ഗുരുവായൂര് ക്ഷേത്രക്കുളത്തിന് വടക്ക് ഔട്ടര്റിംഗ് റോഡില് കക്കാട്ടു മനയില് ആനന്ദന് നമ്പൂതിരിയ്ക്കും ഭാര്യ ശാരദയ്ക്കും ആദ്യം മകള് പിറന്നപ്പോള് ഒരു മോഹം, അടുത്തത് ഒരുണ്ണിയാവണം. ശാരദയുടെ അമ്മാവനും പ്രശസ്ത ആയുര്വേദവൈദ്യനുമായ സി.ടി.മാധവന് നമ്പൂതിരി ആഗ്രഹമറിഞ്ഞ് പുംസവനം ചികിത്സ പ്രയോഗിച്ചു. ആണ്കുഞ്ഞു പിറന്നു, കിരണ്. പഠിക്കാന് മിടുക്കന്. വേദവും സംഗീതവും മൃദംഗവും അഭ്യസിച്ചു. പഠനകാലത്ത് പലവട്ടം കലാപ്രതിഭയായി. റഷ്യയിലെ ആയുര്വേദഡോക്ടറായി. ഡോ.കിരണ് ആനന്ദ് (34) എന്ന വ്ളോഗറായി.മോസ്കോയിലെ മഞ്ഞുമലകള്ക്കു നടുവിലിരുന്ന് കമ്പിളിക്കുപ്പായങ്ങളണിഞ്ഞ് വേദവും സംഗീതവും യാത്രാനുഭവങ്ങളുമെല്ലാം സമൂഹമാദ്ധ്യമങ്ങളിലൂടെ ലോകത്തോട് പങ്കുവെച്ചു. ഇപ്പോള് അദ്ദേഹം ഒറ്റമുണ്ടുടുത്ത് മേല്മുണ്ടണിഞ്ഞ് ശരീരവും മനസും സമര്പ്പിച്ച് കണ്ണന്റെ പാദാരവിന്ദത്തിലെ സേവകന്, ഗുരുവായൂര് മേല്ശാന്തി!
ഡോ.കിരണിന്റെ മുത്തച്ഛന് കക്കാട് ദാമോദരന് നമ്പൂതിരി അഞ്ചുതവണ ഗുരുവായൂര് മേല്ശാന്തിയായിരുന്നു. അച്ഛന്റെ ഇളയ സഹോദരന് ദേവദാസന് നമ്പൂതിരി രണ്ടുതവണയും മേല്ശാന്തിയായി.കക്കാട്, പൊട്ടക്കുഴി, മുന്നൂലം, പഴയം കുടുംബങ്ങളാണ് ഗുരുവായൂരിലെ ഓതിക്കന് കുടുംബങ്ങള്. ക്ഷേത്രത്തില് സപ്തശുദ്ധി, പന്തീരടി പൂജ, ഉദയാസ്തമനപൂജ എന്നിവയെല്ലാം ചെയ്യേണ്ടവരാണ് ഈ കുടുംബങ്ങള്. അതുകൊണ്ടു തന്നെ കക്കാട് മനയില് പിറന്ന കിരണ്, വേദങ്ങളും പൂജാവിധികളുമെല്ലാം ചെറുപ്പത്തിലേ പഠിച്ചു. നാരായണ മംഗലത്ത് അഗ്നിശര്മന് നമ്പൂതിരിയില് നിന്ന് ഋഗ്വേദവും പൊട്ടക്കുഴി നാരായണന് നമ്പൂതിരിയില് നിന്ന് ക്ഷേത്രകര്മ്മങ്ങളും പൂജാവിധികളും സ്വായത്തമാക്കി.
ദേവസ്വം ഇംഗ്ളീഷ് മീഡിയം, ഗുരുവായൂര് ശ്രീകൃഷ്ണ സ്കൂളുകളില് നിന്ന് വിദ്യാഭ്യാസം പൂര്ത്തിയാക്കിയാണ് കോയമ്പത്തൂര് എ.വി.പിയില് നിന്ന് ആയുര്വേദത്തില് ബിരുദം നേടിയത്. മാള പൂപ്പത്തിയിലെ ഡി.വി.എം. ആശുപത്രിയിലും ധാത്രി ആയുര്വേദ ആശുപത്രിയിലും പ്രാക്ടീസ് ചെയ്ത ശേഷം ഏഴ് വര്ഷം മുന്പാണ് ഡോ.കിരണ് മോസ്കോയിലെ കേരള സെന്റര് ഫോര് ആയുര്വേദ ആന്ഡ് യോഗയിലെത്തുന്നത്. ഒരു വര്ഷം കഴിഞ്ഞ് ഭാര്യ ഡോ.മാനസിയേയും കൊണ്ടുപോയി. റഷ്യന് ഭാഷയില് പരിജ്ഞാനം നേടി. പഞ്ചകര്മ്മ ചികിത്സയില് പ്രാവീണ്യം നേടി. റഷ്യക്കാര്ക്ക് ശാസ്ത്രീയമായി തന്നെ ആയുര്വേദചികിത്സ ലഭ്യമാക്കി. മലയാളികള് ഏറെയുളള സ്ഥലമായിരുന്നു. സന്ധ്യാവന്ദനം ചെയ്യാനുളള സമയവും സന്ദര്ഭവും വരെ ഡോ.കിരണിന് ഒത്തു കിട്ടി. പഠനത്തിനിടെ സകലകലകളിലും കിരണ് കൈവെച്ചു. സംഗീതം, കവിതാപാരായണം, പെയിന്റിംഗ്... അങ്ങനെയെല്ലാം. 19971998 ലും 199899 ലും സി.ബി.എസ്.ഇ സംസ്ഥാന സ്കൂള് യുവജനോത്സവങ്ങളില് 'കലാപ്രതിഭ' ആയിരുന്നു. എം ജയചന്ദ്രന്, മധു ബാലകൃഷ്ണന് തുടങ്ങിയവരോടൊപ്പം 'മലര്നിവേദ്യം' എന്ന ഗുരുവായൂരപ്പ ഭക്തിഗാന ആല്ബത്തിന്റെ പിന്നണിയിലും കിരണുണ്ടായിരുന്നു. അമ്മ ശാരദാ ആനന്ദനും ആല്ബത്തില് ഗാനരചയിതാവായി. ഭാര്യ മാനസിയും പാടി. അദ്ധ്യാത്മികവിഷയങ്ങളിലുളള അമ്മയുടെ യൂട്യൂബ് ചാനലും വൈറലാണ്. സഹോദരി രശ്മിയും ഗായികയാണ്. വിവാഹിതയായശേഷം കൊട്ടാരക്കരയില് ഗണിതാദ്ധ്യാപികയാണ്.
ഒരിക്കലും വ്ളോഗറാവണമെന്ന് ആഗ്രഹിച്ചില്ലെന്നും ആയിപ്പോയതാണെന്നും ഡോ.കിരണ് പറയുന്നു.
#drkirananand #russia #ayurvedadoctor
24 сен 2022