Псалтирь. Псалом 104. Протоиерей Олег Стеняев. Библия 

Пс.104:0 Аллилу́iа. Пс.104:1 Исповѣ́дайтеся Го́сподеви и призыва́йте и́мя его́, возвѣсти́те во язы́цѣхъ дѣла́ его́: Пс.104:2 воспо́йте ему́ и по́йте ему́, повѣ́дите вся́ чудеса́ его́. Пс.104:3 Хвали́теся о и́мени святѣ́мъ его́: да возвесели́тся се́рдце и́щущихъ Го́спода: Пс.104:4 взыщи́те Го́спода и утверди́теся, взыщи́те лица́ его́ вы́ну. Пс.104:5 Помяни́те чудеса́ его́, я́же сотвори́, чудеса́ его́ и судьбы́ у́стъ его́, Пс.104:6 сѣ́мя Авраа́мле раби́ его́, сы́нове Иа́ковли избра́ннiи его́. Пс.104:7 То́й Госпо́дь Бо́гъ на́шъ: по все́й земли́ судьбы́ его́. Пс.104:8 Помяну́ въ вѣ́къ завѣ́тъ сво́й, сло́во, е́же заповѣ́да въ ты́сящы родо́въ, Пс.104:9 е́же завѣща́ Авраа́му, и кля́тву свою́ Исаа́ку: Пс.104:10 и поста́ви ю́ Иа́кову въ повелѣ́нiе и Изра́илю въ завѣ́тъ вѣ́ченъ, Пс.104:11 глаго́ля: тебѣ́ да́мъ зе́млю Ханаа́ню, у́же достоя́нiя ва́шего. Пс.104:12 Внегда́ бы́ти и́мъ ма́лымъ число́мъ, малѣ́йшымъ и прише́лцемъ въ не́й, Пс.104:13 и преидо́ша от язы́ка въ язы́къ и от ца́рствiя въ лю́ди и́ны: Пс.104:14 не оста́ви человѣ́ка оби́дѣти и́хъ и обличи́ о ни́хъ цари́: Пс.104:15 не прикаса́йтеся пома́заннымъ мои́мъ, и во проро́цѣхъ мои́хъ не лука́внуйте. Пс.104:16 И призва́ гла́дъ на зе́млю: вся́ко утвержде́нiе хлѣ́бное сотры́. Пс.104:17 Посла́ предъ ни́ми человѣ́ка: въ раба́ про́данъ бы́сть Ио́сифъ. Пс.104:18 Смири́ша во око́вахъ но́зѣ его́, желѣ́зо про́йде душа́ его́, Пс.104:19 до́ндеже прiи́де сло́во его́: сло́во Госпо́дне разжже́ его́. Пс.104:20 Посла́ ца́рь и разрѣши́ его́: кня́зь люді́й, и оста́ви {отпусти́} его́. Пс.104:21 Поста́ви его́ господи́на до́му своему́ и кня́зя всему́ стяжа́нiю своему́, Пс.104:22 наказа́ти кня́зи его́ я́ко себе́ и ста́рцы его́ умудри́ти. Пс.104:23 И вни́де Изра́иль во Еги́петъ, и Иа́ковъ прише́лствова въ зе́млю Ха́мову. Пс.104:24 И возрасти́ лю́ди своя́ зѣло́ и укрѣпи́ я́ па́че враго́въ и́хъ. Пс.104:25 Преврати́ се́рдце и́хъ возненави́дѣти лю́ди его́, ле́сть сотвори́ти въ рабѣ́хъ его́. Пс.104:26 Посла́ Моисе́а раба́ своего́, Ааро́на, его́же избра́ себѣ́: Пс.104:27 положи́ въ ни́хъ словеса́ зна́менiй свои́хъ и чуде́съ свои́хъ въ земли́ Ха́мовѣ. Пс.104:28 Посла́ тму́ и помрачи́, я́ко преогорчи́ша словеса́ его́. Пс.104:29 Преложи́ во́ды и́хъ въ кро́вь и измори́ ры́бы и́хъ. Пс.104:30 Воскипѣ́ земля́ и́хъ жа́бами въ сокро́вищницахъ царе́й и́хъ. Пс.104:31 Рече́, и прiидо́ша пе́сiя му́хи и скни́пы во вся́ предѣ́лы и́хъ. Пс.104:32 Положи́ дожди́ и́хъ гра́ды, о́гнь попаля́ющь въ земли́ и́хъ: Пс.104:33 и порази́ виногра́ды и́хъ и смо́квы и́хъ, и сотры́ вся́кое дре́во предѣ́лъ и́хъ. Пс.104:34 Рече́, и прiидо́ша пру́зи и гу́сеницы, и́мже не бѣ́ числа́, Пс.104:35 и снѣдо́ша вся́ку траву́ въ земли́ и́хъ, и поядо́ша вся́къ пло́дъ земли́ и́хъ. Пс.104:36 