ព្រះយេស៊ូវមានបន្ទូលថា «ព្រះវិញ្ញាណព្រះអម្ចាស់សណ្ឋិតលើខ្ញុំ ពីព្រោះទ្រង់បានចាក់ប្រេងតាំងខ្ញុំ» 

👉ព្រះយេស៊ូវមានបន្ទូលថា «#ព្រះវិញ្ញាណព្រះអម្ចាស់សណ្ឋិតលើខ្ញុំ #ពីព្រោះទ្រង់បានចាក់ប្រេងតាំងខ្ញុំ ឲ្យផ្សាយដំណឹងល្អដល់មនុស្សទ័លក្រ ទ្រង់បានចាត់ខ្ញុំឲ្យមក ដើម្បីនឹងប្រោសមនុស្សដែលមានចិត្តសង្រេង ហើយប្រកាសប្រាប់ពីសេចក្ដីប្រោសលោះដល់ពួកឈ្លើយ នឹងសេចក្ដីភ្លឺឡើងវិញដល់មនុស្សខ្វាក់ ហើយឲ្យដោះមនុស្ស ដែលត្រូវគេជិះជាន់ឲ្យរួច» នេះជាលើកដំបូងបង្អស់ដែលព្រះយេស៊ូវប្រកាសពីឋានៈរបស់ទ្រង់ជាព្រះមេស៊ីដល់សាសន៍អ៊ីស្រាអែល។
បទទំនាយហោរាអេសាយដែលបានទាយ ហើយចែងទុកក្នុងព្រះគម្ពីរសញ្ញាចាស់មុនការយាងមករបស់ព្រះយេស៊ូវជាង ៧០០ឆ្នាំបានសម្រេចតាមបទទំនាយ លើព្រះយេស៊ូវគ្រីស្ទដ៏ជាព្រះរាជបុត្រានៃព្រះកាលទ្រង់យាងមកផែនដី ជាង២០០០ឆ្នាំមុន។ បន្ទាប់ពីព្រះយេស៊ូវទទួលបុណ្យជ្រមុជ ហើយតម ៤០ថ្ងៃ ទ្រង់ក៏ចូលស្រុកណាសារ៉ែតវិញ ទ្រង់បានធ្វើទីបន្ទាល់អំពីបទទំនាយរបស់ហោរាអេសាយដែលចែងទុកអំពីទ្រង់ គឺជាព្រះមេស៊ីដែលត្រូវយាងមកសង្គ្រោះសាសន៍អ៊ីស្រាអែលតាមវេលាកំណត់ នោះបានសម្រេចនៅថ្ងៃនេះហើយ។ ប៉ុន្តែសាសន៍អ៊ីស្រាអែល ពួកអាចារ្យផារីស៊ីបដិសេធការធ្វើបន្ទាល់អះអាងរបស់ទ្រង់ ពីព្រោះអ្នកស្រុកនោះគេស្គាល់ព្រះយេស៊ូវត្រឹមតែជាកូនជាងឈើម្នាក់ប៉ុណ្ណោះ ហេតុអ្វីបានជាហ៊ានអះអាងថាខ្លួនជាព្រះមេស៊ីដូច្នេះ? ពួកគេមានកំហឹងក្នុងចិត្ត ហើយបណ្តេញព្រះយេស៊ូវចេញ។ ហេតុអ្វីបានជាសាសន៍យូដា ឬ អ៊ីស្រាអែល មិនទទួលស្គាល់បទទំនាយ ហើយបដិសេធព្រះយេស៊ូវ?
ចំណែកបងប្អូនគ្រីស្ទាន ក៏មានមួយចំនួនដែលមិនស្គាល់បទទំនាយដែលចែងទុកអំពីការយាងមករបស់ព្រះវិញ្ញាណ ដែលព្រះយេស៊ូវថ្លែងពីទ្រង់ទុកជាមុនដែរ មុនដែលទ្រង់យាងទៅឋានសួគ៌វិញ ពួកគេមិនបានស្គាល់ទ្រង់ ហើយក៏មិនទទួលទ្រង់ដែរ ថែមទាំងបណ្តេញទ្រង់ចេញផង ដូចជាសម័យព្រះយេស៊ូវយាងមកត្រូវពួកសាសន៍អ៊ីស្រាអែលមិនស្គាល់បទទំនាយ បណ្ដាញព្រះយេស៊ូវដ៏ជាព្រះមេស៊ីរបស់ខ្លួនចេញដែរ។ ជាការពិតសម័យកាលព្រះគុណ ក្នុងពួកអ្នកជឿព្រះយេស៊ូវ ព្រះបានចាត់ព្រះវិញ្ញាណបរិសុទ្ធមកគង់នៅជាមួយពួកគេ ក៏មានអំណោយទានរបស់ព្រះវិញ្ញាណបរិសុទ្ធផ្សេងៗ និងដោយព្រះចេស្តា ការឫទ្ធិបារមី ការអស្ចារ្យផ្សេងៗ ប៉ុន្តែមានអ្នកខ្លះមិនបានទទួលទេ ដ្បិតមិនបានស្គាល់ ឬ បដិសេធទ្រង់ផង ដូចជាពួកអ៊ីស្រាអែលបដិសេធព្រះមេស៊ីដែរ។
-----------------------------
