35. Finnmark - Pasvikdalen/Salmijärvi
Opptak frå dokumentasjon, Enare i Finland 1980.
Martha Eide og Kristian Portti dansar Rakuunapolkka I. Dansarane trallar til dansinga.
Om dansen
I Finnmark er det få spor etter bygdedanstradisjonar, og vi har ikkje bygdedansopptak som kan eigna seg for denne videoen. Difor har vi i staden valt å ta med ein dans av ein heilt annan type, ein kort runddansslekta pardans som viser kontakten over grensa frå Finnmark til Finland og Russland. Det er eit feltopptak som Arne Wikan og Egil Bakka gjorde i 1980 heime hos Kristian Portti i Enare.
Ei lita bygd i Petsamo-området som heiter Salmijärvi hadde god kontakt med Pasvikdalen på 1920-talet. Bygda låg under Russland frå 1921 til 1926 og under Finland frå 1926 til 1944. Sidan vart ho russisk att. Då det vart samla dans i Finnmark i 1980-åra kunne nokre eldre dansarar i Pasvik dansar dei hadde lært i Salmijärvi, bl.a. Rakuunapolkka. Dansenamnet er på finsk og betyr Dragonerpolka. Ein dragon er ein ryttarsoldat eller kavallerist. Begge dansarane her vaks opp i Salmijärvi og hadde ungdomsåra sine der tidlig på 1920-talet. Dei viste to variantar av dansen, og her har vi tatt med den første (Bakka &Wikan 1996:67f, 91f).
Om musikken
Her vert det tralla til dansen, rett og slett fordi det ikkje fanst nokon spelemann til stades under opptaket.
1 ноя 2022
