මේ සුන්දර ගමනාන්තය පිළිබඳ ලිවීමට ඇති දේ බොහෝය. මේ ගමන ආරම්භ වන්නේ සති අන්තයකයි. වර්ශාව වැටී ගංගා,ඇල,දොළ ජලයෙන් පොහොසත්ව ගලා බසිනා කාලයක මහා වනාන්තරයකට මායිම්ව ඇති දිය ඇල්ලක් මුදුනේ කදවුරු බැදීම යම් කිසි ආකාරයක අවධානමක් සහිත වැඩක් බව අප තිදෙනාම දැන නොසිටියා නොවේ. සෙනසුරාදා පාන්දරින්ම කොළඹින් පිටත් වූ අප කලවාන හරහා රක්වාන දක්වා වැටී ඇති මාර්ගයේ ගමන් කොට හඳපාන් ඇල්ල පේන මානයෙන් වාහනය නවතා ගත්තේ හඳපාන් ඇල්ල මුදුනට යාමට මාර්ගයක් සොයා ගැනීමට යි.
යාමට හරියාකාර මාර්ගයක් නොමැති සුන්දර දිය ඇල්ලක් මහා වනාන්තරයක් මැදින් කඩා හැලීම දෙස ඈත සිට බලා හිදීමත් භාවනාවක් වැනිය. කෙසේ නමුත්, ගම්වාසීන්ගෙන් අසා දැනගත් තොරතුරු අනුව වසා දමා ඇති සංචාරක බංගලාවක් ආසන්නයේ ඇති තේ වත්ත කෙලවරින් වනාන්තරයට ඇතුලු විය හැකි බවත්, නිතර යන ගම්වාසීන් පවා මං මුලා වී දින ගනන් වනාන්තරයේ අතරමං ව සිට නැවත සොයාගෙන ඇති බවත් දැන ගන්නට ලැබුනේ දිය ඇල්ල සොයා යාමේ ආශාව තව තවත් වර්ධනය කරමිනු යි.
කෙසේ නමුත් අප සංචාරක බංගලාව සොයා නැවතත් ගමන් ඇරඹූ අතර, අවසානයේ ප්‍රවේශ මාර්ගයට අගුලු දමා තිබූ ගම්වාසීන් පැවසූ බංගලාව සොයා ගැනීමට අපට හැකි විය. ගේට්ටුවට පේන මානයේම වතු කම්කරුවෙකි. "මාමේ..." මා යම් තරමක උස් හඩින් පැවසූවේ අප සිටි දුර වැඩි නිසාවෙනි. වට පිට බැලූ වතු කම්කරුවා අප දෙස බලා
"හෝටලය කාලෙක ඉදන් වහල මාත්තයා.." යනුවෙන් කියා සිටියේ අප පැමිණි කාරණය පිළිබද වැටහීමකින් නොවන බව අප එකිනෙකාගේ මුහුණු දෙස බලා ගැනීමට හේතු විය. ලද අවසරයෙන් ගේට්ටුවෙන් රිංගා ගත් අප සරමක් සහ මඩ වැදුනු කමිසයකින් සැරසී සිටි "ක්‍රිශනමූර්ති" මාමා ගෙන් අප පැමිණි කාරණය පිළිබඳව සහ දිය ඇල්ලට යන ඉසව්ව පිළිබදව කරුණු කාරණා විමසා දැන ගත් අතර, ඉන් අවසානයට ම දැනගත් කරුණ ගැන නම් හදවතට ගෙන ආවේ යම් කිසි කුතුහලයකි.
වනාන්තරයට සුදුසු ඇදුමකින් සහ බූට් සපත්තු වලින් සැරසුනු අප, තේ වත්ත මැදින් වනාන්තරයට ගොඩ බට වූ අතර ගමන ආරම්භයේ සිටම කූඩැල්ලන්ගෙන් ලැබුනේ උණුසුම් පිළිගැනීමකි. උස් ශාක වලට යටින් කුඩා ශාක බොහෝ ප්‍රමාණයක් වැවී තිබූ අතර, ඒ සියල්ලකම පාහේ පාසී වලින් වැසී පැවතිනි. ගමන් කිරීමට ඇති එළිපෙහෙලි බිම් කඩ පුරා වැටී ඇති ගල් මත ඉතා හොදින් වැඩුනු පාසි සහ කුඩා පැලෑටි බොහොමයකි. කූඩැල්ලන්ට පාරාදීසයක් වූ මේ පාරසරික තත්වය අපට මුලු ගමන පුරාවටම විවේකයකින් තොරව ගමන් කිරීමට මග සාදා තිබුනි. මක් නිසාද යත්, කුඩා වේලාවකට හෝ හිද ගැනීමට විවේක ගැනීමට නතර වූ සෑම වේලාවකම කූඩැල්ලන් සිය ගනනින් අප වටලන්නේ නිමේෂයකිනි.
මද දුරක් ගමන් කිරීමේ දී හමු වන්නේ දිය පහරකි. ඒ ආසන්නයේම ගසක අත්තක බැද තිබූ පඩුරු කිහිපයකි. මං මුලා වීමත් හස්තිරාජයන්ගෙන් ආරක්ශා වීමත් පාර්ථනා පෙරදැරිව මින් පෙර වනාන්තරයට පැමිණි ගම් වාසීන් බැද ඇති පඩුරු අත්තේ එකෙ කොනක සිට තැනින් තැන මෙලෙස බැද තිබුනි. සීතල දිය පහරින් සිත් සේ පිපාසය සංසිදුවා ගෙන පඩුරු ගසේ අත්තක් එල්ලා නැවතත් ගමන් ඇරඹූ අප සුපුරුදු පරිදි නිෂ්ශබ්දව ගමන් කලේ අවධානය පවත්වා ගනිමිනු යි.
