4. Oppland - Gudbrandsdalen
Opptak frå Landskappleiken, Rauland 1994.
Mari Eggen spelar fele. Slått: Den åttande leiken, springleik.
Om musikken
Mari Eggen har lært slåtten etter opptak med Bjørn Odde (f. 1939) frå Garmo i Lom. Ifølgje feleverket finst leiken i tradisjon etter fleire spelemenn i Ottadalen, og under fleire namn. Namnet den åttande leiken er etter både Petter Eide (1911-1994) og etter Per Brenden (1886-1963): "De va ein åtte-ni tå di leikjom (med nedstilt kvint). De va ein som heitte Stor-Tor Kleppe som brukte på å segja at døm skulle spela den åttande leiken og den dernest. Han kunne ikkje rekne lenger enn åt åtte." (Feleverket Oppland 2 nr 179e). Felestillet her blir kalla spakrostille, g-d-a-d, og har namnet etter garden Spakro i Vågå. I høve til det vanlegaste stillet, a-d a-e, ofte kalt oppstilt bas, er grøvste og grannaste strengen stilt ned ein tone. - Stilte ein om fela kunne ein skapa nye klangfargar og variasjon. Særskilde stillemåtar er mykje brukt i lydarspel, i seremonisamanheng, og kanskje aller mest som fast innslag langt utpå morgonsida. Då var det vanleg å spele dei relativt få slåttane på t.d. oppstilt ters og bas og på trollstilt fele. Namn som viser til denne skikken er t.d. felestillet grålysing i Valdres og mårråslekan på Røros - Å stille om fela gjer det teknisk mogleg eller lettare å få til særskilde klangfargar og stemningar, om ikkje alltid. Likevel må ein tru at klangfargane har vore målet, stillemåten midlet.
1 ноя 2022