【18區搵食-點解觀塘咁多海南雞？！同大廚實試4間人氣海南雞飯】 

【18區搵食-點解觀塘咁多海南雞？！同大廚實試4間人氣海南雞飯】觀塘海南雞飯眾多｜外賣堂食任君選擇｜雞全部都係雞｜食海南雞一定要皮爽肉嫩｜食雞唔食皮不如唔好食｜居然冇一間中伏｜好難評分｜海南雞飯愛好者要睇｜一日食4間海南雞｜呢4間你哋食過未？
觀塘出名嘢食多，但你又知唔知，原來觀塘嘅海南雞飯店都有好多間？單單由開源道行去駱駝漆工廈短短一段路，就有4間雞南雞飯店@@估唔到觀塘人對海南雞飯嘅熱情係咁勁。今集邀請到觀塘人氣雞店：秋意豉油雞老闆JJ，拿手煮雞嘅JJ，對食雞好有要求，同我哋一齊食勻4間海南雞飯，由份量、味道、雞肉嫩滑度、油飯定白飯、有冇跟湯或者附加咩醬汁，睇吓邊間最正！
第一間係二撇雞，好多觀塘人幫襯。點了招牌海南雞飯，一上枱，JJ立即反應：「呢度嘅雞飯係雞髀疊雞胸，唔會淨係俾一個部位你，食都食得開心啲！」雖然呢度主打雞湯麵，冇諗到海南雞飯咁對辦，唔單止賣相靚，雞肉皮爽肉嫩，仲保留到一層膠原蛋白，雞湯味道屬於奶湯，飲落有雞嘅鮮味，另外油飯夠香，只跟一款醬汁，份量來說絕對夠飽肚，抵佢午市大排長龍！
第二間肥仔茶餐廳，單係肥仔海南雞喺觀塘就有3間外賣分店，最近開埋肥仔茶餐廳，終於都有得堂食佢個海南雞飯～本身諗住肥仔偏向頹飯少少，但事實係相反，肥仔嘅海南雞飯最標準，有齊3個醬汁之餘，附送元貝冬瓜清雞湯，啲雞唔hea做，雞肉冇起渣，唯一敗筆係個雞有啲凍過龍@@
第三間粉紅水門雞CP值最高，又平又大份！JJ大讚佢哋個油飯，除咗夠香，仲多咗一層薑葱嘅底味，油飯味道更加有層次；雞肉都夠滑，尤其係個醬汁開胃又惹味，雖然冇跟湯，但以$39呢個價錢嚟講冇得彈啦！
最後一間泰媽媽雞飯，標榜用清遠雞，清遠雞嘅特性係雞味特別濃，皮爽色黃，而泰媽媽雞飯嘅雞確實如此，入口就食得出分別。雞肉唔會太肥，煮嘅時間剛剛好，連雞胸肉都好嫩滑，去咗骨，啖啖肉，配埋開胃醬汁，味道一流～
雖然我同JJ最後選擇嘅第一名唔一樣，但好在今集食嘅4間都零中伏！想知邊2間榜上有名？記得今晚9點上RU-vid睇片啦～
二撇雞
地址：觀塘開源道60號駱駝漆大廈三期4樓O室
招牌海南雞飯 $57 （送雞湯）
肥仔茶餐廳
地址：觀塘開源道50號利寶時中心地下2號鋪
招牌無骨海南雞飯 $52 （送元貝冬瓜清雞湯）
粉紅水門雞
地址：觀塘駿業街56號中海日升中心地下N號鋪
海南雞飯 $39
泰媽媽雞飯
地址：觀塘觀塘道418號創紀之城五期(apm)4樓2號鋪
無骨海南雞配油飯$70
主持、撰文：Yvonne Lam
攝影、剪接：Doris Wong
美術：Anita Lam
鳴謝：秋意老闆JJ
秋意IG：秋意 Autumn Feeling
TalkFood 先填飽肚子再前進
RU-vid : / talkfood
Facebook : / talkfood
Instagram : ...
延伸閱讀：
【18區搵食-寸金尺土嘅中環食咩好？】
• 【18區搵食-寸金尺土嘅中環食咩好？】
【18區搵食-觀塘老母美食地圖】
• 【18區搵食-觀塘老母美食地圖】人龍不斷燒賣...
【18區搵食-食爆觀塘老母2.0】
• 【18區搵食-食爆觀塘老母2.0】人氣星馬飯...