لو جوزك نرجسي خفي ازاي تعرفي اذا كان خبيث ولا خفيف ؟
١- النرجسي الخفي الخبيث بيكون متقن الخفاء ومتصلب جدا فيه يعني مش عايز أي حد يعرف عنه أي حاجة اطلاقا والمقصود هنا بحد دي الناس اللي برة الاسرة يعني لو اتعرف على حد جديد مش عايز يعرفه عنده كام طفل مثلا ولا بيشتغل ايه وفين وبيفضل مايتكلمش عن أي حاجة تدي معلومات عن نفسه هو بيشوف انه كل ما كان محدش عارف عنه أي حاجة كل ما كان في امان اكتر ، اما معاكي انتي كزوجة مش حيتكلم معاكي ابدا عن طفولته ولا تجاربه الأليمة في الطفولة ولا أي حاجة ممكن تبين لك أي نوع من أنواع الضعف ، اما النرجسي الخفيف الخفيف والضحية فطبعا فاتحينها ع البحري بيقولوا كل حاجة لكل حد ولاي حد وطبعا دور الضحية دة يعني بيعري ضعفه كله ادامك
٢- النرجسي الخفي الخبيث مش بيتسامح في انك تختلفي معاه في الرأي ، مش بيتسامح يعني فعلا اختلافك معاه في الرأي بالنسبة له جريمة لا تسامح فيها ودة طبعا معاكي انتي تحديدا اما مع باقي الناس فاللي يختلف معاه في الرأي بيعتبره حمار وغبي ومش بيكون عايز يتعامل معاه ولا عايزه يتواجد أصلا في حيز حياته ، الاختلاف مع النوع دة من النرجسيين بيسبب ردود أفعال عنيفة وقاسية جدا مع ضحيته ، اما الخفي الخفي الخفيف فممكن يتقبل الاختلاف على مضض وعلى غير ترحاب طبعا لكن ممكن يتحمل الاختلاف ولو بشكل ضيق جدا واذا ماتحملوش بتكون ردود افعاله اهدى شوية من الخبيث
٣- الخفي الخبيث مينفعش تتناقشي معاه ابدا في أي قرار هو بس اللي بياخد القرارات وانتي بس تنفذي ،انما هو يتناقش وياخد ويدي معاكي أصلا لا ولا يسمع لك ، لانه ميعرفش غير اللي في دماغه وبس لانه عنده مشكلة التفكير ابيض واسود فقط يا اقصى اليمين يا اقصى الشمال معندوش وسطية يا اما موافقاني يا اما مش حسمع لك معايا او علي مش مثلا نختلف ونتفق لا معندوش دة ومش بيسمع غير اللي يتفق مع مصلحته وخططه ورغباته وفقط
٤- الخفي الخبيث معندوش أي احترام لمشاعرك ولا احتياجاتك بشكل أسوأ بكتير من الخفيف ،يعني النرجسي الخفيف ممكن يهتم باحتياجاتك اذا مثلا حيعمل هوفرينج انما الخبيث لما يعمل لك هوفرينج حيشتري لك الهدية اللي هو بيحبها ، يعني يجيب لك مثلا لبس لون هو بيحبه ، اكل هو بيحبه ، لانجري مثلا لو هو جسماني ، يعني الهوفرينج بتاعه بيخدم مصلحته اما الخفي فمش بيكون كدة ، كمان النرجسي الخفي الخبيث مش بيهتم يعرف اخبارك ولا أي حاجة عنك الا اذا عايز يعرف حاجة فيها مصلحة او حاجة حيستغلها ضدك بعدين
٥- النرجسي الخفي الخبيث أحيانا غضبه ميكونش زعيق وانفجارات لكن بيكون نظرات مرعبة شبه الشيطان بالظبط وكلامه بيكون قاتل مش جارح وبس وبيكون متعمق في دواخلك وعارف فين يوجعك ويوجعك بيه واحيانا بيترجم غضبه في شكل صمت عقابي واختفاء مفاجيء من الحياة فانتقامه أحيانا بيكون أسوأ بكتير من الغضب النرجسي والانفجارات ، هو كفيل يكرهك في الحياة من غير ماتعرفي تمسكي عليه غلطة أصلا ، ماهو انتي مش حتقولي للناس بيبرأ لي ولا بيخوفني بعنيه ، ولا بيبص بازدراء ولا بيغيظني ويكيد فيا كل دي حاجات الاهل يقولوا عليها دي حاجات هايفة مينفعش تعملي عليها مشكلة ، بس دة لايمنع انه ينفجر من وقت للتاني اذا حصل مايستدعي
٦- الخفي الخبيث بيحب يجمع حواليه الناس اللي اضعف منه اللي مش حيقولوا له غير حاضر ونعم بداية من ضحيته ونهاية بالبواب والسواق بتاعه ، وطبعا قروده الطائرة ، وطبعا دة لانه مش عايز يشوف أصلا ان فيه في الحياة حد احسن منه ، اما الخفي الخفيف فلا ممكن جدا يقرب من اللي اقوى منه ويستمد منهم قوة زيادة
٧- الخفي الخبيث معندوش حاجة اسمها لاحق ولا حقيقة ، الحق والحقيقة عنده هو مايخدم مصالحه وفقط ، أي حاجة يطوعها عشان تخدم مصالحه وخططه ، وعمره مايقول الحقيقة كاملة مستحيل، ولو من باب انه يحيرك بس.
٨- الخفي الخبيث الحب بالنسبة له اما علاقة حميمة اذا كان جسماني او نخبة ، او انه يحب مصلحته فيكي ،يحب الوقود اللي بتديهوله ،يحب فلوسك يحب مركزك ، دعمك وارائك أي فايدة تيجي منك ، خدمتك وتربية أولاده لكن مشاعر وحب بجد دة طبعا أسوأ بكتييير من الخفي الخفيف ،
٩- هنا نقطة كنا بنختلف عليها كتير والحمد لله كل يوم اتعلم حاجة جديدة ، كنت بقول ان اغلب النرجسيين بتقل نرجسيتهم مع الكبر والضعف والاقي حالات كتير تقول لي لا بتزيد وبصراحة احترت ولقيت الإجابة النهاردة ان النرجسي الخفي الخبيث وكل أنواع النرجسيين الخبيث والمستوى ثالث بتزيد مع التقدم في العمر اما الخفيف واللي اتحول من خبيث لخفيف دة بتقل وتضعف نرجسيتهم مع التقدم في العمر .
جروب ادرس عدوك النرجسي
/ kawthersanad11
صفحتي الخاصة للتواصل معي
/ kawthersanad1.wordpress
رابط حلقة السيرة
• السيرة النبوية الشريفة...
22 ноя 2021
