Sağlığında hamı səsindən danışsa da, özü bu dünyadan köçəndən sonra ortaya böyük bir qalmaqal çıxdı... O isə səsini çərpələng edib kölgəsində bir neçə addımlıq yol gedə bildi. Biri var idi, 53 bahara bir dünya oxuyan Vidadi Bərdəli...
Vidadi Vəliyev 1959-ci ildə Bərdədə dünyaya göz açıb. 1981-cu ildə Aygün xanımla ailə həyatı qurub. Onun ilk ailəsindən 4 övladı var. Özü isə verilişlərindən birində 3 oğlu, 3 qızının olduğunu deyir.
Vidadi Bərdəli barədə söz düşdükdə təəssüf ki, onun səsi, ifaları, mahnıları deyil, daha çox qalmaqallı həyatı, qadınları və övladlarının adı hallanır. Çalışacam bu verilişdə bacardığım qədər Vidadinin sənətinə işıq tutaq.
Təəssüf ki, səsi yerə göyə sığmayan bir insanın sənəti haqqında bir səhifəyə sığacaq qədər məlumat toplaya bilmədim. Sağlığında zənguləsinin qarşısına çıxmağa cəsarəti çatan bir müğənninin olmadığı Vidadi Bərdəlinin bu gün sadə bir vikipediya səhifəsi belə yoxdur. Biz bu gün internet resurslarında Vidadi Bərdəli kimdir yazsaq, qarşımıza müğənninin bir neçə ifası, toyda səsləndirdiyi muğam və ailəsinin qalmaqallı açıqlamaları çıxır.
Vidadini xalq sevirdi və bu sevgini o nə puluyla, nə də başqa birinin hesabına qazanmışdı. Ram edilməz istedadı, son dərəcə yüksək səs tembri, oxuduğu muğamlar qısa vaxt ərzində bərdəli bir gənci Vidadi Bərdəli etmişdi. Onun tərzi, səs oktavası və digər peşəkar kriteriyalar barədə mütəxəssislər danışa bilər - təəssüf ki, əfsanəvi səviyyədə səsi olan bir insan haqqında demək olar ki, peşəkarlar danışmadılar və bu susqunluq hələ də davam edir. Haqqında peşəkar platformalarda heç bir mənbə tapa bilmirik. Onun haqqında yalnız Xalq danışdı, həm də bir ağızdan. Bu gün onun səsi, musiqisi haqqında peşəkar rəylərlə qarşılaşa bilmədiyimiz üçün yalnız bunu deyə bilirik; Viddi Bərdəlinin nəfəsi yetdiyi qədər də səsi var idi. Sinəsinin ən xırda nəfəsini musiqiyə çevirə bilirdi:
Vidadi Bərdəli həm də qarmonu mahir ifa edirdi. Həmkarı məşhur qarmon ifaçısı Zahid Məmmədzadənin xatirə gecəsindəki qarmon ifası da onun musiqi istedadına bir başqa səmtdən işıq tutur
Vidadi Bərdəlinin bir neçə ailəsi olması ilə bağlı məlumatlar mediada dəfələrlə səslənib. Bizə isə həyat yoldaşı Aygün xanımdan sonra adı ən çox hallanan digər yoldaşı Nahidə xanımın açıqlamaları tanışdır.
Nahidə xanımın qalmaqallı açıqlamaları və qızı Aytac Bərdəlinin ona cavabları bir müddət əvvəl Vidadi Bərdəli adını mediaya daşıdı. Nahidə xanım deyirdi ki, Vidadi Bərdəli qızı Aytac Bərdəlinin müğənni olmasını istəməyib. O, buna əsas kimi özünün müğənni olduğunu və bu peşənin çətin sahə olması ilə əlaqələndirib. Ölümündən əvvəl isə qızı ilə küsülü olub. Vidadinin oğlu Vüqarı isə 12 yaşından özünün saxladığını deyir. Qadının verdiyi informasiyalar arasında ən çox diqqətçəkəni isə Vidadi Bərdəlinin ölüm anı ilə bağlıdır. Nahidə xanım iddia edir ki, müğənni başqa bir adamın evində can verib. Onun iddiasına görə onun daha bir gizli həyatı olub. Hətta həyatının son 5 ilini həyat yoldaşı - yəni Aygün xanımla küsülü olub.
Lakin müğənninin həyat yoldaşı Aygün xanım Nahidə xanımı təsadüfi qadın kimi təqdim edir, Vidadi Bərdəlinin ölümündə birbaşa onu günahlandırır. Nahidə xanım həmin açıqlamada həmçinin onu da qeyd edirdi ki, onun Vidadi Bərdəlidən olan oğlu Tuncayın Aytacla münasibətinin olmamasına əsas səbəb bir telefon zəngi olub. Hansı ki, həmin vaxt Tuncay ögey bacısı Aytacla telefonda danışdıqdan sonra Aytacın telefonunu yad bir oğlan götürüb. Aytac isə onu yalançılıqda ittiham edib, onun bütün dediklərinin əsassız olduğunu bildirib.
2018-ci ildə Vidadi Bərdəlinin adı daha bir dəfə mətbuata sıçradı. Bu dəfə isə onun Nahidə xanımla evliliyindən doğulmuş oğlu Tuncay Vəliyevin narkotik vasitə ilə həbs olunması xəbəri yayıldı. Xəbərdə qeyd olunurdu ki, bu artıq Tuncayın ikinci məhkumluğudur və o, əvvəllər sağlamlığa qəsdən zərərvurma maddəsi ilə bir dəfə məhkumluq həyatı yaşayb.
Bütün bu qalmaqallı hadisələr Vidadi Bərdəlinin ölümündən 6 il sonra baş verdi. Qayıdaq 2012-ci ilin noyabrına. Mütəmadi qəbul etdiyi içki, gərgin məclislər, yuxusuz gecələr, ailə, qadın və bəlkə də bizim bilmədiyimiz səbəblər ömrünün gözəl çağında onu anidən yaxaladı. Müğənni öncə Gömrük Hospitalına yerləşdirilir. Ardınca onu evinə gətirirlər. Noyabrın 30-da isə Vidadinin qəfil ölümü ilə bağlı xəbər yayılır. Onun ölüm səbəbləri kimi bir neçə variant səsləndirildi. Saytlar öncə Heptatit C, beyinə qansızması, spirtli içki və başqa səbəblərlə bağlı xəbərlər tirajladı. Səbəbin nə olmasından asıllı olmayaraq, o gündən etibarən Vidadi Bərdəlinin səsi əbədiyyən bu dünyadan çəkildi.
İlahi məqamlarda var-gəl edən insanlara atılan bütün böhtanlar, hətta onların yaşamış olduğu xoşagəlməz olaylar da, müqəddəs bir diqtəylə onların imzasına, simasına hopa bilmir. Səsi kimi üzü də su tək duru xatırlanır Vidadi Bərdəlinin... Ümid edək ki, onun güvəndiyi el necə ki, əsrlər əvvəl yazılan bayatıları, ağıları sinəsində bəsləyib bu günə çatdırıblar, Vidadi Bərdəlini də eləcə qoruyacaqlar. Yerin cənnət olsun, sənətkar!
1 окт 2024