АЛТАЙ АСҚАН АҚТАҢГЕР
26 қазан күні Үржар аудандық мәдениет үйінде Ақын, ұстаз, атбегі, Моңғолия және Қазақстан Жазушылар одағының мүшесі Кәп Құмарұлының туғанына 90 жыл толуына орай "Алтай асқан ақтаңгер" атты шығармашылық кеші өтті. Шығармашылық кешке ақынның жары- «Құрмет» орденінің иегері, Абай облысы, Үржар ауданының «Құрметті азаматы», Моңғолия және Қазақстан Жазушылар одағының мүшесі, ҚР «Мәдениет қайраткері» ақын Егеухан Мұхамәдиқызы, жолын қуған ұлы- ақын Дәулеткерей Кәпұлы мен балалары, немере-шөберелері қатысты. Кәп Құмарұлының жары мен ұрпақтарын Үржар ауданы әкімінің орынбасары Б.Тұрлыбеков, облыстық маслихаттың депутаты М.Карашев, еңбек ардагерлері Н.Тоқсеитов, Р.Жанкүшікова, Б.Баймұратов құттықтап, сый-сияпат көрсетті. Ақынның өлеңдерін шөберелері мен Абылайхан ОМ оқушылары оқып, аудандық мәдениет үйінің әншілері Ә.Қаниев, А.Желдібаева мен А.Мағауияновтың орындауында әндер шырқалды. Кеш барысында Егеухан анамыз ақынның өмірі, шығармашылығы, ұстаздығы жайлы әңгімелеп берді. Кәп Құмарұлы мен Егеухан Мұқамәдиқызының естеліктері негізінде мерейтойға орай жарық көрген "Күдір жон, күрең белдерде" кітабының тұсаукесері болды. Үржар аудандық орталық кітапханасы ақынның шығармашылығы бойынша көрме әзірледі.
Еліміздің белгілі айтыскер ақындары Серік Қуанған (Өскемен қаласы) және Ерлан Дәулетті (Ақмола облысы) айтысып, көрермен қауым бір серпіліп қалды. ҚР еңбек сіңірген қайраткері, Қазақстан Жазушылар одағының хатшысы, Астана қалалық филиалының директоры ақын Дәулеткерей Кәпұлына "Үржар ауданының Құрметті азаматы" атағы табыс етілді. Жерлесіміз Дәулеткерей Кәпұлын шын жүректен жоғары марапатымен құттықтаймыз!Тәрбиелік мәні зор бұл шара жиналған қауымның көңілінен шықты.
14 дек 2023
