Ҳурматли ватандошлар, энди менга айтингчи!
Ўзбекка президент хоинлик қилса, депутат хоинлик қилса, журналист хоинлик қилса, блогер хоинлик қилса, имом хоинлик қилса, ҳатто мухолифат раҳбари ҳам хоинлик қилса, ўзбек нима қилиши керак? Бу миллат кимга ишониши керак?
Бугун халқимиз ҳеч кимга ишонмай қўйишида ана шу хоинларнинг ҳам салмоқли улуши бор. Мухолифатдаги хоинларнинг улуши ҳукуматдаги хоинларнинг улушидан кам эмас.
Яъни бугунги абгор аҳволимизга президент Ислом Каримов қанчалик айбдор бўлса, мухолифат лидери Муҳаммад Солиҳ ҳам шунчалик айбдор.
Ўзбек миллатининг ўрнида бошқа бир миллат бўлганида бунча хиёнатдан кейин аллақачон йўқ бўлиб кетарди. Алҳамдулиллаҳ, бу халқ сабрли, матонатли. Йўқ бўлиб кетмаяпти. Йўқ бўлиб кетмасин ҳам!
Лекин халққа нисбатан хиёнатларнинг чегараси ҳам бўлиши керак.
Шу ўринда бир тарафдан золим Ислом Каримовни, иккинчи тарафдан эса қўштирноқ ичидаги “демократ” Муҳаммад Солиҳни идеал шахс сифатида йиллар давомида тасвирлаб келган журнапропагандистлар ҳақида ҳам гапирмоқчиман.
Золимни - одил, ўғрини - тўғри, хоинни эса - содиқ қилиб кўрсатишларнинг ҳам чегараси бўлиши керак!
Икки лагер журналистлари ҳам ўз маъбудлари ҳақида ёрқин ранглардаги тарғибот картиналари, сиёсий афсоналар тўқиб келишди. Бунинг натижасида кўпчилик Ислом Каримовга хизмат қилган расмий пропаганда қурбонига айланди. Менга ўхшаган озчилик эса Муҳаммад Солиҳни улуғлаган мухолиф пропаганда қурбони бўлди.
Ҳудди Ислом Каримовнинг матбуот раҳбарлари ва давлат журналистлари бутун миллатни президент ҳақидаги эртакларга ишонтириб келгани каби, Муҳаммад Солиҳнинг норасмий пиар-менежери бўлиб ишлайдиган Шуҳрат Бобожон ва бошқа шотир журналистлар ҳам йиллар давомида зулмга ечим излаган кишиларни лақиллатиб келишди.
Адашганларнинг икки лагери ҳам бир миллат, бир элдан иборат.
Миллатни алдаган журнапропагандистларнинг гуноҳи миллатга зулм қилган золимнинг ва хиёнат қилган хоиннинг гуноҳидан кам эмас.
Бугун Шавкат Мирзиёевни унда йўқ хислатлар билан мақтаётган журналисту блогерлар, имому ва адиблар! Бугун Муҳаммад Солиҳни унда йўқ хислатлар билан улуғлаётган рассому шоир, журналисту блогерлар!
Ўзбекни алдашни бас қилинглар!
Ҳақиқатни гапира ёки ёза олмасангизлар, ҳеч бўлмаса жим юринглар! Гуноҳга ботманглар!
Фурсатдан фойдаланиб, бугун ўзини сиёсий фаолиятга бағишламоқчи бўлиб юрган ватандошларимизга, айниқса, “Ҳақиқат ва тараққиёт” партияси фаолларига мурожаат қилмоқчи эдим.
Ҳеч қачон, ҳеч қандай золим ҳукуматнинг ваъдаларига ишонманглар! Ҳукумат сиздан фойдаланиб, кейин сизни улоқтириб юборишни режалаштиради холос. Муҳаммад Солиҳнинг қисмати бунга ёрқин мисолдир.
Ҳеч қачон бўлинманглар! Чунки ҳар қандай бўлиниш фақат золимларнинг фойдасига ишлайди. Бўлиниб кетган эски ўзбек мухолифатининг кейинги тақдиридан ўрнак олинглар!
Ҳеч қачон хоинлик қилманглар! Чунки ҳар қандай ёлғончи ва золим ҳукумат Чингизхоннинг ишини қилади - энг аввало унинг фойдасига ишлаган хоинларни жазолайди. Муҳаммад Солиҳнинг қисматидан ўрнак олинглар!
Ўзини президентман ёки мухолифатчиман деган ҳар кимнинг ҳам гапига ишонаверманглар! Гапираётган, айниқса, ваъда бераётган одам хоҳ президент бўлсин, хоҳ мухолифат лидери бўлсин, уларнинг сўзларини амаллари билан таққослаб кўринглар! Сўзлари амалларига тўғри келсагина, уларга ишонинглар!
Ишонувчан бўлманглар!
Ишонувчанлигим туфайли мен адашдим. Сизлар адашманглар!
Махсус кўрсатувларимнинг кейинги, 20 сонида, Муҳаммад Солиҳнинг айби, яъни мақтанчоқлиги, оғзида гап турмаслиги, эҳтиётсизлиги ва очиқча сотқинлиги туфайли қамоққа тушган кишиларнинг ОЛДИ-10 талигини эътиборингизга тақдим этаман, иншаллоҳ.
Олдиндан айтиб қўяй: бу рейтингда ўзимга ҳам ўрин берганман. Чунки ўзим ҳам унинг хатоси туфайли фош бўлганман, қўлга олинганман ва қамалганман.
Фактларни ўрганинг ва фикр қилинг!
Бобомурод Абдулла
2021 йил 17 май
28 сен 2024