ازاي نتعامل مع النرجسي الخفي الخبيث تحديدا اذا مضطرين نستمر معاه
شوفي انا حقول لك تعملي ايه بس انا مش بنصحك تعملي كدة الا اذا كنتي حقيقي معندكيش حلول ابدا ابدا
١- اول حاجة واهم حاجة وكل مرة بقولها وحفضل اقولها مينفعش تقرري تقعدي وتستمري مع النرجسي الا لو كنتي تعافيتي تماما من ادمانه ومن الصدمة طبعا ، يعني اول حاجة حتعمليها حتبدأي تشوفي فيديوهات التشافي او تستعيني بمتخصص يعالجك من الإدمان والصدمة لازم لازم ولما تحسي ان النرجسي مش فارق معاكي مش تقولي لي خلاص انا بقيت اكرهه فكدة انا خفيت ، لا عشان تكوني خفيتي لازم تكوني لا بتكرهيه ولا بتحبيه ولا بتتغاظي منه ومن تصرفاته نهائيا فعلا حرفيا بيكون بالنسبة لك زي قط بتأكليه وتشربيه ولو لعب معاكي ممكن يخربشك فتبعديه عنك عشان ميخربشكيش تاني ، اذا وصلتي للاحساس دة يبقى ساعتها تقدري تاخدي قرار صحيح اذا تكملي او تهربي
٢- تاني حاجة انتي اخدتي قرار تكملي وانتي فاهمة الشخص اللي معاكي وعارفة خلاص كل عيوبه فمفروض حتتقبليها ولو مؤقتا لحد ماتقدري تهربي ، طيب خلينا نشوف من خواص الخفي الخبيث اللي قلناها في حلقة ازاي تعرفي انه خفي خفيف . قلنا انه بيحب يكون غامض ، يعني اهم حاجة تعمليها انك ماتفضحيهوش ولا تبيني له انك شايفة عيوبه ، عايزة تبقي حبيبته وريه انك شايفاه احسن حد حتلاقيه بقى هادي معاكي فترة من الزمن داري عيوبه حتى عنه هو واشكري فيه ادام اهله
٣- قلنا كمان انه مش بيتسامح في انك تختلفي معاه في الرأي ، طيب ماتختلفيش ، امال اعمل ايه ؟ شوفي انتي لما يكون فيه حاجة مهمة ولازم تبيني له انه مينفعش رأيه ، دة لو حاجة تخص البيت والأولاد ، تقولي له انك متفقة معاه في الرأي طبعا بس تروحي جايبة حد مهم بالنسبة له ودايما شايفه اعظم حد وتحسي كدة انه نفسه يكوون زيه ولو حتى كان سياسي او عالم يعني حد ملكوش بيه أي صلة وتروحي قايلة له بس تخيل انا قرأت ان فلان عمل كذا كذا لما اتعرض للموقف دة ، وطبعا مش كل مرة حتقولي نفس الشخص يعني نوعي ، المهم انك توصلي له انك متفقة معاه مع ان فلان عمل العكس فانتي محتارة وممكن كمان تقولي انك مش مع فلان دة ولا موافقاه في الحالة دي هو حيقول لك لا تصدقي هو عنده حق ، خصوصا انك مختلفة معاه ، يعني انتي لازم تتفقي معاه في الرأي ولا تعترضي على عظمته ابدا ، بس كوني ذكية
٤- هو ملوش علاقة باحتياجاتك فانتي عشان تقدري تتعايشي معاه مفروض ماتتوقعيش منه انه يلبي طلباتك ابدا ابدا ولا احتياجاتك ولازم تتحايلي عشان تاخدي منه احتياجاتك المادية اذا كان بخيل معاكي وطبعا دة حيكون عن طريق التلميح ان الناس بتعلق على لبسك وبتحسدك على جوزك اللي بيدفع كل دة في لبسك فدة حيخليه يدفع اكتر ، اما اذا كان أصلا مش بيدفع فانتي ممكن تقولي له ان الناس بتقول لك انتي ازاي زوقك وحش وانتي متجوزة فلان الشيك دة وتقولي له تخيل بقى لو عرفوا انك مش بتجيب لي لبس زي مابتجيب لنفسك وطبعا تبعدي فورا من ادامه او تغيري الموضع متديهوش فرصة يعمل لك غضب نرجسي ولو قدرتي تقولي الكلمتين دول في وقت تكوني حاسة انه له معاكي مصلحة أيا كان نوعها والأسلوب دة بينفع جدا مع الجسماني والنخبة طبعا لما يكون عايز علاقة ، والعقلاني والضحية لما يكون عايز مصلحة منك . المهم ان احتياجاتك المادية مش حتاخدية منه غير بالتلاعب والتحايل
