Gen 300 mil fanm ak ti fi ki kouri kite lakay yo akoz zak vyolans gang kriminèl yo, daprè yon dènye rapò ONU-Fanm mete deyò. Deplase sa yo viktim vyolans seksyèl e yo pa jwenn sèvis sante nan sant yo.
Kondisyon kategori moun sa yo pa bon ditou e enstabilite politik ak sezon siklòn lan rann sitiyasyon an pi grav.
ONU-Fanm raple fanm ak ti fi yo reprezante 54 % nan 580 mil moun ki deplase yo an Ayiti. Selon ankèt la, nan 6 sant ki gen plis moun nan Kapital la pa gen kouran, pòt chanm ak twalèt yo pa fèmen akle e deplase yo toujou ap sibi menas gang ame yo.
Gen ijans pou otorite yo amelyore kondisyon yo nan sant yo ki anba risk bal mawon, daprè estrikti ONU an ki denonse zak vyòl fanm ak ti fi yo viktim patikilyèman nan sant yo .
Se sèlman 2% nan fanm yo ki jwe yon wòl lidè nan jesyon sant yo. Yon lòt kote, gen 88 % nan fanm yo ki pa gen okenn resous nan kan yo e gen 10 % nan yo ki oblije fè pwostitisyon omwen yon fwa pou ka reponn ak bezwen yo. 70 % nan fanm yo deklare yo sibi mantalman gwo chòk akoz zak vyolans yo.
ONU-fanm ankouraje òganizasyon fanm yo kontinye sipòte deplase yo sitou nan kad pwojè Fon pou fanm, lapè ak aksyon imanitè.
14 окт 2024
