Қазіргі аласапыран ақпарат алмасқан уақытта оқығанымыз көңілімізге қонбай, қысқа уақытта қаперімізден шығып кетуде. Оқу бар да, Ыбырай Алтынсарин атамыз айтқандай: «Оқығанды көңілге Ықыласпен тоқу» жоқ.
🖇️Жазушы Анатоль Франс: «Білімді бойға жақсылап сіңіру үшін, оны тәбетпен асап жеу қажет» десе.
Абыз ақсақалдар «құйма құлақ бол балам, өсиет тыңда, өнегелі болып, үлкендердің айтқанына құлақ ас, ғибрат ал!» деп балаға қойдың құлағын ұстатқан.
🖋️Сол құлақты жеп, бойынан даналық пен тектіліктің иісі бұрқырап тұрған, қазақтың кең-байтақ даласының төсінде небір ғұлама ғалымдар, дана данышпандар, құйма құлақ жыршылар, жезтаңдай әншілер мен сал-серілер, аспабымен аспанды күңіренткен күйшілер өткен. Жазу-сызу болмаған кезде де өнегелі өмір жалғасын тауып, ауызекі әдебиет пен жыр-дастандар, әлқиссалар, уағыз-насихаттар атадан балаға, ұрпақтан ұрпаққа айна-қатесіз жетіп отырған.
🌟Біз де бүгін сол құлақ жеп, атаның айтқан ақылын алып, салтымызды санамызға сіңіріп өскен бабалардың салған сара жолына түссек, айлы түндегі темірқазықтай бағытымыздан адаспасымыз анық.
5 окт 2024
