haritan şəhərində “Xalid dayı” dini ləqəbli Bədəlov Rövşən Kitab oğlunun (həlak olmuşdur) rəhbərlik etdiyi, bilavasitə kəşfiyyat aparan və terror hücumları törədən qanunsuz silahlı qruplaşmanın tərkibində döyüşlərdə və silahlı münaqişələrdə iştirakına dair mötəbər dəlillər əldə edilmişdir. Həmçinin Kamran Zülfüqarovun daxil olduğu cinayətkar dəstənin üzvlərinin öz şəxsiyyətlərini gizli saxlamaqla əks tərəfdə vahimə yaratmaq üçün ələ keçirdikləri şəxslərin başlarını kəsərək nümayiş etdirmələri və xüsusi qəddarlıqla törətdikləri digər əməllər barədə də sübutlar toplanmışdır.
Kamran Zülfüqarov istintaqa verdiyi ifadə zamanı bildirmişdir ki, o, Suriyadan Türkiyə ərazisinə keçdikdən sonra xüsusi hərbi təlim təcrübəsindən istifadə edib Türkiyə-Gürcüstan sərhədində olan yük avtomobillərindən birinin altında gizlənərək Gürcüstan ərazisinə, oradan da eyni qaydada - Gürcüstan-Azərbaycan sərhədinin “Qırmızı Körpü” Sərhəd Keçid Məntəqəsindən Azərbaycan Respublikası istiqamətində hərəkət edən yük avtomobilinin altında ölkə ərazisinə daxil olmuşdur.
#dtx
12 авг 2023
