Entrepeneur... Emprendedor, Emprendedó, un palabra ku últimamente ta sona hopi den nos komunidat i ront mundu. Además di talento i rekurso, pa ta un entrepeneur of un emprendedó eksitoso ta necesario pa e kandidato tin disiplina i perseveransha. Preparashon pa si e kai... bolbe lanta, lokual no ta fasil si bo no ta mentalmente fuerte, determinashon pa tuma sierto desishon difísil. Pues, den e entrevista aki, mi a keda sorpresá di por a tende un hoben emprendedó, kombersá ku asina un trankilidat i un siguridat di loke e ke, despues di a konfrontá dos impakto fuerte pa su situashon finansiero. Promé, COVID i despues un insidente ku pa su negoshi nos por katalogá komo katastrofiko. Sin embargo, e no a drenta pániko, pero tampoko a entregá i awendia ela siña manehá su situashon di tal manera ku ela sakudí stof for di su paña i kuminsa kana bek den e direkshon desea.
No pèrde e entrevista interesante ku un hoben emprendedó den Bonochi Kòrsou. Javier Janga ta nos invitado pa skucha su testimonio i alabes pa stimulá nos hobennan pa sigui su ehempel.
19 сен 2024
