Zoy, jy was die gelukkige luiperdmannetjie wat kampe om die beurt gedeel het met twee van Shayamanzi se bekendste luiperdwyfies: Zaza en Ziana. Hulle was twee sussies wat lank saam in een kamp gebly het, maar ons moes hulle later skei omdat hulle letterlik soos katte baklei het as jy met jou uitlokkende stappie op en af teen hulle kampdraad stap. Jy het as 'n jong luiperd op Shayamanzi aangekom en dadelik ogies gemaak vir die twee ouer sussies in die kamp langsaan. Jy was jonk en vol bravade om by die sussies uit te kom - eintlik voor op die wa - en jy wou sommer bo-oor die elektriese drade spring. Nadat ons jou uiteindelik deurgelaat het na die een sussie toe, het jy vinnig agtergekom dat jy die sussies nie sonder handskoene moet aanpak nie. 'n Paar vinnige kappe en krappe het jou stert tussen die bene laat lê en wonde lek. Zaza se romantiese geheim was om met jou te dans, lank te dans tot laatnag. Jy was naderhand so moeg dat jy tot op 'n hoë klip geklim het om net 'n ruskans te kry met 'n dansende Zaza al op die klippe. Ziana was die kwaai sussie en ek wonder vandag nog of dit nie haar skerp naels en 'n vinnige kaphou was wat jou 'n bietjie oogskade gegee het nie. Ziana en jy het nie gras onder julle voete laat groei nie, geen takke te hoog gevind om in rond te klouter nie, geen nagte te koud om deurnag mekaar te omarm en te droom van luiperdkindertjies nie. Zoy, selfs in die luiperdwêreld waar ses vroutjies vir een mannetjie algemeen is, kon jy nooit tussen die twee mooi sussies kies nie. Jy was doodgewoon te lief vir albei... - Die Zoy liedjie is gesing deur Emo Adams, geskryf deur Machiel Roets en vervaardig deur Leopard.tv/Shayamanzi Game (Pty) Ltd.
Nog liedjies beskikbaar op Leopard.tv - bit.ly/2fBxhPh
18 сен 2024
