నీవేకా చెప్పజూప నీవె నీవెకా..
🌹🌹-----------------🌹🌹
తాళ్లపాక అన్నమాచార్య ఆధ్యాత్మ సంకీర్తన
రాగము: లలిత
రేకు: 0042-01 సంపుటము: 1-255
స్వరకర్త ః-- శ్రీ సాలూరి వాసూ రావు గారు
రాగము ః-- కళ్యాణి
గానము ః- శ్రీ వవన్ చరణ్
🌹🌹 సంకీర్తన 🌹🌹
॥పల్లవి॥
నీవేకా చెప్పఁజూప నీవె నీవెకా
శ్రీ విభుప్రతినిధివి సేన మొదలారి
॥చ1॥
నీవేకా కట్టెదుర నిలుచుండి హరివద్ద
దేవతలఁ గనిపించే దేవుఁడవు
యేవంక విచ్చేసినాను యిందిరాపతికి నిజ-
సేవకుఁడవు నీవెకా సేనమొదలారి
॥చ2॥
పసిఁడి బద్దలవారు పదిగోట్లు గొలువ
దెసలఁ బంపులువంపే దీరుఁడవు
వసముగా ముజ్జగాలవారి నిందరిని నీ-
సిసువులఁగా నేలిన సేనమొదలారి
॥చ3॥
దొరలైన యసురుల తుత్తుమురు సేసి జగ-
మిరవుగా నేలితి వేకరాజ్యమై
పరగుసూత్రవతీ పతివై వేంకటవిభు-
సిరుల పెన్నిధి నీవే సేనమొదలారి
🌺🍃 ----------🍃🌺
అన్నమయ్య అక్షరవేదం సంపుటి -- 503
( నీవేకా చెప్పజూప నీవె నీవెకా )
🌺🍃 ----------- 🍃🌺
ఓం నమో వేంకటేశాయ. 🙏
అన్నమయ్య అక్షర వేదం ..సంపుటి -- 503 కి శుభ స్వాగతం ..🙏
ప్రార్థన ః--🌹🙏
నారాయణు సేనాపతి
దారులనన్నిటిని జూడ దానరుదెంచెన్,
వారే విష్వక్సేనులు,
చేరికొలువ నతడె జయముశివముల నొసగున్ !
🌹🙏🌹
✍️ --స్వీయపద్యము ( కందము )
🌹🌹
అదిగో వారే విష్వక్సేనులు !
వారే శ్రీవారి ముఖ్య సేనాధిపతి ! 🙏
వీరే బ్రహ్మోత్సవ ఏర్పాట్లు ఎట్లున్నవో పరిశీలించుటకు , అంకురార్పణ దినమున , మునుముందుగా తానే తిరుమల నాలుగు మాడవీధులలో విహరించెదరు .🙏
వీరే విఘ్న నాశకులు , జయ ,శుభ ప్రదాతయును .
వీరికి తొలిపూజచేసి , మ్రొక్కి ధన్యులమౌదాము !🙏
🌺🍃 -----------🍃🌺
మున్నుడి ః-- 🌹👇
యస్య ద్విరద వక్త్రాద్యాః పారిషద్యా పరశ్శతం ,
విఘ్నం నిఘ్నంతి సతతం విష్వక్సేనం తమాశ్రయే !
🙏🙏
విష్వక్సేనులు నిత్య సూరలు , నారాయణుని సర్వ సైన్యాధి పతి.
ఆ పరమాత్ముని నిత్య విభూతి, లీలా విభూతి కార్యములను పర్యవేక్షించు సేనాధి పతి, వేత్రధరులు ! సేన ముదల్వర్, ( ఇదియే సేనమొదలారి గా అన్నమయ్య కీర్తించుచున్నారు ) 🙏
‘సూత్రవతి‘ విష్వక్సేనుల వారి దివ్యమహిషి.
