لما ربنا ينصرك ع النرجسي ويضعفه ويرعبه لدرجة انه يبقى عايزك تسامحيه بس نرجسيته مانعاه يقول لك سامحيني انا غلطت في حقك
لما النرجسي الخفي الخبيث المدرك لنرجسيته يكون عايزك تسامحيه ومش عايز يقولها ويلف حواليها
لما النرجسي يقول لك سامحيني وهو مناخيره في السما ومش عايز يقولها صريحة
شوفي النرجسي لما بيكون خفي خبيث ومدرك لنرجسيته او حتى خفيف وعرف وفهم انه اذاكي وبعدين اتعرض لكارثة حياتية او مرض موت او حتى شاف حد قريب منه وهو بيموت او كبر في العمر وكل اقرانه بيموتوا بس ايه هو مازال نرجسي بس خايف من اخرته السودا ومدرك ان ربنا مش حيسامحه الا اذا انتي سامحتيه . بيعمل ايه ؟ ححكي لكم مواقف حصلت مع حالات عشان تشوفوا ان الصابرين بخير وان ربك للغفلان حارس وان حقك مش حيضيع لادنيا ولا اخرة
واحدة من الحالات بتقول انها بعد ماقويت وبقت لها مصدر دخل ومبقاش فارق معاها النرجسي وهو ربنا اضعفه وكسره وحصلت له كوارث مادية وأصبحت هي اللي بتصرف عليه بدأ يلجأ لربنا (طبعا مش شرط انه يكون لجوء قلبي حقيقي ودة اللي حنفهمه دلوقتي) المهم هو عايزها تسامحه عشان ربنا يديه بقى الفلوس تانس ويحل له مشاكله لانه عارف ان اللي حصل له بسبب ظلمه لها المهم طول الوقت يتكلم معاها عن التسامح وان ربنا بيحثنا علي التسامح ولكن من غير مايقول لها سامحيني لكن يقول بس أوامر ربنا اننا نسامح ونغفر ونعفوا عشان نروح الجنة وهي طبعا مش بتريحه ولا بتديه أي ردود طيب ليه انا قلت لك انه مش لجوء حقيقي لربنا لانه لو لجأ بجد لربنا يعني بدأ يشفى من النرجسية يعني كان راح لها دوغري وقال لها انا ظلمتك سامحيني وخلصت ويلجأ بقى لربنا انه يلين قلبها ويديها الحب والحنان والمساندة اللي كان حارمها منهم يمكن تقدر تسامحه الا انه مازال نرجسي عايزها تسامحه من غير مايبذل أي مجهود وكمان خايف على كرامته لاهي ترفض تسامحه ، يعني لسة زي ماهو نرجسي
حالة تانية بتقول انها لما تعافت وبدأت تكتشف النرجسيين اللي حواليها وبدأت تقول له فلان دة نرجسي وفلانة دي نرجسية من غير ماتقول له ان هو نرجسي نهائيا هي فهمته النرجسية عن طريق الشخصيات اللي حواليه وهي ذكية جدا بدأت بالنرجسيين اللي حواليه هو يعني اول حد كان جوز اخته اللي مدوخها ومطلع عيناها وعين أولادها وبدأت تفهمه ان الراجل دة نرجسي وبدأت تفهمه صفاته وتفسر له ولاخته تصرفاته وتسمع الفيديوهات وتقول له وعرفت اخته بالقناة يعني هي كدة بتدور على مصلحة اهله وماتهمتوش بأي حاجة خدي بالك ، المهم ان زوجها كان خطيب مسجد يعني مرجعية دينية عالية وفاهم كل حاجة كويس جدا فطبعا ادرك نرجسيته لكن هل عالج نفسه ولا فكر في العلاج ؟ لا هو كل اللي حصل انه عارف ربنا حيعمل فيه ايه وخصوصا انه شايف معاناة اخته وعارف ان ربنا مش بيفوت ،المهم هو بقى عايزها تسامحه برضه بدون مايعمل أي مجهود ولا حتى يصلح نفسه ولا حتى يقول لها سامحيني انا ظلمتك لا دة بقى بيتلاعب بيها عشان تسامحه تخيلوا الجبروت ، بقى لما يلاقيها بدأت تخرج الناس النرجسيين من حياتها مثلا واحدة صاحبتها ، وامها وبدأت تتعامل معاهم بالمعروف لكن عن بعد خرجتهم تماما من تفاصيل حياتها لكن بتعاملهم زي الفل بنفس الشكل الخارجي للحب اللي كانت بتعاملهم بيه قبل ماتعرف لكن مش من قلبها بعقلها وبس وهو طبعا شايف كل دة يقوم يقول لها ايه ؟ انتي كدة بوشين انتي بتعامليهم كويس عشان مصلحتك انتي مفروض تسامحيهم مش تعامليهم كويس وانتي مش بتحبيهم ،يعني هي عارفة انهم اذوها ومع ذلك بتعاملهم كويس لوجه الله وخصوصا أمها وصديقتها بحكم الزمن والعشرة وهي ضعيفة ومسكينة وطبعا الضحية متعاطفة لكن حطت حدودها وبتتعامل معاهم لوجه الله وهو يقول لها لا انتي كدة بوشين لازم تسامحي وبدأ يديها دروس في التسامح وطبعا هو بيتكلم عن نفسه مش عن مامتها ولا صاحبتها اللي طول عمره مش بيحبهم وبيقول لها دول بيكرهوكي ومش بيحبوكي فجأة كدة عايزها تسامحهم وتتعامل معاهم بصفاء؟
حالة تالتة بقى دي النرجسي عندها كبر واقرانه بيموتوا ومعظمهم في المستشفيات وبدأ يحس بقرب النهاية وبرضه نفس الفكرة دروس التسامح والعفو عند المقدرة يعني اعتراف صريح بانه اصبح ضعيف وانتي قوية وتقدري تعفي عنه بس هو مش فاهم ان انتي أصلا ماعندكيش المقدرة انك تغفري له وانك تسامحي على عمرك اللي سرقه وشبابك اللي بلعه وبكاكي اللي لسة مابردش هو مش فاهم ان انتي لسة ماعندكيش المقدرة بس ربنا موريه انك تقدري عشان يزيد ذله لكي ،المهم انه بيتكلم عن المغفرة كل يوم وان ربنا بيغفر للي بيسامح وربنا بيقول ارحموا ترحموا ،عايزة أقول له لا ياشيخ هو ارحموا ترحموا دي مش بتنطبق عليك طب انت ارحم قهرها واعتذر وقول لها سامحيني وبوس ايديها ورجلها وحطها فوق راسك واديها شيء من حقوقها عشان تبقى انت بترحم فترحم ولا انت عايز تترحم وبس
عايزة أقول لك لو مش قادرة تسامحي ماتسامحيش ولو أصلا ماعترفش بذنبه وقال لك سامحيني فتأكدي انه مايستحقش انك تسامحيه واوعي تتأثري بالمهاترات اللي بيقولها دي لانه كداب هو اخد منك الدنيا وفاكر نفسه حياخد منك الاخرة كمان ،هو متابش ولا اتغير ولا شفي من اضطرابه هو لسة زي ماهو بس ربنا يشفي صدور قوم مؤمنين ، طبعا اللي عندها القدرة علي العفو هنيئا لها لكن محدش يثقدر يجبر حد على العفو في سنين العمر
11 окт 2024