ගමනේ මුල සිට අවසානය දක්වා ම ඇත්තේ එකම කන්ද කි. දෙතුන් තැනෙක කුඩා තැන්නක් හමු වුවද එය වෙහෙස අඩු වීමට තරම් ප්‍රමාණවත් නොවීය. පැය දෙකක පමණ වනාන්තරය මැදින් ගමන්ගත් පසු හමු වන්නේ විශාල තැන්නකි. "ගවරවිල" සහ "චැරියට් පාත්" වලට සමාන හැඩ හුරුවමකින් හෙබි මේ තැන්න අවසානයේ ගලා බසින්නේ සුපැහැදිලි දිය පහරකි. පාසි පිරුණු කුඩා ගල් අතරින් ගලා බසිනා දිය දහර ගමන් මහන්සිය නිවා දැමීමට තරම් මනස්කාන්ත ය.
දිය පහර දිගේ මිටර හයසියයක් පමණ ගමන් ගත් අප දිය දහරාව අවසන් වන දිය ඇල්ල මුදුනතට ලගා විය. මිනිසුන් විසින් නිර්මාණය කලා වැනි පඩිපෙළකට සමාන අයුරින් ඇති දිය ඇල්ල කොටස් අටකින් පමණ කඳු වැටියේ තැන් කිහිපයකින් පහලට කඩා හැලෙන්නෙ නෙත් අභිමුව පාරාදීසයක් මවමිනි. මෙහි තව තවත් ජලය තිබුනා නම් මෙය ඇත්ත වශයෙන් ම කුඩා නයගරාවක් වැනිය. දිය ඇල්ල ඉහලට වී පැයක පමණ කාලයක් වාඩි වී සිටි අප, මද වේලාවකින් දිය ඇල්ල ආසන්නයේම අපගේ කූඩාරම් බැද ගත්තේ මේ පාරාදීසයේ දින දෙක තුනක කාලයක් නිදහසේ ගත කිරිම ආරම්භ කරමිනු යි.
උදෑසන සිට හරියාකාර ආහාරයකින් තොරව සිටි අප බත් සහ තවත් එලවලු කිහිපයකුත්, උණුසුම්ව සකස් කර ගත් අතර දිය ඇල්ලට ආසන්නයේම ඇති නාන තටාකයකට සමාන සුපැහැදිලි සහ සීතල ජල තලයට බැස ගත්තේ හොදින් නා කියා ගැනීමටයි. සීතල වතුර වෙහෙසට පත් ව සිටි අප සුවපත් කරා වැනිය. වතුරෙන් ගොඩ බට වූ අප සකස් කර තිබූ ආහාර වේල රස විදිනු ලැබුවේ දිය ඇල්ල ඉහලට වී ඈතින් පේන වනාන්තරයට රාත්‍රිය උදා වන දෙස නෙත් අයාගෙනයි.
දිය පහර සමග පැමිණි වියලුනු දර කැබලි ඕනෑ තරම් ය. දෙපස වන ලැහැබට ලං නොවන පරිදි දිය ඇල්ල මැද පැතලි ගල් තලයක කුඩා ගිනිමැලයක් සකස් කර ගත්තේ රාත්‍රිය උදාවත්ම අවට වනාන්තරය වසාගෙන පැමිණෙන මීදුමත් සමග එකතුව එන සීතලෙන් යම් තාක් ගැලවී සිටීමටයි. අගුරු පිච්චෙන ශබ්දයත්, කුඩා නිශාචරයන්ගේ ශබ්දයත්, දිය ඇල්ලේ ශබ්දයත් රස විදිමින් මැදියම් රැය වන තුරුම ගිනි මැලයට වට වී, ආ ගිය තොරතුරු විමසමින් සිටි අප තිදෙනා රාත්‍රි එකොලහට පමණ කුඩාරම් තුලට රිංගා ගත්තේ වනාන්තරය මැද ඇති හඳපාන් ඇල්ල මුදුනේ රාත්‍රියක් ගෙවා දැමීමේ වාසනාව කර මත තබාගෙනයි.
හෙට දිනයේත් දිය ඇල්ලේ අනෙක් කොටස් සොයා ඇවිද යා යුතුය. එක් දිය ඇල්ලක මුදුන සෙවීමට යම් කිසි අවධානමක් ගත යුතුය. ඒ සියල්ලක්ම රූප රචනාවෙන් ම නරඹමු.
➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖
Instagram - / dinesh_a_pathum
මෙබදුම වූ සංචාර කිහිපයක්
ලකේගල තරණය - • Lakegala-Meemure | මීම...
නුවරගල තරණය - • Nuwaragala | Ampare | ...
බලාන (ආදිතමයන්ගේ ගල් ලෙන් සොයා)
Part one - • උරුමය සොයා අම්පාර "බලා...
Part two - • උරුමය සොයා අම්පාර "බලා...
අවාරයේ මහ වනාන්තරය මැදින් - • අවාරේ සිරිපා | Off sea...
ුආයුබෝවන් මෙේදිනේෂ්.
25 авг 2022
