Contributu de sos cantadores a tenore e a cuncordu de sa Sardigna a sa lota contra a su coronavirus: “Su patriotu sardu contra a su coronavirus”.
Sos versos de s'Innu Sardu de Frantziscu Innàtziu Mannu "Su patriotu sardu a sos feudatàrios", connotu fintzas comente "Barones sa tirannia" sunt istados cambiados e adatados dae Bustianu Pilosu, pro pedire a sos sardos unidade e impinnu in custos tempos de isolamentu, pro pòdere bìnchere sa gherra contra a s'epidemia de su covid-19.
Bustianu Pilosu at cumbidadu sete cantadores a cantare una grobe per òmine;
Cada cantadore, in rispetu de sas distàntzias sotziales, at registradu sa cantada in domo sua cun su smartphone e gai etotu at fatu su sonadore de launeddas.
Poscas, cantadas e sonadas sunt istadas ligadas a pare in unu file àudio.
Mancari cun totu sas dificultades e sas diferentes àimas impitadas pro registrare, b'at essidu una cosa de remeju.
Sa produtzione Karel at postu sas màzines, leadas dae su film "A bolu".
Sos cantadores sunt:
Franco Davoli (Tenore Supramonte de Orgosolo)
Andria Zara (Cuncordu de Bolotana)
Antonimaria Cubadda (Cuntrattu de Seneghe)
Gianmarco Serra (Tenore Santa Maria de Otzana)
Luciano Asole (Tenore Su Riscattu de Lodè)
Angelo Soma (Tenore S’Arvorinu de Orune)
Antoni Migheli (Cuncordu de su Rosariu de Santu Lussurgiu)
sa launeddas sunt sonadas dae
Giulio Pala (de Torpè - Cuncòrdia a launeddas)
Su montàgiu àudio est de Marco Lutzu.
Sas màzines, de Luca Melis, leadas dae su film A BOLU, sunt montadas dae su regista Davide Melis.
Sas màzines de custu vìdeo sunt amparadas dae su copyright
non si podent impreare in peruna manera, ne in parte ne in totu.
@karel 2019
- Il brano è stato realizzato montando le singole parti dei cantori e delle launeddas, registrate da ciascuno in casa propria tramite lo smartphone.
Il montaggio audio è di Marco Lutzu.
Le immagini, di Luca Melis, sono tratte dal film A BOLU e montate dal regista Davide Melis.
Le immagini di questo video sono coperte da copyright, è vietato il loro utilizzo, riproduzione o uso, parziale o totale. @karel 2019 - A BOLU - www.abolu.eu/
Su patriotu sardu contra a su coronavirus
(grobes cambiadas e adatadas dae Bustianu Pilosu)
1 - Franco Davoli (Orgosolo - Tenore Supramonte)
Procurade ‘e moderare
barones sa tirannia
ca si no pro vida mia
torrades a pe’ in terra
declarada est già sa gherra
contra a custa pestilèntzia
tenide o sardos passèntzia
pro poter cras afestare
Barones sa tirannia
procurade ‘e moderare
2 - Andrea Zara (Cuncordu de Bolotana)
Mirade chi est atzendende
contra de bois su fogu
mirade chi no est giogu
chi sa cosa andat a veras
dies e notes interas
istade in domo a corrale
zente cussizada male
iscurtade sa ‘oghe mia
Procurade ‘e moderare
barones sa tirannia
3 - Antonimaria Cubadda (Cuntrattu de Seneghe)
Cantu diferentemente
su dutore passat s’ora
in antis de s’aurora
issu nch’est in s’ispidale
pro cumbatare su male
che soldadu in sa trincea
gherrat, lotat e pelea’
pro cantu at a aguantare
Barones sa tirannia
procurade ‘e moderare
4 - Gian Marco Serra (Otzana - Tenore Santa Maria)
Intantu in s’ìsula nostra
numerosa zoventude
de talentu e de virtude
in intro ‘e domo si nd’istat
non matanat e nen pistat
ma rispetat su decretu
e dat s’esèmpiu in s’isetu
ch’acabet sa pandemia
Procurade ‘e moderare
barones sa tirannia
5 - Luciano Asole (Lodè - Tenore Su Riscattu)
O sardu chi as connotu
milli e prus tribulatziones
cumprende-las sas rejones
chi cussizant t’ista in domo
ca si non lu faghes como
pustis at a esser a tardu
non cummitas cuss’azardu
proteze sa familìa
Procurade ‘e moderare
barones sa tirannia
6 - Angelo Soma (Orune - Tenore s'Arvorinu)
Custa pòpulos est s’ora
d’estirpare sos abusos
a terra sos malos usos
a terra su dispotismu
gherra gherra a s’egoismu
gherra contr’a su contàgiu
sardos mustrade coràgiu
firmade s’epidemia
Procurade ‘e moderare
barones sa tirannia
7 - Antonio Migheli (Santu Lussurzu - Cuncordu de su Rosàriu)
Si no carchi die a mossu
bos nde segades su didu
como ch’est su filu ordidu
a bois tocat a tèssere
mintzi chi poi det èssere
tardu s’arrepentimentu
cando si tenet su ‘entu
est pretzisu bentulare
Barones sa tirannia
procurade ‘e moderare
Launeddas: Giulio Pala (sonadore de Torpè - Cuncòrdia a launeddas)
15 апр 2020