اسعدي نفسك بنفسك وتخلصي من النرجسي .. التشافي (٩).. كوثر سند 

تاني هرمون الدوبامين والادرينالين :
الاتين دول ممكن نعوضهم بنفس الطريقة (الانشطة ) عشان كدة حطيناهم مع بعض
اتفقنا ان افراز الادرينالين بكميات كبيرة خلاكي مدمنة ادرينالين ، يعني لو بعدتي عن النرجسي حيحصل لك اعراض انسحاب ، او انك تعوضي نقص الادرينالين دة من مصدر تاني غير معاملة النرجسي السيئة ، طيب امتى بيتم افراز الادرينالين ؟ لما نكون في حالة خوف وقلق وترقب ودة اللي بيعمله فيكي النرجسي طول الوقت ، طيب نبدل النرجسي بشوية حاجات بس تكون صحية مش مؤذية زي ايه ؟؟ مثلا الالعاب المخيفة شوية في الملاهي زي قطر الموت وبيت الرعب والحاجات اللي فيها شوية خوف ، ، مفيش امكانية ملاهي اتفرجي علي فيلم رعب او اثارة ، روحي انتريفيوهات شغل جديد دوري على شغل وروحي انتريفيو ، فكري كتير في انك تواجهي مواقف كنتي بتهربي منها ، قرري تعملي الحاجات اللي كنتي بتخافي تعمليها (تموتي صرصار مثلا ) تقربي من حاجة بتخافي منها زي الكلاب والحيوانات الاليفة ( الناس اللي بتخاف من الحيوانات ) يعني مطلوب منك تعملي حاجة بتعتبريها مرعبة بس طبعا متكنش مؤذية لكي ، وكدة بدلنا نكد ورعب وترقب النرجسي بحاجات تانية بعيدا عن اذاه وحفزنا افراز الادرينالين اللي بدوره بيحفز افراز الدوبامين ، طيب عوضنا النكد مش حنعوض المكافئات والحاجات الحلوة القليلة اللي كان بيعملها عشان نزود افراز الدوبامين ونستغني عن النرجسي ؟ طبعا كمان حنعمل لعقلنا نظام مكافئات جديد بعيد تماما عن النرجسي ، حقولك حوالي عشر افكار وانتي اكيد حتلاقي مئات الافكار : شوفي هواية جديدة اقعدي فكري مع نفسك وشوفي ممكن تكوني بتحبي ايه او حابة تعملي ايه ، او شوفي هواية قديمة كنتي بتحبيها وبتمارسيها قبل ماتعرفي النرجسي ويجمد لك حياتك وحاولي ترجعي لها
جربي اعمال يدوية
جربي التصوير بكاميرا موبايلك
جربي تقرأي او تكتبي خواطر
اعملي صفحة او مجموعة علي الفيس واشتغلي عليها وكبريها وخلي محتواها مفيد للناس
اعملي مشروع صغير يدخل لك دخل تستقلي بيه عن النرجسي زي بيع الاكل البيتي ، بسكوتات وحلويات ، اعمال فنية زي التابلوهات اللي طالعة جديد بالخيط ،
اعملي قناة على يوتيوب اعرضي فيها اي حاجة بتعرفي تعمليها وتعلميها للناس
كل دي محاولات ممكن تنجح وتسعدك وتغذي نظام المكافئات في المخ وتحفز افراز الدوبامين وحتى القلق من الفشل في الكلام دة حيحفز افراز الادرينالين
شهيدة عربي قالت في كتابها كن كابوس للنرجسي انها اول ما خرجت من العلاقة مع النرجسي عملت قناة اليوتيوب وكتبت كتاب ودة ساعدها جدا على التشافي في المرحلة دي وكمان غيرت شغلها وانا عارفة ان دة حاجة مش سهلة ابدا خصوصا في بلدنا في الظروف اللي احنا فيها ، لكن حاولي
يعني من اول رحلات خارج بلدك ومغامرات القفز بالمظلات والقفز بالمطاط مرورا بالملاهي لغاية انك تزرعي اي زرع حوالين بيتك او في بلكونتك او حتى علي الشباك في طبق قديم
السيروتونين هرمون لتنظيم المزاج ، طيب ماله بينا دة بقى ، دة بقى اذا وقعتي في الحب بينخفض مستواه في الجسم بدرجة كبيرة جدا تعادل انخفاضه لما يكون الشخص مصاب بالوسواس القهري ! تخيلوا ؟ شوفي بقى في مرحلة القصف العاطفي او الحب الذهبية حينخفض اد ايه ؟ طب ماينخفض واحنا بيهمنا؟ اه طبعا بيهمنا ليه لان انخفاضه دة بيسبب للشخص انخراط زايد في العلاقة الحميمة دة اللي هي بتتسبب في افراز مين؟ الدوبامين والاكسيتوسين اللي هما اساس الربط بينك وبين النرجسي ييييه تاني ؟ تخيلي تاني . شفتي بقى مخك بيساعد النرجسي علي ربطك بيه ، طيب تعملي ايه ؟ تكوني اذكى من النرجسي واذكى من مخك نفسه ازاي؟ حنوفر الهرمونات دي ونزودها في مرحلة الانسحاب من ادمان النرجسي طيب ازاي ؟ الحلقة الجاية ان شاء الله
تابعونا على الفيس
اكونت الفيس بوك
www.facebook.c...
جروب ادرس عدوك النرجسي
/ kawthersanad11
قناة التلجرام
t.me/learnabou...
الكتب
١- Becoming the Narcissist's Nightmare
٢- Disarming the Narcissist
3- healing from narcissist