O, ali təhsilli həkimdir, müəyyən bilgiləri var, Azərbaycan dilində çox aparıcılardan daha yaxşı danışır, müsahibi ilə söhbəti qurmağı bacarır. Biri var. Tanınmış teleaparıcı Nanə Ağamalıyeva.
Nanə Fazil qızı Ağamalıyeva 1980-ci il fevralın 12-də Bakida anadan olub. Əsl adı Nənəxanımdır. Teleaparıcı məktəbdə, universitetdə oxuyan zaman aktivliyiylə seçilib. Məktəbdə keçirilən tədbirlərdə aparıcılıq da edirmiş. Hətta Nanə xanım müsahibələrinin birində deyib: "Mirzə Ələkbər Sabirin “Millət necə tarac olur olsun” şeirini əlimdə təsbeh, kişi paltarında söyləmişəm və məktəbin yarısından çoxu bilməyib ki, rolu oynayan mənəm."
Nanə xanım uşaqlıqda toxuculuğa, tikişə, şahmata, gimnastikaya, rəqsə gedib. Xüsusən də şahmatı çox sevib. Hətta indi də valideynlərinə irad tutur ki, niyə şahmatla peşəkar səviyyədə məşğul olmağı üçün ona təkid etməyiblər. Eyni zamanda Əminə Dilbazinin “Çinar” rəqs qrupunda 6 ilə yaxın rəqslə məşğul olub.
Universitet illərində baş vermiş hər hansı hadisəni şərh edəndə tələbə yoldaşları Nanə xanıma “aparıcı olmalısan” deyirmişlər. Amma özünün belə bir arzusu olmayıb. Hər zaman xarici ölkələrə səfərlər, səyahətlər edən bir iş xanımı olmaq istəyib. Amma necə deyərlər, sən saydığını say, gör fələk nə sayacaq. Belə ki, o 2005-ci ildə müsabiqə yolu ilə ATV telekanalına işə düzəlib. Əvvəl radioda çalışıb. Radiodakı fəaliyyəti bəyənilib, sonra isə televiziyada çalışıb.
O, Azərbaycan Dövlət Tibb Universitetini bitirib və həkim-stomatoloqdur. Televiziyaya gələnə qədər 2 saylı uşaq stomatoloji poliklinikasında stomatoloq işləyib. Hələ universitetin 2-ci kursunda oxuyandan həkim kimi çalışırmış. ATV-yə işə düzələndən sonra həm poliklinikada, həm də televiziyada işini davam etdirib. Radioda “Səhər” verilişinin aparıcısı olandan sonra isə iki yerdə işləməyi alınmayıb. Ora qaç, bura qaç. Sonradan teleaparıcını poliklinikadakı işindən azad ediblər.
Nanə Ağamalıyeva deyir ki, poliklinikada diş düzəldən zaman həyatının mənasız olduğunu hiss edirmiş. Maddi baxımdan hər şey əla olub, amma iş sarıdan xoşbəxt deyilmiş. ATV-yə işə qəbul olunandan sonra boşluğu doldurduğunu düşünür. 2005-ci ildə radioda iş elanı görüb və həyatını dəyişmək, maraq qatmaq üçün özünü sınamaq qərarına gəlib. Hətta zəng edən zaman ona deyiblər ki, “Sizin gözəl sənətiniz var. Nahaq yerə zəhmət çəkib gəlirsiniz. Poliklinikada işləyirsiniz, nə işiniz var burda?. Sizə burda iş olmayacaq”. O isə deyilənə qulaq asmayıb, müsabiqəyə gedib. 200 nəfərlik zalda son sırada oturubmuş. Münsiflər heyətində əyləşən Emin Musəvi üzünü zala tutub “rus dilində bilən varmı” deyib. Orta məktəbi 8-ci sinfə qədər rus bölməsində oxuyan Nanə xanım Əlini qaldırıb ki, mən bilirəm. Verilən suallara layiqli cavablar verib. Onu da vurğulayaq ki, şansının olmadığını düşündüyü üçün sınağa valideynlərindən xəbərsiz gedib. Qardaşı radioda çalışmağına razı olub, amma televiziyaya çıxmağını istəmirmiş. Sonradan məcbur qalaraq razılaşıb.
Onu da vurğulayaq ki, aparıcının qardaşı Qarabağ savaşında şəhid olub. O həmin hadisəni bu cür xatırlayır: "Heç bir söz bu ağrını, bu acını ifadə edə bilməz. Mənim qardaşım 6 əsgərlə birlikdə şəhid olmuşdu. Bu mənim ölənədək sağalmayan yaramdır.
Uşaqlıqdan Rafiq Hüseynovu çox sevirmiş. Özü aparıcı olsa da Nanə xanım ümumiyyətlə televiziyaya baxmadığını deyir. Amma məlum məsələdir ki, o, çox uğurlu teleaparıcıdır. Həmkarlarının 10 ilə əldə etdiyi uğuru 2 ilə qazanıb. Teleaparıcı işə yeni başladığı dövrləri bu cür xatırlayır: " İşə yeni başladığım vaxtlar səhər saat 6-da işdə olurdum və gecə saat 11-də evə qayıdırdım. Radioda “Səhər” proqramının aparıcısı olduğum üçün işə tez gedirdim.
Mənə deyirlər ki, aparıcısı olduğum “Gün keçir” verilişinin studiyası ilə Səba Tümərin studiyası eynidir. Bir növ plagiatlıqda ittiham edirlər. Səba Tümər də kimdənsə götürüb. Siz nəticəyə baxın.
Müsahibələrinin birində Nanə xanıma Niyə ailə qurmursunuz? sualını veriblər. O isə cavabında : "Hər bir insan həyatda məsuliyyət daşımalıdır. Əgər sənə inanıb, güvənirlərsə məsuliyyətli olmalısan. O məsuliyyəti hiss edəcək insan qarşıma çıxarsa ailə quraram."- deyib
Onu da qeyd etmək lazımdır ki, tanınmış aparıcı ədəbiyyatı çox sevir. Xüsusən də şeiriyyatı. Xaraktercə də romantik xanımdır. Amma son zamanlar mütaliə üçün elə də vaxt ayıra bilmir. O eyni zamanda gözəl səsə də sahibdir. Hətta bir neçə mahnı da ifa edib.
Aparıcının efirdən getdiyi ilə bağlı zaman-zaman şaiələr yayılır. Nanə xanım özü bu haqqda deyib: “Sənətçilərə motivasiya verənləri Allah qorusun. Bizi həvəsdən salan o qədər nüanslar var ki... Bir səbəb yetər ki, efirdən gedim. Xoş sözlər eşitmək insanı ruhlandırır. Öz işimi görürəm, heç kimin işinə qarışmıram. Hər kəs bir-birinə dəstək olsa, hər şey yaxşı olar”
Tanınmış aparıcıya sənət yolunda uğurlar arzu edirik!
25 июн 2023
