2000 yilda ushbu manzil saxovat pesha insonlar bosh bo‘lib, hashar yo‘li bilan, milliy anʼanalarga xos va mos ravishda qabr ustiga maqbara qaytadan tiklangan. G‘ishtlari esa Xorazm viloyatidan keltirilib, 2 oyda maqbara qad ko‘targan. Rivoyat qilinishicha, bu qabrni avvalgi ko‘rinishi g‘ishtlarini bobomiz Zahiriddin Muhammad Bobur Samarqand shahridan keltirgan deyiladi.
Qurilish taʼmirlash ishlari jarayonida, qabr atrofidan topilgan: 9-10 asrga tegishli bo‘lgan g‘ishtlar, tegirmonning charx toshi, azalda azizlar mozoriga qo‘yilgan yassi qayroq toshlar va boshqa topilmalar bu yerda azaldan maqbara bo‘lganidan va ushbu zot tariqat ahliga xosligidan darak beradi. Ushbu joydan topilgan charxtosh, Shayxning oliy maqomiga yetishganlik darajasini bildiradi, ammo qaysi shayx va qaysi zamonda yashaganligi to‘g‘risida aniq maʼlumot yo‘q.
Jirjis (a.s) tarixiy shaxs. Falastinda yashab o‘tgan, xam xristian xam islom adabiyotlarda, jumladan Tarixi tabarida ham nomlari zikr qilingan, taqvodor va solix inson sifatida talqin etiladi. Musulmonlarda ushbu zot Xizr va Ilyos nomlari bilan birga keladi, Jirjis a.s ning asl qabrlari Mosul shaxrida ekanligi, ammo 2014 yilda maqbara batamom vayronaga aylangan deyiladi. Payg‘ambarlar qissasi kitobida Jirjis a.s qissalari bor. U zot asli falastinlik bo‘lib, Shomga kelgan deyiladi.
Bu haqida Nosiruddin Rabg‘uziyning “Qissai Rabg‘uziy” kitobida “Qissai Yalavoch alayhi salom” rivoyati keltirilgan: Rivoyatga ko‘ra: Savdogar qiyofasida Jirjis a.s Iroqning Mosul podshosi huzuriga kelib, uni iymonga chaqirib, daʼvat etadi. buddaparastlikdan qaytishga chaqiradi. Haq so‘zlari evaziga podshodan zulm ko‘radi. U o‘limga mahkum etiladi. Ammo bir necha bor o‘ldirilmasin, Allohning irodasi bilan qayta-qayta tiriladi. Uning daʼvatlari besamara qolmaydi, bu voqeaga sababchi bo‘lgan mosullik 100 000 erkak va 30 000 ayol buddaparastlikdan voz kechib, iymon keltiradi deyiladi.
30 сен 2024
