عايزة تحافظي على شريكك النرجسي؟ طيب عايزة تخلصي منه ؟ لو عايزة تحافظي عليه متعمليش اللي حقوله دة ابدا ولو عايزة تخلصي منه نفذي التكتيكات اللي حقولها لك دي :
اولا في حالة لو شريكك نرجسي ظاهر :
١- اذا كنتي مكتوب كتابك يبقى متسمحيش ان العلاقة تطور بسرعة حطي حدود قوية ومتسمحيش بالقرب الجسدي ابدا ، واذا كنتي زوجة امنعي العلاقة الحميمة (متعمليش كدة بدون سبب عشان مناخدش ذنب حد)
٢- لما ييجي يتكلم عن نفسه ومزاياه يعني مثلا بيتكلم عن وسامته ولا جمال عينيه تردي عليه دا الممثل الفلاني عينه ملهاش حل ، عزمك في مطعم غالي وبيشكر فيه تقولي له بيقولوا المطعم الفلاني احسن بكتير ، من غير ماتتكلمي عن نفسك اصلا ، دة حينفر النرجسي منك
٣- النرجسي بيميل للشخص اللي بيمدحه اكتر من الشخص اللي بيعتني بيه ويهتم بالمجاملة اكتر مايهتم بالاعجاب ، فلو انتي عايزة تطفشيه متمدحيهوش ولا تجامليه ، ولو عايزة تحافظي عليه امدحيه وجامليه اكتر ما تراعيه وتعتني بيه
ثانيا في حالة النرجسي الخفي (الضعيف) : النرجسي الخفي بيشترك مع الشخصية الحدية والاعتمادية والهستيرية في بعض الصفات عشان كدة حنلاقي تكتيكات كتير عشان نطفش بيه النرجسي الخفي :
١- الشخصية الاعتمادية اللي جوة النرجسي الخفي عايزة حد يعمل لها كل حاجة وعايزة حد يساندها في كل خطواتها ، فانتي لو وقفتي تعملي له اي حاجة ووقفتي مساندتك له في كل حياته حتكوني زي قلتك بالنسبة له وحيسيبك ويمشي ، اما لو عايزة تحافظي عليه فكوني سند له قوي ودائم .
٢- برضه الشخصية الاعتمادية اللي جواه بتحب تتطوع بالمساعدة كتير عشان تبني علاقة جيدة فلو انتي مش عايزة تحافظي عليه متقبليش منه اي مساعدة في اي اتجاه اما لو عايزة تحافظي عليه اديه فرصة يساعدك
٣- برضه كشخصية اعتمادية هو مش بياخد قرارات مش بيعرف يصنع قرار وانتي بتكوني صانع القرار له وخصوصا كمان عشان يشيلك نتيجة القرار لو كانت سلبية دة غير انه اصلا بيخاف ومبيعرف ياخد قرار ، فدورك في موضوع القرارات دة مهم جدا بالنسبة فلو عايزة تخلصي منه وقفي الدور دة متاخديش له اي قرار
٤- نفس الفكرة اللي قلناها في النرجسي الظاهر عن القرب الجسدي برضه متسمحيش بيه
٥- لما ييجي يقول لك انا حتجوز او انا خلاص حنهي العلاقة سواء كنتي خطيبته او زوجته ،لو رديتي عليه طيب تمام مبروك انا مبسوطة عشانك وتبيني انك مش مهتمة ولا فارق معاكي كأنه حد متعرفيهوش بيحس انه طبعا مش مهم عندك لانه بيكون متوقع منك انهار طبعا ومحايلة فلما يلاقيكي مش فارق معاكي بينفر منك ( دا اذا متأكد انك مش بتمثلي عليه عشان تخليه يرجع في كلامه ) بس التكتيك دة انا بشوفه خطر وفيه مجازفة لانك ممكن برضه لو اتحايلتي عليه ينفر لانه مبيحبش الضعف ، بس هو دكتور تود قاله وانا قلت اوصل لكم المعلومة كاملة
نفهم من كدة ان تجاهل النرجسي كقيمة يعني لو النرجسي حس انه صغير في عينيكي وانك شايفة انه مش احسن حد في الدنيا او انك شايفة ان فيه حد احسن منه او فيها ناس بتعمل حاجات احسن من اللي هو بيعملها فدة اسوأ حاجة ممكن تعمليها فيه … لكن انا برضه رأيي في الجزئية دي انها تبقى طريقة تخلص منه ممكن تمشي في حالة النرجسي الغني اللي يقدر يتجوز تاني او في حالة انه لاقي جوازة ببلاش او وقع على واحدة غنية يتجوزها وياخد فلوسها ، انما لو معندوش قدرة انه يستبدلك فمش حيسيبك حتى لو نفر منك لكن حينتقم منك ، مش حيعيش معاكي في سلام وحتشوفي غضب نرجسي كتييير وتحقير وتقليل وصمت عقابي ، فاذا انتي نفسك تسيبيه بس مش متأكدة انه عنده استعداد يطلق يبقى متعمليش التكتيكات دي الا اذا كنتي عندك مكان بديل تهربي فيه وتكوني جاهزة ماديا طبعا تصرفي على نفسك واولادك .
وبالنسبة للي عايزة تعيش ومش عايزاه يتركها لازم تتجنب التكتيكات دي تماما وتعمل عكسها لاني فعلا شفت في الحالات اللي النرجسي بيرميها بدري وبسرعة ومش بيكمل معاها بتكون تقريبا بتعمل حاجة او اتنين من التكتيكات دي من غير ماتاخد بالها وبتكون محتارة ومش فاهمة هو ليه مشي وليه سابني وانا كنت بعمل وبعمل وبراعيه وبعتني بيه بس مش واخدة بالها انها مكانتش بتمدحه ولا بتجامله وممكن كانت بتذكر محاسن حد تاني لما يكون هو بيشكر في نفسه وممكن تكون بتستقل هداياه وفسحه عشان هي اصلا مستواها اعلى وبتتصرف بتلقائية من غير ماتنتبه انها بتطفشه بأسرع مايمكن
اكونت الفيس بوك
profile.php?...
جروب ادرس عدوك النرجسي
/ kawthersanad11
28 май 2021
