ايه هي مراحل وخطوات الهوفرينج وازاي تعرفي ان النرجسي حيبدأ هوفرينج؟ وايه رد فعل النرجسي لو رفضتي الهوفرينج
١- اول حاجة حيعمل جس نبض يعني يقرب ببطء وبلؤم بحيث لو رفضتيه يقول لك انتي فهمتي غلط انا بس بسأل عليكي انا أصلا مش ناوي ارجع انا حخطب ويوجعك طبعا ، طيب ازاي حيجس نبضك ؟ حيبعت لك رسالة فيها كلمة ازيك ، او عاملة ايه ، او الأولاد اخبارهم ايه وهو أصلا مكانش بيبص في وشهم وهو مهاعم ، المهم الرسالة مش حتزيد عن كام كلمة ويسكت وانتي لو تجاوبتي يبقى عندك استعداد ترجعي وفتحتي له السكة ممكن بقى يسيبك يومين تلاتة على مايعبرك تاني ماهوا تطمن ، لكن لو انتي متجاوبتيش ولا فتحتي الرسالة او قرأتيها ورديتي بعدها بساعتين بعدم اهتمام فحيحاول تاني ويزود في الكلام شوية
٢- تاني حاجة طبعا لو انتي تجاوبتي وتمام اتطمن بعدها بكام يوم حيتصل ويقول لك محتاجين نقعد ونتكلم ونشوف حنربي العيال ازاي بعد الانفصال او يقول لك محتاجين نتكلم مرة قبل ماننفذ القرار ، او يقول لك عايز اقعد معاكي نتكلم وبس ، المهم حيطلب منك تقابليه وطبعا اذا قبلتي لو مكانش بخيل حيجيب لك هدية ولو غني حيجيب هدية قيمة وممكن لما يقابلك يقول لك اكفر عن غلطتي ازاي اطلبي وانا حنفذ ولو طلبتي حينفذ فعلا بس حياخد اللي حيديهولك تاني طبعا لما ترجعي له لو رجعتي
٣- ثالث حاجة ودي بقى الخطيرة لو انتي رفضتي الهوفرينج وقاومتيه من الأساس ولا فتحتي رسالة ولا رديتي ع الفون وعملتي بلوكات وبعت لك قروده الطائرة وعرف منهم ان مفيش امل حيعمل لك غضب نرجسي مهول وحيهدد فيه بكل حاجة ، حموتك حموت اخواتك حاخد منك العيال ، كل اللي يعرف يهدد بيه حيهدد بيه ، ٤- لو الكلام دة مجابش معاكي نتيجة حيروح لمنطقة اللف وراكي في كل مكان ، مكان ماحتروحي حتلاقيه وحتلاقي كل الناس اللي تعرفك بتكلمك عنه وحيعمل لك حصار مميت يحسسك انه موراهوش غيرك ، وممكن يقف لك ادام البيت عشان يشوفك وانتي نازلة عشان وحشتيه ويقف يستانكي وانتي خارجة من الشغل وممكن ييجي لك البيت ويطلب علاقة مش احنا لسة ماتطلقناش ، وممكن يبدأ يعمل لك تثليث يعني يخطب وينشر صوره عشان تخافي وترجعي او يهددك انه حيتجوز او يبعت لك رسالة حب ويبعت يقول لك اسف جت لك بالغلط او يبعت لك رسالة ولما تردي عليه ميردش أصلا . المهم دي بتكون المحاولة الأخيرة منه !!!
٥- المرحلة دي اصعب مرحلة في الهوفرينج واقذر مرحلة وهي تشويه السمعة ، بيعمل لك حملة تشويه بس مش أخلاقية يعني مش حيقول عليكي اخلاقك وحشة للناس اللي برة يعني ممكن يقول لاولادك بس عشان يقلبهم عليكي ولو هو عارف ان اهلك ضعفاء او نرجسيين ممكن يقول لهم كدة لكن برة دول لا لانه لسة عايز يرجعك فالتشويه هنا حيكون في نطاق مش نضيفة ومهملة ومش بتديني حقوقي الشرعية واكلها وحش وسايبة العيال و.... وهكذا وكل دة عشان انتي تتعصبي وتروحي تتخانقي معاه وبعدين تنهاري وهو يصالحك ويرجعك
٦- حيدور على بدائل وحتلاقيه كل يوم مع واحدة شكل عشان ينقي عروسة او امه تدور له على عروسة المهم حتعرفي انه بيخطب لانه مش حيقدر يعيش من غير مصدر وقود، وفي اثناد المرحلة دي حتلاقيه بيراقبك ومركز جدا عليكي عشان ميفوتش فرصة او نقطة ضعف يدخل لك منها قبل مايستقر علي المصدر الجديد
طيب ازاي تعرفي انه حيبدأ هوفرينج ؟ دة لو انتي عايشة معاه ومانفصلتوش لسة ، بتلاقيه وقف هجوم وبدأ يشكر فيكي عند قروده الطائرة او يشكر فيكي لأهله او اهلك او لاولادك ، بدأ يكون هادي ومبتسم وبيرد كويس ع الأولاد وعليكي بدأ يبطل التكشيرة ونذير الشؤم اللي راسمهولكم طول الوقت وبدأ يفوت أخطاء يعني اللي بالنسبة له أخطاء او خلينا نقول بطل يقف ع الواحدة ، بدأ يلبي طلبات الأولاد بهدود ويعاملهم كويس ،
25 окт 2021