И порази́ вся́каго пе́рвенца въ земли́ и́хъ, нача́токъ вся́каго труда́ и́хъ: Пс.104:37 и изведе́ я́ съ сребро́мъ и зла́томъ: и не бѣ́ въ колѣ́нѣхъ и́хъ боля́й. Пс.104:38 Возвесели́ся Еги́петъ во исхожде́нiи и́хъ: я́ко нападе́ стра́хъ и́хъ на ня́. Пс.104:39 Распростре́ о́блакъ въ покро́въ и́мъ, и о́гнь, е́же просвѣти́ти и́мъ но́щiю. Пс.104:40 Проси́ша, и прiидо́ша кра́стели, и хлѣ́ба небе́снаго насы́ти я́: Пс.104:41 разве́рзе ка́мень, и потеко́ша во́ды, потеко́ша въ безво́дныхъ рѣ́ки: Пс.104:42 я́ко помяну́ сло́во свято́е свое́, е́же ко Авраа́му рабу́ своему́. Пс.104:43 И изведе́ лю́ди своя́ въ ра́дости и избра́нныя своя́ въ весе́лiи. Пс.104:44 И даде́ и́мъ страны́ язы́къ, и труды́ люді́й наслѣ́доваша: Пс.104:45 я́ко да сохраня́тъ оправда́нiя его́ и зако́на его́ взы́щутъ.

_По 14-й кафисме (Пс. 101-104), чти Трисвятое по Отче наш: Таже тропари, глас 8:_ Я́ко блудни́ца припа́даю Ти, да прииму́ оставле́ние, и вме́с то мv́ра сле́зы от се́рдца приношу́ Ти, Христе́ Бо́же: да я́ко о́ную уще́дриши мя, Спа́се, и пода́си очище́ние грехо́в. Яко о́ная бо зову́ Ти: изба́ви мя от тиме́ния дел мои́х. _Слава:_ Почто́ не помышля́еши, душе́ моя́, сме́рти? Почто́ не обраща́ешися про́чее ко исправле́нию, пре́жде трубы́ глаше́ния на суде́? Тогда́ несть вре́мя покая́ния. Приими́ во уме́ мытаря́ и блудни́цу зову́щыя: согреши́х Ти, Го́споди, поми́луй мя. _И ныне:_ Яко превосходя́щая вои́стинну рождество́м Твои́м Си́лы Небе́сныя, Присноде́во Богоро́дице, и́же Тобо́ю Божество́м обогати́вшеся, непреста́нно Тя велича́ем. _Го́споди, поми́луй (40) и молитва:_ Благодари́м Тя, Го́споди Бо́же спасе́ний на́ших, я́ко вся твори́ши во благодея́ния жи́зни на́шея, я́ко упоко́ил еси́ нас в преше́дшем нощно́м вре́мени, и воздви́гл еси́ нас от ло́жей на́ших, и поста́вил еси́ нас в поклоне́ние честна́го и сла́внаго и́мене Твоего́. Те́мже мо́лимся Тебе́, Го́споди: даждь нам благода́ть и си́лу, да сподо́бимся Тебе́ пе́ти разу́мно, и моли́тися непреста́нно: и вы́ну к Тебе́ зре́ти, Спаси́телю и Благоде́телю на́ших душ, стра́хом и тре́петом свое́ спасе́ние де́йствующе. Услы́ши у́бо и поми́луй, Благоутро́бне, нас: сокруши́ под но́ги на́ша неви́димыя ра́тники и враги́: приими́ я́же по си́ле на́шей благодаре́ния: даждь нам благода́ть и си́лу во отверзе́ние уст на́ших, и научи́ нас оправда́нием Твои́м. Яко что помо́лимся, я́коже подоба́ет, не ве́мы, а́ще не Ты, Го́споди, Ду́хом Твои́м Святы́м наста́виши ны. Аще же что согреши́хом да́же до настоя́щаго часа́, сло́вом, или́ де́лом, или́ помышле́нием, во́лею, или́ нево́лею, осла́би, оста́ви, прости́. Аще бо беззако́ния на́зриши, Го́споди, Го́споди, кто постои́т? Яко у Тебе́ очище́ние есть, у Тебе́ избавле́ние. Ты еси́ Еди́н Свят, Помо́щник кре́пкий, и Защи́титель жи́зни на́шея, и Тя благослови́м во вся ве́ки, ами́нь.