ليه النرجسي بيتهمك في شرفك ؟ 

لينك حجز الكورس ع الواتس:
chat.whatsapp....
رقم حجز الاستشارات : ٠٠٢٠١١٥٠٥٨٦٠٥٢
لما النرجسي يتهمك في شرفك؟؟
ليه النرجسي بيتهمك في شرفك ؟ وهل كل النرجسيين بيعملوا كدة ؟
شوفي النرجسي زي ما احنا عارفين بيحب يشوفك منهارة وبتعيطي وبتخبطي راسك في السقف مش في الحيط وبس وطبعا فاهمين انه كدة بياخد وقود سلبي ، طيب ازاي بقى ينجح في انه يوصلك للانهيار دة ؟ دة بيتوقف عليكي انتي يعني ايه ؟ يعني انتي حساسة جدا لإيه وايه اللي بيعصبك ويعفرتك ؟ وايه اللي لو قاله لك حتتنططي؟ بعضكم الغيرة والخوف من الجواز التاني فيفضل طول الوقت يقول لها حتجوز ،واحد من النرجسيين الخفاف قال لي انا مش حتجوز ولا حاجة انا بغيظها وهي بتتغاظ ، يعني عايز يقول ان هي خفيفة وبتتغاظ وهو دة اللي فعلا جوة النرجسي انا حعرف ايه اللي بيغيظك ولما احتاج وقود حقوله لكي ، طيب كله الا العرض والشرف ليه وازاي يتكلم فيهم؟ ماهو انتي أصلا واحدة محترمة ونضيفة ومالكيش في العك واكيد متربية في بيت محترم واهلك علموكي الحلال والحرام فأكيد حتغيري على شرفك ومش حتسمحي لحد يخوض فيه فهو في اول العلاقة بيجس نبضك في كذا حاجة عشان يعرف فين نقطة الضعف اللي كل مايدوس عليها تصرخي ، فبيعمل لك زي اختبار الحساسية ، مثلا وريني موبايلك دة انتي بتكلمي مين او مين اللي اتصل وماردتيش عليه او مين الراجل اللي عندك ع الفيس دة ، أي حاجة كدة من بعيد ماتتمسكش عليه فانتي لو ردك كان بمنتهى الهدوء والثقة خد ياحبيبي الموبايل ولما تلاقي حاجة قول لي ، او تاخديها بتريقة دا واحد صاحبي بس اكيد مش حرد عليه ادامك وتاخدي الموضوع بضحك واذا زودها وقلب فانتي لازم تقلبي وتعملي له غضب وازاي انت تتكلم عني كدة وانا مش زيك ولا زي اللي انتي بتمشي معاهم وانت مش واخدني من الشارع واذا انت شايف كدة سايبني ليه على زمتك وقابل ليه على نفسك . اذا دة رد فعلك من اول مرة مش حيكررها ومش حييجي عند الجزئية دي تاني ابدا ، اما بقى لو خفتي واترعشتي ووقفتي تدافعي عن نفسك ووالله ماكلمت حد ووالله ما اعرف حد وتبكي وازاي تقول عليا كدة وتديه الانهيار اللي هو عايزه حتكون دي لعبته اللي حيمسكك منها سنين وسنين ، حالة متجوزة من عشرين سنة ومن أيام الخطوبة وهو بيتهمها في أي حد وهي تتنطط والى الان بيتهمها لكن الالفاظ بقت قذرة والأسلوب بقى سافل وللأسف أولادها كبروا وبقوا يقولوا لها سيبيه ماترجعيلوش تاني ،
طول ماانتي بتخافي وطول ماانتي بتنهاري طول ماهو مش حيبطل ، واحيانا بيستمر على مر السنين حتى بعد ماتفوق الضحية وتبطل تنهار بس هو عارف انها خايفة من الفضايح وخايفة يقول الكلام اللي بيقله لها خايفة يقوله للناس فبيفضل يقوله لها من باب التخويف والإرهاب وانه يفضل كاسرها وواهمها ان فيها حاجة وحشة وانه يقدر يفضحها ويشوه سمعتها .
حالة بطلت تنفعل ولا تعلق واحيانا تقول له تمام اكمل لك انا الأسطوانة المشروخة وبعمل كذا وبعمل كذا ومابقتش تديه وقود سلبي ومع ذلك مابطلش ليه؟ لانه عارف انها خايفة حد يعرف انه بيقول لها كدة مش مدركة ان لو حد عرف انه بيقول كدة حيتفوا عليه هو لان كل الناس عارفاها وعارفة اخلاقها ، خايفة يسوء سمعتها في شغلها وخايفة على سمعة بنتها وخايفة على مستقبل أولادها يعني هي عبارة عن كتلة خوف وبس وبالتالي هي فريسة سهلة بيلعب بيها زي ماهو عايز
المهم في النهاية الناس بتسأل طيب هو ازاي يتهم زوجته في شرفها ماهو شرفه ؟ حنرجع نقول ان زوجته وبنته واخته وامه بالنسبة له مكن وأدوات ومفيش حد بيهتم بشرف المكنة بتاعته ولا الحيوان الاليف بتاعه بالعكس بيروح يجوزه وللأسف هو دة النرجسي لا قيم ولا اخلاق ولا نخوة ولا غيرة ع الشرف ولا أي حاجة ابدا
المفروض ان النرجسي لو اتهمك في شرفك تقومي الدنيا وماتقعديهاش وتوقفي الموضوع ع الطلاق وتحطي خط احمر وتقولي له فورا لما انت شايف اني كدة ازاي سايبني على ذمتك ازاي قابل على نفسك ، صدقيني هو لو ناوي طلاق والله والله حيطلق من غير أي سبب وناس كتير شافت دة فجأة بتلاقي ورقة طلاقها او بيرمي عليها اليمين بدون مقدمات ،فمتخافيش وماتسمحيش له انه يقنعك انك وحشة ومعيوبة ويخليكي تخافي لا الناس تعرف وانتي أصلا مفكيش أي حاجة تشينك ، كرامتك يابنتي اهم حاجة في حياتك