٨ قواعد النرجسي بيحطهم لك من غير مايقولهم هو بيفهمهم لك بتصرفاته ومعاملته وتلاعبه وانتي المفروض ترفضيهم من اول يوم ولو مكنتيش رفضتيهم ارفضيهم دلوقتي لانك لو مرفضتيهمش حتفقدي نفسك
١- لما تختلفي مع النرجسي لازم تشرحي له وتبرري له مشاعرك ودة معناه انك تبرري نفسك يعني تبرري انتي ليه طبعك كدة او انتي ليه طيبة او انتي ليه ذكية او انتي ليه معطاءة ، دي حاجات مش بتتبرر محدش بيبرر نفسه ولا افكاره ولا مشاعره ، للاسف هو بيوصل لك انك مطالبة انك تبرري كونك نفسك ، المفروض تبطلي دة ويكون ردك انا حاسة بكدة عشان الطبيعي اني احس كدة وتقطمي الكلام ، او عشان انا دة ودي مشاعري او دي افكاري وبس برضه تقطمي الكلام
٢- انتي لازم تخافي مني ، طبعا نجح فيها نجاح ساحق مع انه ممكن ميكنش بيعمل غضب نرجسي اصلا او مثلا حصل معاكي مرة او اتنين ، وممكن ميكنش بيعمل صمت عقابي طويل لكن مخليكي ماشية على قشر بيض وفعلا عايشة في رعب ، ليه لانك خايفة تفقديه لانه حسسك انه عادي يسيبك ويجيب غيرك هو كلام بيقوله بمنتهى الهدوء وممكن يقوله وانتي في حضنه وقاعد يهزر وممكن يقوله في صيغة تهديد بس بهدوء المهم انه بيوصل لك انك قليلة عليه جدا وهو يستحق احسن من كدة وبالتالي اما حيتجوز عليكي او حيسيبك ودة طبعا الرعب بعينه عشان كدة بتعيشي حياتك في قطر الموت طالع نازل وحتقعي وتلاقي نفسك موقعتيش ودة بيربطك بيه اكتر زي ماقلنا برابطة الصدمة وطبعا قبلتي الخوف وقبلتي القاعدة ، طيب تعملي ايه ، امني بربنا ، يعني ايه هو انا مش مؤمنة ؟ لا انتي مؤمنة بربنا بس للاسف ايمانك بيه ضعيف وايمانك بالنرجسي اقوى انا اسفة بس هو دة اللي باين ادامي ، يعني هو ربنا قال قل لن يصيبنا الا ماكتب الله لنا ، وقال واعدوا لهم مااستطعتم ، وانتي قاعدة خايفة النرجسي يسيبك وسايبة لن يصيبنا الا ماكتب الله لنا ، قاعدة تتذلي ويلطش فيكي ادام الناس وادام العيال ويخونك ويزني وينقل امراض وقاعدة عشان خايفة يصيبك مصيبة انه يتجوز عليكي او يسيبك طب ماهو لو كتب الله لنا تبقى خلصت لو انتي مؤمنة بقى بربنا اكتر من ايمانك بالنرجسي مش حتبقلي غير اللي ربنا عايزك تقبليه وربنا مش عايزك تقبلي الذل والخوف والظلم (مش معنى كلامي انك تقفي تشتميه او تستفزيه لا خالص معنى كلامي انك متخافيش يسيبك وتقبلي ذله واهانته )
٣- المفروض انك تكوني فاهمة ان وضعك مع النرجسي ماهو الا انك دمية وهو بس اللي يحركها ، لاينفع تعملي اي حاجة من غير اذنه حتى لو من حقك تعمليها ، وملكيش اي رزي في اي حاجة ولا ينفع يكون فيه حاجة تمتلكيها لنفسك ولا حتى نفسك والكلام في النقطة دي يطول واظن انك عرفاه كويس ، وطبعا قبولك للقاعدة دي بيتوقف على قبولك لقاعدة الخوف لانك حتقبليها خوفا منه
٤- انا صح على طول الخط وانتي غلط علي طول الخط ، يعني اوعي تفكري تنتقديني ( احنا عارفين انهم وخصوصا الخفي حساسين جدا للنقد ) فطبعا مش مسموح لكي تطلعيه غلطان لان دة نقد وطبعا انتي اصلا السبب في ثقب الاوزون فمش حتكوني غلطانة طول الوقت انتي السبب في اي حاجة وحشة بتحصل وهو السبب في كل حاجة وحلوة بتحصل ، القاعدة دي تقدري ترفضيها جوة نفسك مش حتخافي منه لو رفضتيها لان المهم هنا مش انه يعرف انك رافضاها لا ان انتي من جواكي ترفضيها ومتصدقيهاش عشان متفضليش طول الوقت حاسة بالذنب وتفقدي ثقتك في نفسك وتكرهي نفسك لانك غلط طول الوقت وكمان عايشة مع حد مثالي مش بيغلط ابدا تبقى قليلة اوي وهو كتير عليكي ولازم تعوضيه بدل مايروح لغيرك وتفضلي في الدايرة السودا دي
٥- انتي مسئولة عن تظبيط مودي وحالتي النفسية ، وطبعا انتي بتقبليها بناء على الكلام اللي لسة قايلاه ، فلو مقبلتيش رقم (٤) مش حتقبلي رقم (٥)
٦- مهما كنت عامل فيكي ومبهدلك وهاينك وشاتمك ومتهمك في شرفك او حتى ضاربك لازم تحافظي على صورتي ادام الناس ومتحكيش لحد اللي بيحصل بينا والاحتكوني بتخرجي اسرار بيتنا وتبقي زوجة غير صالحة ، طبعا دة عشان يضمن ان محدش يفوقك وينقذك من ايده ، ودة كمان سهل جدا انك متقبليهوش لانك مش حتحكي ادامه ، لازم تحكي اللي بيحصل معاكي لحد تثقي فيه وتاخدي نصيحته
٧- لازم تقبلي ارائي وافكاري وحكمي على الامور وتعتنقيها ومتخالفينيش الرأي ابدا عشان انا بس اللي بفهم ومينفعش ان اي حد اقل مني يخالفني الرأي ، ابدا متتنازليش عن نفسك ، افكارك وارائك وحكمك على الامور جزء من نفسك ابدا متتنازليش عنها ، مش لازم تناقشيه ولا تدخلي معاه في جدال ولا لازم تعلني له انك مخالفاه في الرأي طول مانتي لسة ضعيفة وبتخافي ولسة متعافيتيش لكن من جواكي ومع اهلك واصحابك لازم تقولي رأيك وبصوت عالي ولازم تجتمعي مع اهلك وصاحباتك عشان تفكي عقدة لسانك وتعبري عن نفسك في بيئة صحية بعيدا عن النرجسي
٨- لازم ترفضي الناس اللي انا رافضهم وتقاطعي اللي اقاطعهم ودة طبعا ممكن يكون صعب رفضيه لو كنتي بتخافي منه لكن ممكن ترفضيه في السر يعني متعرفيهوش انك على علاقة بالناس دي مؤقتا لحد ماتقتلي الخوف اللي جواكي وتبقى قوية ومش فارق معاكي يسيبك ولا يقعد ساعتها حتقدري ترفض علنا
اوعي تفقدي نفسك وروحك عشان حد بيمص دمك
اكونت الفيس بوك
profile.php?...
جروب ادرس عدوك النرجسي
/ kawthersanad11
8 июл 2021
