Parkentning “Xo‘ja” mahallasida Hazrati Said ota deb ataluvchi ziyoratgoh bor. Hazrati Bobo Mochinga yondosh bir o‘rinda, xushmanzara shahar oromgohida joylashgan. Qadimda oddiy ko‘rinishda bo‘lgan qabr ustiga Mustaqillik yillarda mahalliy ustalarning sayi-harakati bilan sharqona maqbara tiklanib, tevarak atrofi xam obod etilgan.
Ushbu zot haqida maʼlumot beruvchi manbalarda aniq bir maʼlumot yo‘q. Mahalliy oqsoqollar bilan bo‘lgan suhbatda aniq bir maʼlumot bera olishmadi, ammo Mahalliy aholi azaldan bu joylarni aziz deb, ziyorat etilib kelar ekan.
Rivoyatlarga ko‘ra Said ota ulug‘ valiy ekanliklari, ommani ruhiy tarbiyalash maqsadida shu yerlarga kelganliklari, yerga suqib qo‘ygan qamchilaridan chinor daraxti o‘sib chiqqanligi deyiladi. Bu chinor maqbaradan uzoqroq bo‘lmagan masofada joylashgan, yoshi taxminan 800 yildan oshgan. Bu og‘zaki talqinlar Mahalliy xalq orasiga mustahkam o‘rnashgan va shuning uchun ommaning shu joylarni ziyorat etish ixloslari baland.
Tarixda Said, Sayyid, Saʼid ismli aziz avliyolar o‘tganligi bu haqiqat. Ular haqida o‘sha davrda yashab ijod qilgan zamondoshlar, tarixchilar, tadqiqotchilar yozma manbalarida ko‘p uchraydi. Ammo Parkent tumanidagi valiy ota ulardan qay biri ekanligi aniq emas.
30 сен 2024
