Para sa mga single na hindi pa ready to mingle ngayong Valentine's Day!
DEAR KUPIDO
Paps Rey TV
Dear Kupido,
Magandang araw sa’yo
Buti ka pa, pangiti-ngiti ngayon
Halatang palaging in-love
Pero ako, heto palaging sugatan sa tama ng pana mo
Alam mo, hindi nawawala ang tiwala ko sa’yo
Na isang araw, ‘pag tinamaan ako ng punyal mo
Mag-babounce back sa taong mahal ko
Yung tipong kapwa kami tatamaan sa isa’t isa
Hanggang mapatunayan na may forever talaga
Pero hindi eh-
Parang ako lang yata ang palaging tinatamaan
Na pag tinamaan, sadyang malalim ang sugat na iniiwan
Sugat na ako lang ang nakakaramdam
Sugat na ako lang ang nakakaalam
Hindi ako naniniwala sa mga signs
Yung tipong isang araw sa gitna ng daan
May magandang dilag na makakabanggaan
At pag nagkasagian pupulutin ko ang mga gamit n’ya habang nagkakatitigan
Ang baduy ‘di ba?
Hindi ako naniniwala sa mga signs
Pero naalala ko, yung mineral water na tira n’ya, tinungkas ko
Na pag-inom ko, parang covid vaccine na dumaloy sa aking sistema
Pati hibla ng buhok n’ya, itinago ko pa
Malay ko ba na hindi pala totoo ang gayuma
Hindi pa rin ako naniniwala sa mga signs
Pero naalala ko, na sa bawat facebook post ko
Bawat patama sa kanya, umaasang mababasa n’ya
Na pag nag-heart react s’ya, magiging kami na
Yun nga lang dedma lang pala s’ya
Pati sa dalampasigan
Tahimik kong isinisigaw na sana akin na lang s’ya
Na isang araw, pag-gising katabi ko na s’ya
Pero tila tinatawanan lang ako ng mga alon
Na lumulunod sa sumamo ng puso kong nag-aasam
Yung buhay pag ibig ko kasi parang eksena sa pelikula
Feeling ko ako ‘yung bida, pero maraming kontra-bida
Akala ko palaging may happy ending, wala pala
Akala ko ako ‘yung mamahalin, hindi naman pala
Kasi lahat ng ito, ‘yun pala kathang isip lang naman
Gasgas na kasi ‘yung kataga na, “pag para sayo, para sayo!”
Na sa dami-dami ng nilalang sa mundo
May isang taong nakalaan para sa’yo
Pero kadalasan parang kanta lang eh, pinagtagpo pero hindi tinadhana
Ikaw ang kailangan pero ‘di ang mahal
Ang sakit-sakit na di ba?
Masakit kasi kung sino pa ‘yung taong mahal na mahal mo
S’ya naman ang ayaw na ayaw sa’yo
Masakit kasi kahit ano’ng lapit mo, palayo naman s’ya ng palayo
Tinamaan ka sa kanya, tinamaan naman s’ya sa iba
Palagi ko namang sinusubukang libangin ang sarili ko
Bibili ng redhorse beer, at tutungkasin lahat ng laman nito
Pero bakit ‘pag may amats na,
Sa biglang tingin ko mukha pa rin n’ya ang naaalala
Sabay buntong hininga na lang talaga
Magsisindi ng stick ng yosi
Nanamnamin, bawat buga ng usok nito
Langya naman, biglang guguhit sa usok ang pangalan n’ya
Mauubo, sabay tapon kasi badtrip talaga
Baka isipin pa ng iba may virus akong dala
Sasama sa tropa, gigimik daw
Ako naman masaya, kahit pano malilimutan ko s’ya
Langya naman, kasama pala ang mga d’yowa nila
Naglalambingan, naghaharutan
Taena! Sa harapan ko pa talaga!
Sana tulungan mo naman ako
Sana pansinin mo naman ako
Na matagpuan ko na ang tunay na pagmamahal
Pero bakit tila lahat ng pana mo, lahat ng punyal mo
Tanging sugat lang ang iniiwan sa puso ko
Hindi ka man magsalita pero alam ko ang nasa isip mo
Na siguro kasi, pagdating sa love nagmamadali ako
Na siguro kasi, nasa maling tao pa rin ang tibok ng puso ko
Na siguro kasi, nakakulong pa rin ang isip sa dating mundo
Na minsan, ‘yung tamang tao nand’yan lang pala sa tabi-tabi
Naghihintay na tamaan ng nag-iisang pana mo, Mr. Kupido!
Nagmamahal,
Ako na nagbabasa nito
Happy Valentine’ s Day!
DEAR KUPIDO
Paps Rey TV
All Rights Reserved
February 2020
#spokenpoetry #spokenword
Facebook Page: / papsreytv25
Photography : Michael delos Santos
Model : Nicole Jane Villamor Nipas
3 окт 2024
