નવેમ્બર 2008ના પહેલા અઠવાડિયામાં જેમ-જેમ કેલેન્ડરમાં તારીખ આગળ વધી રહી હતી તેમ-તેમ સમીરનો અમેરિકામાં લીગલી રહેવાનો સમય પણ પૂરો થઈ રહ્યો હતો. ખાસ્સું વિચાર્યા બાદ અને પત્ની સાથે વાત કર્યા બાદ સમીરે બધી ગણતરી માંડી હતી. જો તે ઈન્ડિયા પાછો જાય તો તેના પર લગભગ પાંચેક લાખ રૂપિયાનું દેવું થઈ જાય તેમ હતું, અને તેને નોકરી પણ નવેસરથી શોધવી પડે તેમ હતી. તે બધી જફામારીમાં પડ્યા વિના જો સમીર અમેરિકામાં જ રહી જાય તો તે કંઈ નહીં તો મહિને 1200-1500 ડોલર તો કમાઈને ઘરે મોકલી શકે તેમ હતો. બધા જ પાસાને ધ્યાનમાં રાખતા સમીરે આખરે નક્કી કર્યું કે તે અમેરિકામાં જ રહેશે, ભલે ઈલીગલી તો ઈલીગલી. તેને ખબર હતી કે પોતે મોટી ભૂલ કરવા જઈ રહ્યો છે, પરંતુ તેની પાસે કોઈ હવે ઓપ્શન જ નહોતો બચ્યો. સમીર ટેક્સાસમાં કેટલાય એવા ગુજરાતીઓને મળી ચૂક્યો હતો કે તે જેઓ અમેરિકામાં વર્ષોથી ઈલીગલી રહેતા હતા. તેને એમ હતું કે જો આવા લોકો પણ અમેરિકામાં સર્વાઈવ થઈ શકતાં હોય તો પોતે તો તેમનાથી ઘણો વધારે ક્વૉલિફાઈડ વ્યક્તિ છે. સમીર પોતાનો નિર્ણય લઈ ચૂક્યો હતો ત્યારે હવે અમેરિકામાં તેની જિંદગીનું એક નવું જ પ્રકરણ શરૂ થવાની તૈયારીમાં હતું. જે રીતે સમીરે અમેરિકા જવાનું નક્કી કર્યું તે વખતે તેના નસીબે તેને જોરદાર સાથ આપ્યો હતો, તેવું જ કંઈક હવે તેની સાથે અમેરિકા પહોંચ્યાના એક મહિના બાદ થવા જઈ રહ્યું હતું.
જુઓ અમારી વેબસાઈટ: www.iamgujarat.com/
લેટેસ્ટ વિડીયો અને સિરીઝ માટે જુઓ: gujarati.timesxp.com/
30 июн 2023
