١- النرجسي المرح اكثر خفاء من النرجسي الخفي وطبعا اخطر من حيث الخداع الفكرة النهاردة من فيديو لدكتور راماني
الناس اللي بتتسائل انا زوجي حبوب ومرح وبيحب الفسح والخروج ومش نكدي ولا مكتئب بس بيعمل صمت عقابي وبيحقر وبيقلل مني وله تصرفات غريبة ، دة نرجسي ولا لا ؟
١- شوفي اللي مرسوم في اذهاننا عن النرجسية ايه ؟ الغضب النرجسي والمشي على قشر بيض وممكن الضرب والشتيمة وكل دة مش شرط ابدا للنرجسية لان كل الناس بيحصل منها دة لكن بدرجات متفاوتة ، طيب ايه اللي نقدر نشوفه بعنينا ونقول اهو نرجسي ؟ اكتر حاجة الإحساس بالاستحقاق ،والبحث عن التقدير و بعدين العلاقات الغير ناجحة العلاقات القريبة الخاصة مش بتنجح ابدا ومش بتستمر وطبعا الإحساس بالعظمة ودة بنشوفه طول ما النرجسي بيعظم في نفسه بشكل مباشر او غير مباشر كل دة ممكن نشوفه من النرجسي ومانشوفش منه غضب نرجسي ولا صمت عقابي كمان او الصمت العقابي بيكون وقت قليل فمش بنحس انه صمت عقابي ، كل دة بتلاقيه في النرجسي المرح مش بيعمل ابدا غضب نرجسي وممكن كمان الصمت العقابي يكون وقته قصير جدا يوم او يومين ويكون شبه الخصام العادي ،لكن هو أصلا حياته مع ضحيته بتكون عبارة عن صمت عقابي مش واضح ابدا ، يعني ازاي شوفي حلقة (اخطر أنواع الصمت العقابي) الكلام دة مشروح فيها
٢- المهم النرجسي المرح بيستخدم كلمات المتعاطفة (حبيبة قلبي ، قلبي ،حياتي ، عيوني ، روحي روح قلبي) وهنا اللي بيلخبط الناس واولهم الضحية وهنا بتكمن خطورة النوع دة لانه مش بيتعرف بسهولة ابدا ممكن تعيشي معاه خمسين سنة ومتعرفيش انك عايشة مع نرجسي او مع شخصية غير سوية ، لان اسلوبه دة وكلماته بتوحي طبعا انه شخص عطوف ومتعاطف كمان بالرغم من وجود التعاظم والاستحقاق الا انه بيخدع ومن ضمن الحاجات اللي بتخدع فيه انه بكاء ، يعني كتير البكاء أي حاجة يعيط أي حاجة تحصل له يعيط ، اذا قفشتيه في حاجة وطلع غلطان يعيط لك ويقول لك انا بحبك ، والبكاء دة سببه الضعف والخوف اللي هو مخبيه طبعا عنك ، كمان هو ممكن يحصل له احباط شديد جدا اذا الناس مادتهوش الاهتمام اللائق بيه ، وبيكره الاتزام بأي حاجة لكن بيخاف مايلتزمش لكن اذا لقى فرصة يكسر فيها قوانين او قواعد او قيم او تقاليد من غير ماحد يعرف ومن غير مايتفضح حيكسر كل القواعد بدون أي ضمير
٣- دايما تلاقيه يعرض المساعدة ودايما يقول لك انا معاكي وفي ضهرك واي حاجة حتعوزيها حعملها وأول ماتحتاجي له بيختفي تماما ، او انه يتحجج باي حجج قهرية من خياله طبعا
٤- خدي بالك بقى من ضمن علاماته انه مش بينسى المناسبات المهمة وبيجيب هدايا وتلاقيه حافظ تاريخ ميلادك وعيد جوازكم ويوم ماتقابلتم وبيحب يحتفل بالمناسبات دي ويجيب لك فيها هدايا ومفيش مانع انه تاني يوم يقلب عليكي لكن دايما يذلك بحتة انه بيجيب هدايا ودايما يتفاخر ادام الناس انه صاحب واجب ،يعني بحلي الصورة
طبعا دة بيخليكي متلخبطة هو بيحبني ولا بيكرهني ، هو عاطفي ولا شرير ، بيعمل لك تشويش وتنافر معرفي
٥- اذا حكيتي له تجربة مؤلمة مريتي بيها في يومك بيسمع لك ويركز في كل التففاصيل وبعد ماتخلصي كلام يبدأ حملة تقليل لمعاناتك في التجربة دي بكل قوته وبمنتهى المرح المستفز وبعدها لو احتاجتي مساعدته او مساندته بيهرب فورا
٦- اذا واجهتيه بغلطة هو عاملها مش بيتجاوب معاكي في الحوار ابدا وبيهرب او انه يعمل لك جاس لايتينج لكن مايعملش غضب نرجسي بسهولة ابدا عشان كدة الحالات بتتلخبط هو نرجسي ولا لا
المشكلة العظيمة في النرجسي المرح دة ان مش بيبان له أي علامات حمرا تقول انه نرجسي في بداية العلاقة ،عمره مايبان ولا يتعرف الا اذا وقع القناع ، امتى بيقع لو لقى بديل للوقود وانتي اكتشفتي انه بيخون او تبان ندالته في موقف صعب مريتي بيه ، غير كدة انتي بتكوني عايشة حياة شبه طبيعية فيها خروجات وسفريات واحتفالات ومش كئيب زي النرجسي العادي ودة بيلخبط ضحيته جدا وبيخليها دايما تلوم نفسها لانه معظم الوقت لطيف وتحس انها هي اللي بتعمل المشاكل وخصوصا ان هو دايما يقول لها كدة ،انتي مش لاقية حاجة تنكدي بيها علينا ، انتي عايشة احسن عيشة وهي ياعيني بتصدقه وبتكدب نفسها ومشاعرها واحاسيسها
31 янв 2022
