સફળતા અને ડોલરનો નશો જ એવો છે કે કોઈપણ તેમાં માદક બની જાય.. સમીર પણ જાણે વાઘ લોહી ચાખી ગયો હોય તેમ ડોલર અને સફળતાનો સ્વાદ ચાખી ચૂક્યો હતો. તેના નવા સ્ટોરમાં ધીરે-ધીરે કમાણી વધી રહી હતી, પરંતુ તેની સાથે જ તેના પાર્ટનર પ્રવીણ પટેલની ડિમાન્ડ પણ વધી રહી હતી. સમીરે પ્રવીણ પટેલ પાસેથી વ્યાજે લીધેલા ત્રણ લાખ ડોલરનું ના કોઈ એગ્રિમેન્ટ બન્યું હતું કે ના તો વ્યાજનો દર નક્કી થયો હતો. જોકે, પ્રવીણ પટેલની બધી ડિમાન્ડ પૂરી કરતાં પણ સમીરને મહિનાના સાત-આઠ હજાર ડોલર મળી જતા હતા, પરંતુ તેના માટે તેને મહેનત ખૂબ જ કરવી પડતી હતી. સ્ટોર પર માણસો ઓછા રાખવા પડે તે માટે સમીર ઘણું કામ તો જાતે જ કરતો હતો. નવો સ્ટોર સમીરની જબરજસ્ત મહેનત અને સમય માગી રહ્યો હતો, પરંતુ આવક-જાવકનો ચોક્કસ હિસાબ કરવાનો તેને ખાસ સમય નહોતો મળતો. તો બીજી તરફ પ્રવીણ પટેલ ગમે ત્યારે સમીરને ફોન કરીને અમુક ડોલર એક વ્યક્તિને તો અમુક ડોલર બીજી વ્યક્તિને ટ્રાન્સફર કરવાનું કહી દેતા હતા. સમીર તેમના કહેવા પર મહિનાના જે ચાર-પાંચ હજાર ડોલર અલગ-અલગ લોકોને ટ્રાન્સફર કરતો તેનો કોઈ હિસાબ પણ રાખવામાં નહોતો આવતો, તે બધું બસ પ્રવીણ પટેલના કહેવા પર તેને કરી દેવાનું હતું. આટલું ઓછું હોય તેમ પાછું સ્ટોરના પ્રોફિટમાં પ્રવીણ પટેલનો અડધોઅડધ ભાગ પણ રહેતો.
8 сен 2024
