هل النرجسي عايز يحطم حياتك بعد ماتعافيتي وخلصتي منه؟
النرجسي كاره لسعادة الاخرين او بمعنى اصح سعادة الاخرين تثير اشمئزاز النرجسي دة مش كلامي دة كلام دكتور راماني ،هي بتقول ان انتي بعد ماتتعافي من الإدمان ومن الصدمة بتبدأي تشعري بالسعادة الحقيقية اللي النرجسي كان حريص انك ماتشعريش بيها ابدا حتى في لحظات الهوفرينج لانه كان دايما يتخللها شوية تحقير وتكدير زي ما كلكم جربتم ، المهم انك بعد مابتفهمي انه نرجسي وبتستردي نفسك وروحك وتبدأي تستنشقي هوا نظيف هو بيحس انك بدأتي تحسي انك سعيدة سواء كنتي عايشة معاه او كنتي سيبتيه وبعدتي عنه ،في كل الأحوال هو مش حيكون مبسوط لو شافك سعيدة وبتبدأي حياة جديدة وبتقفي على رجلك من جديد ، بغض النظر عن احساسه انه فقد السيطرة عليكي ، هو أصلا مايقدرش يشوف حد سعيد ، أحيانا بيكون لانه نرجسي سادي واحيانا بيكون لانه اناني ومش عايز يكون حد عنده حاجة هو مش عارف يحصل عليها واحيانا بيكون لانه كاره تفوقك عليه واحيانا لانه عايز ينتقم منك لان كسيبتيه او لانك اتغيرتي وكسرتي القالب اللي قعد سنين يحطك فيه ، في النهاية الحصيلة اللي تهمنا انه مش عايز يشوفك سعيدة ، طيب بيعمل ايه عشان يحطم سعادتك دي؟ تعالي كدة نشوف هو حيعمل دة ازاي لو انتي عايشة معاه ولو انتي أصلا سيبتيه واتطلقتي وممكن كمان تكوني حتدخلي في علاقة جديدة وحتتجوزي او اتجوزتي .
في حال انك عايشة معاه وخلاص سيطرتي على الحياة ونجحتي في شغلك وبقيتي بتدخلي لنفسك دخل كويس وهو اصبح مدرك انه ملوش لازمة ومش عارف يسيطر عليكي حيبدأ يبوظ لك حياتك بطريقتين الأولى الهوفرينج الشديد اللي بيه يحاول يلخبطك ويوهمك انه بيتغير وانه عايز يرجع لربنا ويتعالج والموضوع دة بيبدأ يبقى أسلوب حياة وبتلاقيه فعلا بيعدل سلوكه وبيحافظ على صلاته وممكن مايسيبش المصحف من ايده وبعضهم يصلي في المسجد ويبدأ يوريكي شخصية جديدة تماما وانتيب تنخدعي فيها وتقولي حيتعالج وبيرجع لربنا وواخيرا حيكون زوج سوي ونعيش حياة اسرية سوية ، وبمجرد مايحس انك صدقتيه وكالعادة حيرزعك الألم اللي ينكد عليكي لمدة كام شهر ويرجعك لورا كام سنة ويفسد لك مخططاتك ويحطم نفسيتك بشكل في منتهى القسوة وخدي بالك انه بعض الحالات النرجسي بيستمر في الهوفرينج دة سنة وسنتين وهو عنده طولة بال في التخطيط ملوش مثيل ، واد مابيطول في الهوفرينج اد مابيكون التحطيم اقوى واشد ، وغالبا طريقة الهوفرينج هي اللي بيستخدمها النرجسي اكتر في حالة نجاحك وفي حال انك بقيتي قوية جدا ومايقدرش عليكي ، لان الطريقة التانية بتكون بالإرهاب والتهديد ولو انتي تعافيتي تماما الطريقة دي مش بتجيب معاكي نتيجة .
اما لو انتي سيبتيه ولو حتى اتطلقتي وبرضه نجحتي وبدأتي تعلني عن نجاحاتك او حتى ما اعلنتيش لكن هو عرف من الناس حواليكي وحس انك عايشة سعيدة مع اولادك او حتى اتجوزتي واصبحتي عايشة حياة مستقرة وسعيدة في الحالة دي برضه بيحاول يوصل لك بكل الطرق مش بس عشان احلويتي في عينه تان يلانه النجاح بيغريه وبيكون عارف انه حيحلي صورته تاني بيكي لا كمان لانه عايز يفسد سعادتك والدليل على كدة انه ممكن يكون طلقك طلقة بائنة ولا امل له في انك ترجعي له ابدا الا انه بيحاول يعمل لك هوفرينج مكثف ، طيب ليه هوفرينج وهو مش نافع رجوع ؟ عشان يلخبطك ويندمك او يبوظ علاقتك الجديدة او انه يفسد حياتك بأي شكل .
طيب اللي عايشة مع النرجسي واللي اتطلقت حلهم واحد في الحالة دي ، الكتمان ، ماتعرفيهوش عنك أي حاجة لا نجاحك ولا فشلك ،خبي حالك عنه ولو حتى اتطلقتي وحتتجوزي او اتجوزتي مفيش داعي للاعلانات عن حياتنا ع السوشيال ميديا كأننا بنعلن عن منتج او بنتاجر باخبارنا ،ملوش أي لازمة ان حياتنا الخاصة تكون مشاع وكل اللي رايح واللي جاي يعرفها ،اللي بيحبنا واللي بيكرهنا ، خصوصا لما يكون في حياتك نرجسي ، خبي واستعينوا على قضاء حوائجكم بالكتمان ، حتى وانتي عايشة معاه كفاية يعرف اللي بيشوفه مش لازم يشوف ويسمع ، واوعي تصدقيه اذا قال لك تبت ولو تاب فعلا حتعرفي وحتشوفي بعينك توبته لكن هو كداب وحتلاقيه تاب معاكي انتي بس وبيتعامل مع الناس بنفس السوء وحتلاقيه بيعذب أولاده او اخواته او امه بنفس الشكل اللي كان بيعمله معاكي ، حتلاقيه استبدلك كمصدر وقود مؤقتا عشان يوهمك انه بيتعالج ، اوعي تنخدعي واوعي تصدقيه
25 авг 2024