👉ព្រះយេស៊ូវថ្លែងទំនាយអំពីព្រះវិញ្ញាណបរិសុទ្ធដែលត្រូវយាងមកក្រោយទ្រង់ ហើយធ្វើបន្ទាល់ពីទ្រង់ តម្កើងទ្រង់ឡើង។
📕លូកា ៤.១៤-១៩
ឯព្រះយេស៊ូវទ្រង់វិលទៅស្រុកកាលីឡេវិញ ទាំងមានព្រះចេស្តានៃព្រះវិញ្ញាណសណ្ឋិតលើទ្រង់ នោះមានឮល្បីពីទ្រង់សុសសាយទួទៅក្នុងស្រុកនៅជុំវិញ ទ្រង់បង្រៀនក្នុងសាលាប្រជុំរបស់គេ ហើយគេក៏សរសើរដំកើងទ្រង់ទាំងអស់គ្នា រួចទ្រង់យាងមកដល់ណាសារ៉ែត ជាស្រុកដែលទ្រង់គង់នៅពីកុមារ ក៏ចូលទៅក្នុងសាលាប្រជុំ នៅថ្ងៃឈប់សំរាក តាមទំលាប់ទ្រង់ ហើយឈរឡើង ដើម្បីអានមើលគម្ពីរ គេក៏យកគម្ពីរហោរាអេសាយមកថ្វាយទ្រង់ កាលទ្រង់បានបើកគម្ពីរហើយ នោះទ្រង់រកឃើញត្រង់កន្លែងដែលមានសេចក្ដីចែងទុកមកថា «ព្រះវិញ្ញាណព្រះអម្ចាស់សណ្ឋិតលើខ្ញុំ ពីព្រោះទ្រង់បានចាក់ប្រេងតាំងខ្ញុំ ឲ្យផ្សាយដំណឹងល្អដល់មនុស្សទ័លក្រ ទ្រង់បានចាត់ខ្ញុំឲ្យមក ដើម្បីនឹងប្រោសមនុស្សដែលមានចិត្តសង្រេង ហើយប្រកាសប្រាប់ពីសេចក្ដីប្រោសលោះដល់ពួកឈ្លើយ នឹងសេចក្ដីភ្លឺឡើងវិញដល់មនុស្សខ្វាក់ ហើយឲ្យដោះមនុស្ស ដែលត្រូវគេជិះជាន់ឲ្យរួច» ព្រមទាំងប្រកាសប្រាប់ពីឆ្នាំដែលព្រះអម្ចាស់កំណត់ទុក។
📕យ៉ូហាន ១៦.១២-១៥
ខ្ញុំនៅមានសេចក្ដីជាច្រើនទៀត នឹងប្រាប់ដល់អ្នករាល់គ្នា តែឥឡូវនេះ អ្នករាល់គ្នាពុំអាចនឹងទទួលបានទេ កាលណាព្រះអង្គនោះ គឺជាព្រះវិញ្ញាណនៃសេចក្ដីពិតបានមកដល់ នោះទ្រង់នឹងនាំអ្នករាល់គ្នាចូលក្នុងគ្រប់ទាំងសេចក្ដីពិត ដ្បិតទ្រង់នឹងមានបន្ទូល មិនមែនដោយអាងព្រះអង្គទ្រង់ទេ គឺនឹងមានបន្ទូល ចំពោះតែសេចក្ដីណាដែលទ្រង់ឮ ហើយនឹងសំដែង ឲ្យអ្នករាល់គ្នាដឹងការដែលត្រូវមក ទ្រង់នឹងដំកើងខ្ញុំ ដ្បិតទ្រង់នឹងយកសេចក្ដីដែលដំរូវពីខ្ញុំ មកប្រាប់ដល់អ្នករាល់គ្នា គ្រប់ទាំងអស់ដែលព្រះវរបិតាមាន នោះជារបស់ផងខ្ញុំដែរ ហេតុនោះបានជាខ្ញុំប្រាប់ថា ទ្រង់នឹងយកសេចក្ដីដែលដំរូវពីខ្ញុំ មកប្រាប់អ្នករាល់គ្នា។
--------------------------
👉ខគម្ពីរយោង បទទំនាយហោរាអេសាយ។
📕អេសាយ ៦១.១-២
ព្រះវិញ្ញាណនៃព្រះអម្ចាស់យេហូវ៉ា ទ្រង់សណ្ឋិតលើខ្ញុំ ពីព្រោះព្រះយេហូវ៉ាទ្រង់បានចាក់ប្រេងតាំងខ្ញុំឲ្យផ្សាយដំណឹងល្អដល់មនុស្សទាល់ក្រ ទ្រង់បានចាត់ខ្ញុំឲ្យមក ដើម្បីនឹងប្រោសមនុស្សដែលមានចិត្តសង្រេង នឹងប្រកាសប្រាប់ពីសេចក្ដីប្រោសលោះដល់ពួកឈ្លើយ ហើយពីការដោះលែងដល់ពួកអ្នកដែលជាប់ចំណង ព្រមទាំងប្រកាសប្រាប់ពីឆ្នាំដែលព្រះយេហូវ៉ាទ្រង់សព្វព្រះហឫទ័យ នឹងពីថ្ងៃ ដែលព្រះនៃយើងខ្ញុំនឹងសងសឹកផង ហើយឲ្យកំសាន្តចិត្តនៃអស់អ្នកណាដែលសោយសោក។