Дана халқымыз «Ұлық болсаң кішік бол» деп өмірлік өсиет айтып кеткен. Оның мағынасы: тау суындай тасыған білімің, айға жетіп тұрған атағың, есебі жоқ дүниең, лауазымы биік қызметің болса да ешкімді алаламай, шамаң келсе көмектесіп, тіпті пайдаң тимесе де зияныңды тигізбе дегенді білдіреді.
Керісінше, менмендікпен кеудесін ұрудан аулақ, көзге түсуге тырыспайтын, орынсыз сөйлемейтін «толық адам» болуға, яғни «бетегеден биік, жусаннан аласа» қарапайым күн кешіп, халыққа қалтқысыз қызмет көрсетуге үндеген.
Жоғарыда айтылған сөздерді мына бір өлең жолдары растап тұрғандай:
Көңілі тәкаппардың көктен биік,
Болады ойы таяз, сөзі сұйық.
Кішіпейіл келеді білімді адам,
Тарыдай дәні толық басын иіп.
16 янв 2024
