ازاي نفرق بين الزوج االسوي والزوج النرجسي حتى لو السوي بيتلاعب احيانا ؟ عشان نعرف نفرق لازم نفهم الفرق بين التلاعب في حالة الناس الاسوياء وفي حالة المضطربين
١- قلة التعاطف
في حالة الاسوياء : ممكن يحصل قلة تعاطف لما يكون الانسان محطوط تحت ضغط شديد او في حالة نفسية سيئة او متعرض لصدمة ، في الحالة دي ممكن يفضل مصلحته على مصلحة الاخرين مثلا وميقفش لحظة يفكر في تأثير دة عليهم ودة بيحصل من وقت للتاني (مثلا في حالة مرض شديد لحد قريب ، فقد وظيفة ، اللي هي المواقف الصعبة اللي ممكن تهز البني ادم ) واول ما ينتبه انه غلط بيعتذر ويحس بالذنب ويحاول يصحح غلطه ويتعلم منه ، طبعا هنا ممكن تختلف طريقة الاعتذار فيه ناس متعلمتش تقول اسف فبتعبر عن الاعتذار بهدية مثلا او بحضن ،المهم ان الغلط مش بيتكرر ويصبح اسلوب معاملة
اما في حالة الاضطراب النفسي : الشخص بيكون نادر جدا لو اهتم باي حد حاسس بإيه دة مش من اهتماماته اصلا ، ممكن بسهولة يقاطعك وميهتمش يسمعك لانه اصلا مش مهتم باللي بتقوليه ، دايما وباستمرار حاطط مصلحته واحتياجاته فوق مصلحة واحتياجات الاخرين ، واذا الشخص دة حتى سأل عن مشاعر الاخرين مش حيكون عايز يسمع ولا يعرف ، ولو سمع بيقلل من صاحبها ويقول هو مكبر الموضوع والحكاية متستاهلش كل دة ، وعادة بيكون بارد المشاعر
تأثير تلاعب المضطرب عليكي :طبعا في الحالة دي انتي بتحسي انك مش مسموعة ولا متشافة و وهو مش فاهمك و متضايقة
٢- التلاعب
في حالة الناس الاسوياء :لما حد يحتاج معروف من حد والمعروف دة حيكون تقيل شوية بيروح يقوله انا طمعان في كرمك انا عرفت انك بتخدم ، وانك جدع و الكلام اللي بنقول عليه مسح جوخ دة ، او مثلا انك تستخدم الواسطة عشان تقضي مصلحة ، او تسرب اسرار مهمة عشان تحس انك مهم ، الحاجات دي هي تلاعب ممكن الشخص السوي يعملها على فترات متباعدة ،
اما في حالة الاضطراب النفسي : التلاعب بيكون نمط حياه ، كل مايحتاج حاجة ياخدها بالتلاعب بدون اي تفكير في تأثير دة على غيره ، مثلا يفضل يدور وراكي لحد مايعرف نقط ضعفك من ماضيكي مثلا ويبدأ يستغلها ضدك عشان يحسسك بالضعف ويقدر يسيطر عليكي ، ويزرع جواكي الاحساس بالخجل والعار عن طريق انه يخليكي تحكي له عن غلطة عملتيها زمان وبعدين يفضل يقولك مكنش مفروض تعملي كدة انتي صدمتيني انا اتصدمت فيكي ،وهو اصلا مكنش موجود في حياتك لما انتي عملتي الحاجة دي اصلا المهم يوصلك انك تحسي الخجل والعار عشان يعرف ياخد منك اللي هو عايزه في مقابل انه يبطل يتكلم في الغلطة دي عشان تحمي نفسك من الاحساس بالذنب فترضخي له ، وطبعا تلاعب النرجسي معروف وحافظينه تلاعبات تانية كتير مش محتاجة اذكر امثلة عليها ، المهم انه عايش بيها طول الوقت معاكي ومع اولاده ومع اي حد يقدر يستغله ، وبدون اي احساس بالذنب
تأثير تلاعب المضطرب عليكي : بتحسي انه تم استغلالك واستغفالك ، بتحسي انك غبية و بالتالي مش بتثقي في حد
٣- الاسقاط :
