የአዲስ ዓመት መልዕክት "መዞር ይበቃችኋል!" 

ይህ ቪዲዮ የኢትዮጵያውያንን አዲስ ዓመት (2014 ዓ.ም) በማስመልከት ወንጌላዊ ያሬድ ያስተላለፈው አገራዊ መልዕክት ነው። የእስራኤል ልጆች ከግብጽ ከወጡ በኋላ ከኤርትራ ባሕር እስከ ከነዓን ለመድረስ የፈጀባቸው ብዙዎቻችን እንደምናስበው 40 ዓመት ሳይሆን 2 ዓመት ብቻ ነበር። በሁለት ዓመት የተስፋይቱ ምድር በር የነበረው ቃዴስ በርኔ ከደረሱ በኋላ እግዚአብሔርን ባለማመናቸው ምክንያት እግዚአብሔር በቁጣው ማለባቸው። መሐላውም ከእነዚህ ከናቁኝ አንድስ እንኳን አያይዋትም በሚል ነበር። ስለዚህ ይህ የማያምን ትውልድ ሞቶ እስኪያልቅ የእስራኤል ልጆች የሴይርን ቅጥልጥል ተራሮች ለ32 ዓመታት መዞር ነበረባቸው። አንድን ስፍራ ለ32 ዓመታት መዞር አድካሚ፣ አሰልቺ፣ አታካች ጉዞ ነው። ያ የማያምን ጠማማ ትውልድ ሞቶ ሲያልቅ እና አዲስ "የኢያሱ ትውልድ" ሲነሳ እግዚአብሔር "አሁን ይህንን ተራራ መዞር ይበቃችኋል፣ ወደ ተስፋይቱ ምድር ውጡ አለ።
የኢትዮጵያም ሁኔታ እንዲሁ ነው። በ1960ዎቹ የተነሳው የመማርና የመሰልጠን ዕድል ያገኘው ትውልድ ታበየ፣ እግዚአብሔርን ናቀ፣ "አምላክ የሚባል የለም!" አለ። ከዚያም በየዩኒቨርስቲዎቹ በባዕድ ፍልስፍና ተሞልቶ ሕ.ወ.ሃ.ት፣ ኢ.ህ.አ.ፓ፣ ኦ.ነ.ግ፣ ፣ ወታደራዊ ደርግ፣ ሜ.ኤ.ሶ.ን፣ ወዝሊግ፣ ኢ.ጫ.ት፣ ኢ.ማ.ዴ.ሊ … ወ.ዘ.ተ በሚል ተደራጅተው 47 ዓመታት በላይ ኢትዮጵያን የማትወጣበት አዙሪት ውስጥ ከተዋታል።
ኢትዮጵያ የተስፋ አገር ናት! ተስፋዋም እውነተኛ አንድነት ነው። አንድነት ልዩነትን የማይረግጥበት፣ ልዩነትም አንድነትን የማይውጥበት የመከባበርና በጋራ የመኖር እሴት ርስቷ ነው። ተስፋዋ፣ እውነተኛ ፍትሕ ነው። የሕግ የበላይነት የሰፈነበት፣ ብዙሃኑን የሚሰማ፣ ለትናንሾችንና ለደካሞች የሚፈርድ ፍትሕ ርስቷ ነው። ተስፋዋ፣ በተለወጠ አስተሳሰብ፣ በታደሰ አእምሮ በመልካም የሥራ ፈጠራ ባሕል፣ የትጋት ባሕል፣ የጊዜ አጠቃቀም ባሕል፣ የንባብና የምርምር ባሕል፣ የተግባቦት ባሕል ርስቷ ነው። በእነዚህ ርስቶች አጠገብ ናት፣ ነገር ግን መግባትና መውረስ አልቻለችም።
እነዚህን ምድራዊ ተስፋዎቿን ለመውረስ ግን አንድ ነገር መሆን አለበት። የቀደሙት የ60ዎቹ የክህደት ትውልድ እርሾ ከዚህ ትውልድ ወጥቶ ማለቅ አለበት። ያ የክፋት፣ የተንኮል፣ የሴረኝነት፣ የጦረኝነት፣ የዘራፊነት፣ የዘረኝነትና የመለያየት እርሾ ዛሬም የመውደቅና የመውደምን ተራሮች እንድንዞር ዳርጎናል። ያ እርሾ ተንጠፍጥፎ እስኪያልቅ ድረስ ኢትዮጵያ ሥልጣን በጠመንጃ አፈ-ሙዝ የሚያዝባት፣ በጉልበት ያሸነፈ የወደደውን ሕግ የሚጭንባት፣ ሁሌ እንደ አዲስ የምትመሠረት ኋላ ቀር አገር ከመሆን አትወጣም። የአንድነት፣ የፍትሕና የዕድገት ተስፋዋን አትወርስም።
ይህ ትውልድ ፈጥኖ መንቃት አለበት። የቀደሙቱ አስተሳስብ በዚህ ትውልድ ውስጥ መሞት፣ መጥፋትና መክሰም አለበት። በምድረ በዳሊሞት የሚገባውን በእግዚአብሔር የተጠላ አስተሳሰብ አንግቦ የሚሰዋና የሚሞት ትውልድ መኖር የለበትም። ትውልዱ ወደ ኋላ ዘር እየቆጠረ፣ የ60ዎቹን ትርክት እየቀመረ መሠዋት የለበትም። ይልቅ ያንን ድሪቶ ከላዩ አሽቀንጥሮ ጥሎ ተስፋውን ለመውረስ በእምነት መገስገስ አለበት።
ያኔ ኢትዮጵያ የአፍሪካ ማማ፣ የምድር ጌጥ ትሆናለች። ያላት የተፈጥሮ ጸጋ ይገለጣል። ሕዝቧ በነጻነት ተዋዶና ተከባብሮ ይኖራል። ሕጻናት በደስታ የሚቦርቁባት፣ የሙሽራውና የሙሽራይቱ ድምጽ የሚያስተጋባባት፣ አዛውንትና አረጋውያን ዕድሜ ጠግበው፣ ጥሪታቸውን ለልጆቻቸው አውርሰው፣ ትውልዳቸውን መርቀው፣ በልጅ፣ ልጆቻቸው ተከበው የሚያሽልቡባት ምድር ትሆናለች። መዞር ይብቃን! በቃችሁ ይበለን! አዎን እግዚአብሔር በቃችሁ እያለን ነው። እኛም የ60ዎቹን የክህደት ትውልድ አስተሳሰብ አውልቀን እንጣል።
መልካም አዲስ ዓመት
2014 ዓ.ም