Hər necə sərt olmaq ilən gəlsə də iqrarə daş,
Dərdimin mindən birin duysa, olar sədparə daş.
Laləüzlüm, qılmaq üçün könlümün dağın nihan,
Bağrıma daş basdım onca, etdi sinəm yarə daş.
Ta kim açdım çarəsiz eşqində xəlqə könlümü,
Hər yetən rişxənd edib, atdı məni-bimarə daş.
Yoxsa, ey büt, vardir İblisə timsalim, mənə,
Kə'beyi-kuyində atmaq fərz olub zəvvarə daş?
Dişlərin dür, ləblərin yaqut həm xalın həcər,
Gör nə qədr olmuş münasib sən kimi dildarə daş.
Cövr daşınla səadət qəsrin inşa eylərəm,
Durma ki, məqsudə yetməkçün gərək me'marə daş.
Baxma, Qədri, ağ salar eşq ağlamaqdan gözlərə,
Eşqsiz bir kimsədənsə yeydir olmaq qarə daş.
4 окт 2024