#احد_زرگر
ینهٕ ساقین دیتتُنم جام مخمور
تنهٕ ووتُم ألران زٕے کنہٕ دؤر
ونهٕ واسؠ گو میون منہٕ کستور
تنہٕ ووتُم آلران زٕے کنہٕ دور
راز پرزن وعظ چُھم فرماوان
ناز حرفن تن من گو اویزاں
تاز ضربن ونهٕ وان ساز وسنطور
تنہ ووتم آلران زٕے کنہٕ دور
منقل زال بِلکُل گال وعدٕ پال
تل پاتال ژھل پھر چکہٕ مار ڈال
پھل سنبال دَل دِتھ گژھ منظور
تنہ ووتم آلران زٕے کنہٕ دور
ننہِ ترٹہٕ یُس کھٹہ منز باگ سینس
انہِ گٹھ وچھ خورشید نازنینس
کھونِہ منز رٹہ نور ژھٹہٕ کرِ گورگور
تنہ ووتم آلران زٕے کنہٕ دور
سیود أنزرُن یود روزِ ویود قالس
تھود قیمت پیود بوز تتھ حالس
دود تجلیٰ ڈیشتھ سیود کوہِ طور
تنہ ووتم آلران زٕے کنہٕ دور
ٔکنؠ تلؠ کٔرؠ دایکن ننؠ کتھ فاش
سنؠ پھٔلؠ کٔر ژون دریاؤن ناش
سنؠ ڈٔلؠ دراے ؤنؠ دینہ کینہہ سنؠ ژور
تنہ ووتم آلران زٕے کنہٕ دور
سیٖم بدنس جیمچ ژھاے پیہ بون
چیٖم چسپیدٕ گراے دِتھ کر الفن
نیٖم شب وچھ حورِمیُمک نور
تنہ ووتم آلران زٕے کنہٕ دور
سیر عالمن دارِ درواز وتھؠ تراو
سر ہندکی گوہر پرزلاو واد
زیر و بم چرخِ دُنیا دویِہ پھوکہٕ پھیور
تنہ ووتم آلران زٕے کنہٕ دور
دیارن کم لال مے نألؠ ترأوِم
شیارن اکه اکہ پرکھأوِم
میخوارن دیُت خُمارن فتور
تنہ ووتم آلران زٕے کنہٕ دور
ستھ مقام أنزران أو ووستاد
ستھ راز بیون وأحد چھکھ ُبنیاد
احؔد زرگر نامه پر دامهٕ چیتھ صدور
تنہ ووتم آلران زٕے کنہٕ دور
15 окт 2024