٥- من صفات الخفي الخبيث انه غضبه النرجسي مش بيكون انفجارات لا بيكون تصرفات تغيظ واستفزازات تخلي اللي ادامه ينفجر وينهار وهنا لو انتي متعافتيش مش حتقدري تواجهي الكلام دة انما بقى لو تعافيتي وشوفتي فيديوهات الثقة بالنفس وفيديوها ازاي تكوني اقوى من النرجسي صدقيني دول حيخلوكي متخافيش منه وقبل دول قوي يقينك بربنا قربي من ربنا واسندي عليه وادعي يشيل عنك ويقويكي ويشيل الخوف من جواكي ، أصلا لو عرفتي ربنا صح عمرك ماحتخافي من بني ادم عشان كدة قال لك ايه قال ان ربنا يحب المؤمن القوي ، ليه القوي طب والضعيف ذنبه ايه؟ ذنبه انه ماقربش من ربنا ،ذنبه ان ضعفه سببه ان مش مدرك اد أيه ربنا قوي واد ايه ربنا عادل واد ايه ربنا حنان ومنان وحيحميه وحيقف جنبه وحيسنده ، لو هو كان قرب وجرب كان عرف وكان بقى قوي ، لو كان صبر وما اعترضش على امر الله ولا قال ليه يارب بتعمل فيا كدة ليه سايبه يعمل فيا كدة لو كان قال يارب فوضت امري اليك بصدق والله ماكان حيخذله وكان حيشوف فعلا اللي مش عارف يشوفه ولا عارف يفهمه ، لكن للأسف هو بيتكبر على ربنا ويسأله وهو لايسئل عما يفعل ، هو مش عاجبه مثلا ان ربنا ابتلاه ويفضل يعترض ويتمرد على ربنا ازاي ربنا سايبه يتبهدل وهو مش واخد باله ان ربنا بيشيل عنه ذنوب مثلا او بيرفع درجاته او بيبتليه عشان ينضفه ويجهزه عشان ينفع انه يدخل الجنة ، او بيجهزه لمهمة حيعملها بعدين ولازم يتعلم حاجة معينة عشان يقدر يعمل المهمة دي ، حكمة ربنا فوق تفكيرنا وفوق ادراكنا وعمرنا ماحنفهمها طول ما احنا معترضين ومش عاجبنا ، لكن اذا استسلمنا لامر الله هو اللي حيحلها لنا بقدرته وكمان حنكون قريبين منه وحنفهم اننا في كنف ملك الملوك يعني محدش يقدر علينا ولا ينفع نخاف من حد بالعكس المفروض العالم كله يخاف مننا ، الشيطان كان بيخاف من سيدنا عمر بن الخطاب وكان لو مشي من شارع الشيطان يمشي من الشارع التاني ، ليه ؟ لان عمر بن الخطاب كان قوي بالله وبس
نرجع للنرجسي الخفي الخبيث لو انتي قوية بربنا تفتكري حيقدر يستفزك او انتي لسة حتخافي منه ؟ اللي بقوله دة من قصص الحالات ، النرجسي الخفي الخبيث بقى بيخاف من زوجته لما قربت جدا من ربنا وبدأ يقلل من اذاه لها لانه بيخاف تدعي عليه ، مهما كان مسنود من اهله ولا من مين انتي مسنودة من ربنا ، مين حيكون اقوى ؟
جروب ادرس عدوك النرجسي
/ kawthersanad11
صفحتي الخاصة للتواصل معي
/ kawthersanad1.wordpress
رابط حلقة السيرة
25 авг 2024