أسلوب تلاعب نرجسي قذر تقدري تستخدميه معاه
أسلوب تلاعب بيعمله اهل النرجسي معاكي وبيستخدموه في التوقيع بينك وبينه بغرض استرجاعه منك كضحية لهم طبعا ودة بيتعمل لما بيكون النرجسي ضحية لأمه ااو ابوه أو أي حد من اهله ، المهم أصلا اللي انا عاملة الحلقة عشانه هو ان انتي تقدري تستخدمي نفس الأسلوب عشان تستردي اولادك منه لما يبدأ يسحبهم ناحيته
المهم الأسلوب دة اللي هو ايه؟ هم يقرفوكي من وراه ويخلوكي تكرهيهم وتكرهي تشوفيهم وييجوا ادامه ياخدوا دور الضحية تحسبا لانك حتحكي وانتي ممكن ماتحكيش لكن اذا جيتي تحكي حتلاقي ادامك وحش سانن سنانه وبيدافع عن أي حد من طرفه اذاكي لانه أصلا فهمه عكس اللي حصل ، كل دة ولسة برضه ماقلناش أسلوب التلاعب ، الناس دي بعد مابيحصل بينك وبينهم سكوت ومفيش علاقات وانتي بدأتي تتجنبيهم في صمت وحتى من غير ماتشتكي بيروحوا لجوزك بمنتهى الخبث واللؤم ويسألوا عليكي وعلى صحتك ويبينوا انهم مهتمين بيكي وبيحبوكي وكمان يقولوا له سلم عليها والاسوأ بقى "هي مابتسألش ليه دي وحشتني " وتبدأ اللعبة بقى كل شوية هي مبتسألش ليه هي عاملة ايه ، ودة بيتترجم عند النرجسي الغبي انهم بيحبوكي وانهم مش متضايقين منك ومافيش أي حاجة في نفسهم خالص تجاهك ، فيبدأ هو يوصل لك رسالتهم انهم بيسألوا عليكي ويبدأ يسألك انتي ليه مش بتسألي فانتي تضطري تشتكي وتقولي ان حصل منهم كذا فهو طبعا على حسب اللي بيقولوه مش في دماغهم ومش قاصدين وانتي كدة اللي حساسة وطبعا هو كنرجسي ماحيصدق يلاقي حاجة يعمل معاكي عليها مشكلة وسواء هو فاهم اهله او لا هو حييجي عليكي وحتكون فرصة عظيمة لخلق مشكلة وتحقير كلام كتير من هذا القبيل ، الأسلوب دة مقنع جدا لاي حد ان الطرف اللي بيشتكي هو الي عنده مشكلة اما حساس او بيتلكك لان الطرف اللي بيسأل عليه وبيقول انه واحشه بيبدو في منتهى الحب وحسن النية ، ودة بيتعمل كأسلوب تلاعب قذر من النرجسيين ، طيب احنا بقى نتعلم الأسلوب دة في حرب الأولاد ، ازاي؟
دلوقتي الاب النرجسي بييدأ يحاربك في اولادك بانه دايما يشتكي منك ويبين لاولادك اد ايه انتي قاسية عليه وعليهم وانتي بتضربي وتزعقي وانتي ماسكة عليهم وانتي واقفة لهم ع الواحدة ومش بتسيبيهم يلعبوا ولا يرتاحوا ، وفي نفس الوقت عاملة مشاكل معاه وبتخربي البيت وانتي مش بتحبيه وانتي مش عايزاه يقعد معاهم وبيشتغل على دماغهم ومشاعرهم بكل قوة عشان وقت ماتحبي تهربي بيهم يعرف يوقفك لانهم مش حيهربوا معاكي وحيكونوا عايزين ابوهم ، المشكلة انك بتكوني شايفة كل دة بيحصل ادام عينك وانتي واقفة تتفرجي ومش عارفة تعملي ايه او انك بتبدأي تحاربيه بطريقة غلط تثبت للأولاد كل اللي بيقوله عليكي وتلاقيهم ينفروا منك اكتر ويروحوا له اكتر ، اللي هي تزودي في خدمتك واهتمامك بالاولاد بشكل خانق اكتر عشان تلحقي تنجديهم منه فتبدأي توجهي وتزودي في احكام السيطرة امتر وتبدأي تتخانقي معاه وتفقدي اعصابك ادامهم وتبدأي تتهميه ادامهم وكل دة بيخلي برضه موقفك ادامهم ضعيف ومش بيقربهم منك ، طيب لما بقول اعملي زي مابيعمل الناس بتقول غلط نلبي كل طلبات الأولاد ونجيب حلويات ولعب ونحارب بعض على حساب التربية ، قطعا عندهم حق بس مش دة اللي بقصده انك تعمليه ،اللي بقصده انك تخففي حدة التعليمات شوية وتحاولي يكون فيه من ناحيتك شوية مرونة ومفيش مانع انك تجيبي لعبة مرة وحاجة حلوة مرة لكن مش دة المهم المهم القرب واللعب والنزول لمستوى الطفل (ليه اولادك بيحبوا النرجسي اكتر منك خصوصا الأطفال) ، كمان بقى استخدمي أسلوب التلاعب اللي قلنا هدة معاه ، ازاي ، لما الأولاد ييجيوا يقولوا لك بابا بيقول عليكي وحشة ومش عايزانا نقعد معاه او مش عايزانا نزوره لو مش عايش معاكم او مش عايزانا نحبه ، انتي مفروض تمسكي اعصابك ومتدافعيش عن نفسك ولاتغلطي في ابوهم وتحسسي الولد انك مش متفاجئة ابدا من الكلام وبمنتهى الهدوء تقولي للولد انت ايه رأيك ياحبيبي في الكلام دة ،تسيبيه يرد واذا حسيتي انه مش عايز يرد غيري الموضوع واتكلموا في موضوع تاني وبعد فترة أسبوع مثلا توصي الولد على ابوه يعني اسمع كلام بابا ، اسأل على بابا ، بابا بيلبي كل طلباتك المفروض تقول لبابا شكرا ، اللي هو بيعملوه اهل النرجسي سلم عليها هي مبتسألش ليه ، هي هي الطريقة بس انتي بتربي ابنك صح وبتزرعي فيه قيم انتي بطبيعة الحال عايزة تزرعيها وفي نفس الوقت بتوضحي للولد انك مش بتكرهي ابوه ولا عايزة تفرقي بينهم وبالتالي بتنفي من دماغ الولد كل القاذورات اللي بيحطها النرجسي بدون ماتدافعي عن نفسك وتحطي نفسك في وضع ضعيف ، وفي نفس الوقت بتوضحي للولد حقيقة ابوه بالتدريج وبدون ماتقولي ، والكلام دة بينجح اكتر طبعا مع الأطفال من ست سنوات وطبعا المراهق بيكون الكلام أوضح ومش بتحتاجي تتلاعبي معاه لانه بيكون مدرك وسهل تفهميه الوضع ، لكن انا هنا مهتمة بالطفل اللي مش حنقدر نواجهه بالحقيقة ولا هو حيفهمها أصلا
26 авг 2024