١٠ حاجات مهمة هتتعلميها من حياتك مع النرجسي ... كوثر سند 

عشر دروس من الحياة مع النرجسي
١- انتي نفسك ولازم تتمسكي بآرائك وافكارك ومشاعرك ومتبرريش نفسك لحد ، انتي انسان مستقل مينفعش حد يعملك دمية ، انتي مينفعش تدي حب بدون ماتاخدي حب ، مفيش علاقة صحية بيكون العطاء فيها من طرف واحد والا متبقاش علاقة .
٢- الاحساس الدائم بالذنب وعدم الرضا عن النفس حاجة مش صحية مش هي دي النفس اللوامة اللي ربنا عايزها ربنا عايزك تراقبي نفسك وتمنعيها عن المعاصي ولو تكاسلتي عن صلاتك او اي طاعة تلومي نفسك ، دة ملوش علاقة بالاحساس بالذنب بدون سبب او لانك مقدرتيش تعملي حاجة لحد لانك مريضة مثلا او معندكيش وقت او عندك مسئوليات ، اعملي اللي تقدري تعمليه وارضي عن نفسك وربنا نفسه قال لا يكلف الله نفس الا وسعها ، انتي ليه تكلفي نفسك اكتر من طاقتها ولما متقدريش تحسي بالذنب ، الاحساس بالذنب اتزرع جواكي بايد النرجسي سواء وانتي طفلة او لما تزوجتي ، ماتستسلميش للاحساس دة وقيسي تصرفاتك علي رضا الله وانتي حتبطلي تحسي بالذنب ، بس لازم تبحثي كويس وتفهمي حقوقك وواجباتك لان غالبا انتي مش عارفة حقوقك وعارفة بس واجباتك
٣- مفيش حد شغلته انه يسعد غيره ومفيش حد مطالب باسعاد الاخرين ودي صفة غير صحية فيكي ولازم تتخلصي منها ،
٤-السعادة الحقيقية بتيجي من الداخل ودي اللي بتدوم دي اللي اصلها الرضا عن الله وعن النفس ، اما السعادة اللي بتعتمد على الاخرين فدي مؤقتة وبتزول بزوال المؤثر ، عشان كدة متحاوليش تسعدي حد لانه لو محاولش يسعد نفسه عمره ماحيكون سعيد ولا تعتمدي علي حد انه يسعدك ، دة ملوش علاقة اننا لما تكون علاقتنا ببعض كويسة حنكون سعداء واننا لما نتجمع ونخرج ونعمل الحاجات اللي بنحبها حنكون سعداء لكن مش حنكون سعداء لما نعمل دة واحنا داخليا مش راضيين ومش سعداء داخليا
.٥- الحب والاخلاص والاتزام محتاجين وقت مش بيحصلوا من اول نظرة ولا في اول اسبوع ولا شهر ولاثلاث شهور ، دة مش طبيعي اللي بيعمله النرجسي في اول العلاقة والمفروض انك فهمتي ان دة تجربة فاشلة فحاولي تنتبهي لنفسك بعد كدة في كل علاقاتك
٦- لازم يكون في حياتك ناس اسوياء ايجابيين مش منتقدين طول الوقت لازم يكون عندك علاقات صحية عشان تقدري تحققي التوازن النفسي
٧- لما تدخلي في مناقشة كوني صادقة وصريحة واتخلصي من الخوف والخجل اللي زرعهم فيكي النرجسي ، الحوارات العقلية عمرها ماحتكون مفيدة اذا خلت من الصدق والصراحة والا حتتحول لجدال مفيش منه اي فايدة غير انهاك القوى ودي فايدة للنرجسي فقط عشان كدة الافضل انك متدخليش في نقاشات ولا حوارات عقلية مع النرجسي ابدا
٨- لما تكون العلاقة سوية والمعاملة فيها عدل بما يرضي الله ، مش حيكون مهم مين احسن من مين ولا مين اقوى ولا مين اكتر علما ولا مين اغنى ، لو الاشخاص اسوياء كل واحد في العلاقة حيتمنى كل الخير للتاني حتى لو الخير دةحيخليه احسن منه ، ممكن دة يخلق روح المنافسة الشريفة اللي الغرض منها اننا نقوي بعض ونشجع بعض ونرفع بعض ونشد همم بعض
٩- لازم تكوني اتعلمتي انك متتنازليش عن حقوقك لاي حد ولا حتى لاولادك لان التنازل عن الحقوق اول خطوة من خطوات التنازل عن النفس ( دة مش معناه انك لو لقيتي اولادك محتاجين او معووزين او في مأزق تكوني قاسية عليهم وترفضي تديهم من حقوقك ، لا طبعا انا بتكلم عن الاستمرار في التنازل طول الوقت تسيبي حقك لغيرك )
١٠ -لازم نحترم اراء الاخرين وخصوصا اولادنا اللي بعضنا بيعتبرهم ملكية خاصة ، وطبعا النرجسي اول واحد بيعتبر اولاده ملكية خاصة وهو لازم يتحكم في كل تفاصيل حياتهم ، وبيلغي ارائهم ، لازم ننتبه اننا مجرد مرشدين للاولاد خصوصا بعد سن العشرين ، خلاص احنا مجرد نقول رأينا وملناش نتدخل في قراراتهم هم كبروا ولازم نحترم ارائهم ونحترم شخصياتهم وخصوصياتهم
لازم منتأثرش بصفات النرجسي ونكون منتبهين من انها بتقفزش بداخلنا بدون مانشعر ونبدأ نعامل اولادنا واللي حوالينا بطريقته
اكونت الفيس بوك
www.facebook.c...
جروب ادرس عدوك النرجسي
/ kawthersanad11