భగవానుడి శేష ప్రసాదాన్ని ప్రథమంగా విష్వక్సేనులవారే స్వీకరిస్తారు.🙏
వైష్ణవంలో ఏ శుభకార్యమైనా ,దైవకార్యమైనా విష్వక్సేనుని ఆరాధనతోనే మొదలు.🙏
బ్రహ్మోత్సవాలకు ఒక రోజు ముందే తిరుమలలో విష్వక్సేనుల వారు తామే నాలుగు మాడవీధులందూ ఊరేగి పర్యవేక్షిస్తారు , అన్ని ఏర్పాట్లనూ ! 🙏
వారినే సేనమొదలారి అని కీర్తుస్తున్నారు అన్నమయ్య !🙏
మరి ఈ చక్కని కీర్తన అర్థము తెలుసుకుని పాడుకుందామా !👇
🌺🍃 ----------- 🍃🌺
🌹🌹
నువ్వేకదా ! మేము చెప్పటానికీ చూపటానికీ నువ్వు మాత్రమే కదా ,
ఆ శ్రీ మహాలక్ష్మీ పతియైన శ్రీమన్నారాయణునికి , అతి ముఖ్యమైన వాడవు ,ఆతని సర్వసైన్యాధ్యక్షుడవు ! 🙏
🌹🌹
ఆ దేవతలెవ్వరెవ్వరు శ్రీహరి దర్శనార్ధులై వచ్చినా వారికి , నువ్వే కదా కళ్ళనెదుటనే ముందుగా నిలబడుచు కనిపించేది ఆ శ్రీహరి సన్నిధి వద్ద .🙏
ఎవరెవరు ఏ దారుల వెంబడి వచ్చినా , ఆ లక్ష్మీ వల్లభునకు , నిజమైన సేవకుడవనగా ప్రప్రధముగా నీవే ఓ విష్వక్సేనా ! ( సేనముదళ్వర్ )🙏
🌹🌹
బంగారు బెత్తములను చేతపుచ్చుకుని ఉన్న గజముఖులైన సేనాగణములు వేవేలుగా గలిగి ,
వారికి నీ ఆజ్ఞలను జారీ చేస్తూ అన్ని దిక్కులకూ పంపుచు విష్ణువు యొక్క విజయము సదా పరగునట్లు చేయుచున్నావు .🙏
ముల్లోకముల వారిని నీవే వశపరచుకుని , వారినందరినీ నీ సంతానమువలె భావించి ,కాపాడుకొనుచున్నావు వారికందరికీ ప్రభువువై ఓ విష్వక్సేనా ! ( సేనమొదలారి )🙏
🌹🌹
రాక్షసరాజులైన వారినెందరినో తునాతునకలుగా భంజించి సంహరించిన పరాక్రమవంతుడవు !🙏
ఈ జగమునంతా ఏకము చేసి , ఒకే రాజ్యముగా ఏలుచున్నవాడవు .
సూత్రవతికి పతివి ,
అంతటా వ్యాపించి ,ఇదిగో శ్రీ వేంకటేశ్వరుని సంపదలను గాచు పెద్దభాండాగారమువై , నీవే వెలసి ఉన్నావు ఓ విష్వక్సేనా ఓ సేనమొదలారి , నీకు మా తొలిపూజలు ! 🙏
🌹🙏🌹
ఓమ్ శ్రీ అలమేలుమంగా సమేత శ్రీ వేంకటేశ్వర స్వామినే నమః !🙏
తాత్పర్య సహిత దృశ్య మాలికగా మీకు అందించాలన్న నా చిన్న ప్రయత్నమును ఆశీర్వదిస్తారని ఆశిస్తూ..🙏
దోషములున్న...మన్నించమని విన్నపము... 🙏
✍️ -- వేణుగోపాల్ యెల్లేపెద్ది 🙏
#NEEVEKA #CHEPPACHOOPA #నీవేకాచెప్పజూప #salurivasurao #pavancharan #BRAHMOTSAVAM #brahmotsavalu #brahmotsav #annamacharya #annamacharyakeerthanalu #annamayya #annamayyaaksharavedam #annamayyakeerthanalu #annamayyasongs
14 окт 2024