#ಸ್ತೋತ್ರಂ
ಅಥಾಷ್ಟಾವಿಂಶೋಽಧ್ಯಾಯಃ .
ಇದು ವಟಸಾವಿತ್ರಿ ಪೂಜಾ ವಿಧಾನ link ede nodi 👇
• ವಟಸಾವಿತ್ರಿ ಪೂಜಾ ವಿಧಾನ ...
ಶ್ರೀ ನಾರಾಯಣ ಉವಾಚ . ಹರೇರುತ್ಕೀರ್ತನಂ ಶ್ರುತ್ವಾ ಸಾವಿತ್ರೀ ಯಮವಕ್ತ್ರತಃ . ಸಾಶ್ರುನೇತ್ರಾ ಸುಪುಲಕಾ ಯಮಂ ಪುನರುವಾಚ ಸಾ .. 1.. ಸಾವಿತ್ರ್ಯುವಾಚ . ಹರೇರುತ್ಕೀರ್ತನಂ ಧರ್ಮ ಸ್ವಕುಲೋದ್ಧಾರಕಕಾರಣಂ . ಶ್ರೋತೃಣಾಂ ಚ ವಕ್ತೃಣಾಂ ಜನ್ಮಮೃತ್ಯುಜರಾಹರಂ .. 2.. ದಾನಾಂ ಚ ವ್ರತಾನಾಂ ಚ ಸಿದ್ಧೀನಾಂ ತಪಸಾಂ ಪರಂ . ಯೋಗಾನಾಂ ಚ ವೇದಾನಾಂ ಸೇವನಂ ಕೀರ್ತನಂ ಹರೇಃ .. 3.. ಮುಕ್ತತ್ವಮಮರತ್ವಂ ವಾ ಸರ್ವಸಿದ್ಧಿತ್ವಮೇವ ವಾ . ಶ್ರೀಕೃಷ್ಣಸೇವನಸ್ಯೈವ ಕಲಾಂ ನಾರ್ಹಂತಿ ಷೋಡಶೀಂ .. 4.. ಭಜಾಮಿ ಕೇನ ವಿಧಿನಾ ಶ್ರೀಕೃಷ್ಣಂ ಪ್ರಕೃತೇಃ ಪರಂ . ಮೂಢಾಂ ಮಾಮಬಲಾಂ ತಾತ ವದ ವೇದವಿದಾಂ ವರಃ .. 5.. ಶುಭಕರ್ಮವಿಪಾಕಂ ಚ ಶ್ರುತಂ ನೃಣಾಂ ಮನೋಹರಂ . ಕರ್ಮಾಶುಭವಿಪಾಕಂ ಚ ತನ್ಮೇ ವ್ಯಾಖ್ಯಾತುಮರ್ಹಸಿ .. 6.. ಇತ್ಯುಕ್ತ್ವಾ ಸಾ ಸತೀ ಬ್ರಹ್ಮನ್ಭಕ್ತಿನಮ್ರಾತ್ಮಕಂಧರಾ . ತುಷ್ಟಾವ ಧರ್ಮರಾಜಂ ಚ ವೇದೋಕ್ತೇನ ಸ್ತವೇನ ಚ .. 7.. ಸಾವಿತ್ರ್ಯುವಾಚ . ತಪಸಾ ಧರ್ಮಮಾರಾಧ್ಯ ಪುಷ್ಕರೇ ಭಾಸ್ವರಃ ಪುರಾ . ಧರ್ಮಾಂಶಂ ಯಂ ಸುತಂ ಪ್ರಾಪ ಧರ್ಮರಾಜಂ ನಮಾಮ್ಯಹಂ .. 8.. ಸಮತಾ ಸರ್ವಭೂತೇಷು ಯಸ್ಯ ಸರ್ವಸ್ಯ ಸಾಕ್ಷಿಣಃ . ಅತೋ ಯನ್ನಾಮ ಶಮನಮಿತಿ ತಂ ಪ್ರಣಮಾಮ್ಯಹಂ .. 