في حالة الناس الطبيعية بيكون الاسقاط عبارة عن حيلة دفاعية بتحصل لما نحس بمشاعر سيئة تجاه نفسنا ، او لوحسينا اننا مهددين مثلا ان وصفنا بصفة سيئة واحنا مش منتبهين لوجودها فينا فتلقائيا بندافع عن نفسنا وننسبها له او لاي حد ، لكن لو حد وقف وقال لا فكر بالراحة وحاول يفهمنا او يراجعنا بنفكر ونتراجع ونبدأ نصلح نفسنا ونتخلص من الصفة دي ودة اسمه الاسقاط الطبيعي
اما في حالة الاضطراب النفسي : بيكون الاسقاط برضه نمط حياة واول طريقة بيتعامل بيها النرجسي مع مشاعره ، النرجسي بيتهم الاخر باستمرار بعيوبه او موده اواسلوبه السيء ، فرويد وغيره بيعتبر ان الاسقاط اول نمط دفاعي لاحظوا ان النرجسي بيستخدمه
تأثير الاسقاط عليكي : مشوشة ، مش قادرة تحسي ان حد فاهمك ، بتشكي في نفسك ، مش مسموعة ، وغضبانة
٤- الكذب
في حالة الناس الاسوياء : الناس الاسوياء ممكن يكدبوا في حاجات محرجة زي اتأخرت عشان الطريق زحمة وهو اصلا كان ناسي الموعد ، يكدب لواضطر يلغي خروجة عشان معهوش فلوس فيقول اصلي عندي صداع ، اللي هو الكذب اللي لايؤذي حد ولا هو نمط حياة وبيحصل باستمرار وفي نفس الوقت اللي بيعمله غالبا بيكون مش مبسوط وضميره بيؤنبه ، وطبعا دة مش معناه ان الكدب حاجة عادي اننا نعملها ولا اي اي حاجة من اللي بنقولها لكن المقصود ان محدش مش بيغلط الاسوياء بيغلطوا لكن مش بشكل متواصل نفس الغلط يتكرر ولا يغلط وميحسش بالذنب
اما في حالة الاضطراب النفسي : بيكون هو عايش في كدب اكتر ماعايش الحقيقة ، يعني كل حياته كدب لدرجة انك انتي زوجته متبقيش عارفة هو بيكدب ولا بيقول الحقيقة ، وطبعا بيكون كدبه من النوع اللي بيتسبب في اذى الاخرين واولهم انتي
اثر كدبه عليكي : احساسك انك اتخدعتي بيخليكي تفقدي الثقة في الناس ، وبتشكي في كل حاجة وكل حد ، عدم احساس بالامان ، الغضب .
٥- الحدود الضعيفة او المفتوحة
في حالة الناس الاسوياء : الحدود في الناس الاسوياء ممكن تضعف مع المقربين جدا ، زي الاصدقاء القريبين او اخواتك اللي ممكن يكونوا طول الوقت بيتصلوا وفي اي وقت يزوروكي من غير اتصال ، وبعض الناس بتشوف ان دة مش كويس لكن بنقول ان طالما الجميع مرضي وراضي خلاص وخصوصا ان فيه ناس بتكون في بعض الاوقات محتاجة للقرب دة ،
اما في حالة الاضطراب : بيتم انتهاك الحدود بالتدريج وبشكل منتظم زي اللي النرجسي بيعمله معاكي باستمرار ، الاول ايام الخطوبة يطلب منك متتحركيش بدون اذنه وانتي تقبلي ، متخرجيش مع فلانة صاحبتك وانتي تقبلي ، سليفيني ، حنبيع الشبكة بعد الجواز ، انتي حتسيبي شغلك وتربي الاولاد وانتي تكوني اصلا مش موافقة على ولا حاجة ولا عايزة تعمليها لكن مش بتقولي لا ابدا وبالتالي اصبحت ارضك مستباحة وهو يدخل ويعمل كل اللي هو عايزه فيها لحد متلاقيه جايب لك مراته الجديدة وانتي برضه في الاخر بتضطري تقبلي ودة لانك سيبتيه يكسر حدودك من البداية ومقلتيش لا
اثر انتهاك الحدود عليكي : احساسك ان انتي نفسك مستباحة ومنتهكة ، مهددة ، مش مرتاحة حاسة بالذنب ، احيانا تحسي انك سجينة .
26 авг 2024
