#GamiUrumaya #NaturaloilMake
වසර සිය ගණනකට එපිට සිට ආහාර රස ගැන්වීම සඳහාත් විවිධ රෝගාබාධ සදහාත් භාවිතයට ගන්නා ලද මී ගස සම්බන්ධයෙන් යළි යළිත් කතාවතක් ඇති වන්නේ එහි ඇති බොහෝ ගුණ දායක කාරණා හේතුවෙනි.
වව්ලන් විසින් කා දමන ලද මී ඇට අලුයම් කාලයේ අහුලා, වියළා ගැනීමෙන් පසු මී තෙල් හිඳීමේ කටයුතු ගම්මානයේ වැඩිහිටි කාන්තාවන් විසින් සිදු කරයි . මී තෙල් සිඳීම පහසු කාර්යයක් නොවේ.
පැරණි ක්‍රමයට මී ඇට වංගෙඩියේ කොටා තම්බා ගැනීමෙන් අනතුරුව ඒ සඳහාම සැකසු තැම්බීමේ ක්‍රියාවලියකින් පසු මී තිලේ හිඳිනු ලබයි.
ලී ආධාරක ආශ්‍රයෙන් සැකසෙන මෙම පැස තුළින් තෙල් නිස්සාරනය කර ගැනීම සිදුකරනු ලබයි. ව්‍යාංජන සඳහා මීතෙල් යොදා ගැනීම, හිසේ ගෑම, රෝගාබාධ රැසක් සඳහා යොදා ගැනීම ආදී කරැණු සම්බන්ධයෙන් මී තෙල් පැරැන්නන් භාවිතයට ගෙන ඇත.
මී තෙල් හිඳීම තුළින් ඔවුන්ගේ ගෘහ ආශ්‍රිත අවශ්‍යතා සඳහා පමණක් නොව මී තෙල් විකුණා ආදායමක් ලබාගැනීම ද කරති. මී තෙල් හිඳීමෙන් අනතුරුව ඉවත් වන ද්‍රව්‍ය ‘මී මුරු ‘ලෙස හඳුන්වන අතර, ඒවා අත් පා වේදනාවන් සඳහා තැවීමට භාවිත කරති.
Mabhuca යන උද්භිත විද්‍යාත්මක නාමයෙන් හැඳින්වෙන මි ගසේ ශාක විශේෂ 7ක් ලෝකය පුරා දැකිය හැකි වන්නේය. මෙම විශේෂ 7 න් 4ක්ම අප රටට ආවේණික ශාක වීම ද අප ලද භාග්‍යයකි. මී ගස ඍජු කඳ සහිතව අඩි 50 ක් 60 ක් ක් පමණ උසට වර්ධනය වන ශාකයකි. මී මල් වල ඇත්තේ කහපාටට හුරු සුදුපාටකි. කොළ පාටට හුරු කහපාට ඵලවල ඇතුළේ දිලිසෙන සුලු බීජ දක්නට ලැබෙයි. මෙම මීමල් හටගන්නේ ජූනි, ජූලි මාසවලය. අප රටේ හමුවන පරිසර හිතකාමී ශාකය මී ගස බව ගැමියෝ කියා සිටිති.
මල් පිපෙන කාලෙට, ගෙඩි හැදෙන කාලෙට වවුලන්ට රජමඟුල්. වවුලන් මී ගස් වලම තමයි වාසය කරන්නෙත්. මී ගෙඩි හා මල් කන වවුලන් කුඹුරු පුරා වසුරු දානවා.
එසේම මී ගසේ පත්‍ර කුඹුරට වැටුණම ඒ පත්‍රත් කුඹුරට අගනාම පොහොරක් ලබාදෙන බව ද ගැමියෝ කියා සිටිති.
කිසිදු යාන්ත්‍රික ක්‍රියාවලියකින් තොරව සිදුවන මෙම ක්‍රියාවේ දී වැඩිහිටි කාන්තාවක මුලිකත්වය ගෙන කටයුතු කරනු ලබයි.
මෙහි දි මඳ රස්නෙන් යුතු මී තෙල් වෙනම භාජනයකට එක්වන අතර, තෙල් නිස්සාරණය කිරිමෙන් අනතුරැව ඉතිරිවන මී ඇට වල රොඩු කොටස් ‘මී මුරුවට ‘ලෙස හඳුන්වනු ලබයි.
කලක් භාවිතයට ගත හැකි වන ලෙස මේවා කල් තබාගන්නා අතර හේනේ කුඹුරේ වැඩ කටයුතු සිදුකරනු ලබන පිරිමි පාර්ශවයන්ගේ ඇතිවන විවිධ වේදනාවන් සඳහාත් වාත රෝග සඳහාත් තැවීම් කටයුතු සඳහා මෙම මී මුරුවට භාවිතයට ගනු ලබයි.
17 сен 2024