9.. ಯೇನಾಂತಶ್ಚ ಕೃತೋ ವಿಶ್ವೇ ಸರ್ವೇಷಾಂ ಜೀವಿನಾಂ ಪರಂ . ಕರ್ಮಾನುರೂಪಕಾಲೇನ ತಂ ಕೃತಾಂತಂ ನಮಾಮ್ಯಹಂ .. 10.. ಬಿಭರ್ತಿ ದಂಡಂ ದಂಡ್ಯಾಯ ಪಾಪಿನಾಂ ಶುದ್ಧಿಹೇತವೇ . ನಮಾಮಿ ತಂ ದಂಡಧರಂ ಯಃ ಶಾಸ್ತಾ ಸರ್ವಕರ್ಮಣಾಂ .. 11.. ವಿಶ್ವೇ ಯಃ ಕಲಯತ್ಯೇವ ಸರ್ವಾಯುಶ್ಚಾಪಿ ಸಂತತಂ . ಅತೀವ ದುರ್ನಿವಾರ್ಯಂ ಚ ತಂ ಕಾಲಂ ಪ್ರಣಮಾಮ್ಯಹಂ .. 12.. ತಪಸ್ವೀ ವೈಷ್ಣವೋ ಧರ್ಮೋ ಸಂಯಮೀ ವಿಜಿತೇಂದ್ರಿಯಃ . ಜೀವಿನಾಂ ಕರ್ಮಫಲದಂ ತಂ ಯಮಂ ಪ್ರಣಮಾಮ್ಯಹಂ .. 13.. ಸ್ವಾತ್ಮಾರಾಮಶ್ಚ ಸರ್ವಜ್ಞೋ ಮಿತ್ರಂ ಪುಣ್ಯಕೃತಾಂ ಭವೇತ್ . ಪಾಪಿನಂ ಕ್ಲೇಶದೋ ಯಸ್ಯ ಪುತ್ರೋ ಮಿತ್ರೋ ನಮಾಮ್ಯಹಂ .. 14.. ಯಜ್ಜನ್ಮ ಬ್ರಹ್ಮಣೋ ವಂಶೇ ಜ್ವಲಂತಂ ಬ್ರಹ್ಮತೇಜಸಾ . ಯೋ ಧ್ಯಾಯತಿ ಪರಂ ಬ್ರಹ್ಮ ಬ್ರಹ್ಮವಂಶಂ ನಮಾಮ್ಯಹಂ .. 15.. ಇತ್ಯುಕ್ತ್ವಾ ಸಾ ಚ ಸಾವಿತ್ರೀ ಪ್ರಣನಾಮ ಯಮಂ ಮುನೇ . ಯಮಸ್ತಾಂ ವಿಷ್ಣುಭಜನಂ ಕರ್ಮಪಾಕಮುವಾಚ ಹ .. 16.. ಇದಂ ಯಮಾಷ್ಟಕಂ ನಿತ್ಯಂ ಪ್ರಾತರುತ್ಥಾಯ ಯಃ ಪಠೇತ್ . ಯಮಾತ್ತಸ್ಯ ಭಯಂ ನಾಸ್ತಿ ಸರ್ವಪಾಪಾತ್ಪ್ರಮುಚ್ಯತೇ .. 17.. ಮಹಾಪಾಪೀ ಯದಿ ಪಠೇತ್ ನಿತ್ಯಂ ಭಕ್ತ್ಯಾ ಚ ನಾರದ . ಯಮಃ ಕರೋತಿ ತಂ ಶುದ್ಧಂ ಕಾಯವ್ಯೂಹೇನ ನಿಶ್ಚಿತಂ .. 18.. ಇತಿ ಶ್ರೀಬ್ರಹ್ಮವೈವರ್ತೇ ಮಹಾಪುರಾಣೇ ಪ್ರಕೃತಿಖಂಡೇ ನಾರದನಾರಾಯಣಸಂವಾದೇ ಸಾವಿತ್ರ್ರಿಕೃತಯಮಸ್ತೋತ್ರಂ ನಾಮಾಷ್ಟಾವಿಂಶೋಽಧ್ಯಾಯಃ ..
1 июн 2023