#احد_زرگر
مے چُھم در سینہٕ لـلہٕ وُن
یہ چُونے نار عشقو
ژٕ چُھکھ بے کیٖنہٕ بے شک
مگر بے عار عشقو
خندے چأنی آفتِ جان
بندٕ بندے میہ تٔرِم کان
رِندن کُیتھ بلکہِ طوفان
یہِ چون گُفتار عشقو
ژے تہٕ مے آشنأیی
اول ٲس اِبتِدأیی
تیلے أوسُے فنأیی
یہِ کُل سمسار عشقو
نظر چأنی مثلِ جادو
اثر چُھس قتلِ آہو
گُزَر تتھ وُچھ مے ہر سو
کران شیکار عشقو
ژٕ چُھکھ سارِنےٕ اندر طاق
ژٕ کُن عاشق چھِ مُشتاق
چُھ چانے جلوٕ آفاق
رٔٹِتھ خُمار عشقو
ینَے گوہم ژٕ پیدا
تَنے کُرتھس بہٕ شیدا
ونے کس چون سودا
چُھ کُیتھ دشوار عشقو
گہے آہم بہ پرواز
گہے آہم بہ تُرکتاز
گہے آہم بصد ناز
کبک رفتار عشقو
مے آہم خوردٕ سالی
گیٔم دیوانہٕ چألی
ژے چُھے اِسمِ بنگألی
سیٹھاہ زوروار عشقو
ژٕ یود أوسٕہم سَرُک تاج
دِلس کُورتم مے تاراج
ووں دوپتھم جان دِم باج
یہِ کُیتھ گٹہٕ کار عشقو
احٓد زرگر بہ اُلفت
بنیوو دیوانہٕ ژیے پَتھ
ژٕ گوہم ونتہٕ کس پَتھ
کٔرِتھ بزگار عشقو
گلوکار گلزار احمد میر
15 окт 2024
