Mafunzo ya Ufundi Magari yanayotolewa katika Vyuo vya VETA . 

Matumizi ya magari kama vyombo vya usafiri yameenea ulimwenguni kote. Pamoja na uwepo wa njia zingine za usafiri, magari hutumika sana kwa usafiri wa watu binafsi; usafiri wa umma,yaani abiria na hata kusafirisha bidhaa mbalimbali kutoka sehemu moja hadi nyingine. Ni dhahiri kuwa matumizi ya magari ambayo yanazidi kuongezeka kila siku yanaleta mchango mkubwa sana katika maendeleo na kurahisisha maisha ya watu wengi. Magari haya pia yamezalisha ajira kwa watu wengi na hasa vijana ambao hutegemea kazi ya udereva katika kuendesha maisha yao na ya familia zao.
Kukua na kupanuka kwa matumizi ya magari kunazaa hitaji kubwa la mafundi wa magari hayo, kwani kama ilivyo kwa vyombo vingine vya usafiri, magari hayo hupata hitilafu na kuhitaji matengenezo au marekebisho.
Uhitaji wa matengenezo ya magari umeibua fursa ya ajira kwa vijana wengi nchini. Mathalani, katika sekta isiyo rasmi, vijana wengi wamejiajiri kufanya shughuli za ufundi magari katika maeneo mbalimbali, hasa mijini na vituo mbalimbali kwenye barabara kuu. Vivyo hivyo, taasisi na makampuni mbalimbali, hasa yanayoshughulika na usafiri na usafirishaji yameajiri vijana wengi kwa ajili ya matengenezo ya magari.
Hata hivyo, kumekuwa na changamoto kubwa ya uwepo wa mafundi magari wasiokuwa na ujuzi wa kufanya matengenezo ya magari kwa uthabiti, hali inayosababisha malalamiko mengi kutoka kwa wamiliki wa vyombo hivyo vya usafiri. Vijana wasiokuwa na ujuzi mara nyingi hufanya uharibifu zaidi kwenye magari wanayopewa kwa ajili ya kufanya matengenezo na kusababisha hasara kwa wateja wao.
Kwa kutambua changamoto hiyo, VETA imeendelea kutoa mafunzo bora ya ufundi magari ili kuongeza idadi ya vijana wenye ujuzi stahiki wa kuendesha shughuli za utengenezaji magari. Kwa kutambua mahitaji makubwa ya ujuzi wa ufundi wa magari, Asilimia kubwa ya vyuo vya VETA hutoa kozi hiyo.