Leo tunasoma kitabu cha Yohana sura ya pili, na tunaenda kufanya maombi ya kujilinda na watu. Tunahitaji kuwa na watu kwenye maisha yetu, kwa sababu Mungu anawatumia watu katika kutubariki, na kutusaidia kufikia hatima zetu.
Hata hivyo, shetani pia anaweza kutumia watu wake, kwa malengo ya kutuharibia maisha na kutuharibia hatima zetu. Kwa bahati mbaya si jambo rahisi kutambua watu wabaya wanaojitokeza kwenye maisha yetu. Mara nyingi tunapopatwa na mabaya, ndipo tunatambua kuwa hatukuwa na wa watu sahihi kwenye maisha.
Habari njema ni kwamba, tunayo nafasi ya kwenda mbele za Mungu, na kumuomba atupe ulinzi, ili pale ambapo watu wabaya wanataka kutudhuru, au kutuharibia maisha na hatima zetu, Mungu anaweza kuingilia kati na kutuokoa. Lakini pia, Mungu anao uwezo wa kutufungua macho ya rohoni, ili kutusaidia kutambua hatari na kuziepuka, ili tuishi maisha ya amani na ushindi.
Katika maombi ya leo, tunaenda kumsihi Mungu atulinde na watu wabaya wanaotumika na shetani kutukwamisha na kutuharibia maisha. Ninaamini YESU atafanya jambo kwenye maisha yako kupitia maombi ya leo. Ninaamini utaenda kuuona mkono wa BWANA YESU ukikuvusha na kukusaidia katika maombi ya siku ya leo. Kwa hiyo hakikisha unashiriki kikamilifu kuanzia kwenye neno, hadi kwenye maombi. Omba kwa kumaanisha kushinda, na omba kwa kumaanisha kuvuka, na utauona wokovu wa BWANA.
Mungu akubariki sana, na akupe ushindi mkuu kwa utukufu wa jina la YESU. Amen!
Isaac Javan
+255 745 76 45 72
20 сен 2024
